Menya amateka y’umuhanzikazi Zahara witabye Imana wamenyekanye mu ndirimbo “Loliwe”

  • KAMALIZA AGNES
  • Ukuboza 12, 2023
  • Hashize amezi 3
Image

Umuhanzikazi w’Umunyafurika y’Epfo Zahara wamamaye cyane mu ndirimbo yakunzwe cyane Loliwe, ikaririmbwa mu bisope (karahanyuze), mu nsengero ndetse no muri Karaoke yitabye Imana ku myaka 37 azize uburwayi ku itariki ya 11 Ukuboza 2023.

Zahara yaguye mu bitaro bya Johannesburg aho yari amaze iminsi arwariye, amakuru y’urupfu rwe yemejwe na Minisitiri wa Sports ufite umuco n’ubugeni mu nshingano Bwana Zizi Kodwa.

Zahara yitabye Imana amaze kwambikwa impeta inshuro 3 mu gihe iyo aheruka muri Werurwe 2023, yayambitswe n’umukunzi we Mpho Xaba wamusabye ko babana.

Mu mwaka wa 2017 yaje gutandukana n’umukunzi we bari bamaranye imyaka itanu mu munyenga w’urukundo wanamusabye ko babana witwa Umhlobo Wenene uyu akaba yari umunyamakuru, maze nyuma ye akundana by’agahe gato na  Ian Sibiya, nawe waje kumwambika impeta amusaba ko babana maze baza gutandukana, ubu akaba apfuye yitegura kurushinga na Mpho Xaba.

Mu bihe bitandukanye uyu muhanzikazi yagiye aza gutaramira i Kigali nko muri 2018 ndetse ubwo aheruka byari muri 2019 ubwo yari yitabiriye igitaramo cya Kigali Jazz Junction.

Uyu muhanzikazi wamenyekanye ku izina rya Zahara amazina ye bwite yiswe n’ababyeyi ni Bulelwa Mkutukana yavutse ku itariki ya 09 Ugushyingo 1987, avukira muri Afurika y’Epfo ariko akurira London. Yari umwana wa gatandatu mu bana barindwi bavukana, akaba yaratangiye kuririmba afite imyaka itandatu ubwo yabaga muri korali y’abana, amaze kugira imyaka 9 gusa yaje kujya muri korali y’urubyiruko bitewe n’uburemere bw’ijwi yari afite abantu baramutangariye bamuha akabyiniriro ka “Spinach”.

Zahara wakuriye mu Burasirazuba bwa London mu Bwongereza yakomeje umwuga we aririmbira mu mihanda ya London nyuma aza gusinya amasezerano mu nzu y’umuziki yitwa TS Records ya TK Nciza.

Zahara yaje gushyira hanze Alubumu ye ya mbere yise “Loliwe” ari nayo ndirimbo yamenyekanyemo mu 2011, aho indirimbo nyinshi ze yagiye aziririmba mu rurimi rwabo gakondo rwa Xhosa.

Tariki ya 01 Gicurasi 2012 yegukanye ibihembo bya South Africa Music Awards bigera ku 8 birimo icya Best Female Artist ndetse n’ icya Best Album of The Year.

Mu 2013 yasohoye indi Album yise ‘Phendula’, nayo yamuhesheje ibikombe bitatu bya South Africa Music Awards.

Muri uwo mwaka kandi Nelson Mandela yahise amutumira kuzamuririmbira mu gitaramo cyihariye aho Zahara yahise amwandikira indirimbo yaje gusohoka kuri EP (Extended playlist) ye.

Mu mwaka wa 2014 musaza wa Zahara yaje kwicwa n’abagizi ba nabi muri London ibyatumye agira agahinda gakabije igihe kinini, maze aza kugaruka mu mwaka wa 2015 ahita akora indi Album yise “Country Girl” nayo yamuhesheje ibikombe bibiri bya Eastern Cape Music Awards.

Mu ntangiriro za 2017 yasinye amasezerano n’inzu y’umuziki ya Warner Music South Africa maze mu Ukwakira k’uwo mwaka ahita ashyira hanze indi Album yise:” Mgodi”muri iki gihe kandi yitabiriye ibitaramo bitandukanye ku mugabane w’u Burayi yerekeza Toronto, Canada ndetse n’ahandi.

Muri Gicurasi 2021, Zahara yaje gushyira hanze indi Alubumu yise, ‘Nyamezala’ muri Nyakanga agiye gusohora indi yise  ‘Nqab Yam’ ariko ikomwa mu nkokora n’icyorezo cya Covid -19 ariko n’ubundi birangira ayishyize hanze muri Nzeri uwo mwaka.

Urupfu rwa Zahara rwashenguye benshi rwamenyekanye mu ijoro ryo kuri uyu wa 11 Ukuboza 2023, aho yaguye mu bitaro bya Johannesburg.

  • KAMALIZA AGNES
  • Ukuboza 12, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE