Menya abakobwa begukanye irushanwa ry’ubwiza bafite inkomoko mu Rwanda

  • MUTETERAZINA SHIFAH
  • Werurwe 4, 2024
  • Hashize amezi 2
Image

Abanyarwanda bavuga ko nta nduru ivugira ubusa imusozi, bikanemezwa n’uko iyo ubajije abanyamahanga batandukanye icyo bazi ku Rwanda, muri byinshi bagarukaho bahuriza ku buranga bw’Abanyarwandakazi, ku buryo bamwe banifuza kuhakura abageni, kugira ngo nibura babone icyororo cy’ubwo buranga, umuco n’ubuhanga.

Ibi bihamirizwa n’amateka u Rwanda rukomeje kwandika mu ruhando mpuzamahanga ku bakobwa bafite inkomoko mu Rwanda begukanye amarushanwa y’ubwiza, ubwo babaga bitabiriye amarushanwa ya ba nyampinga mu bihe bitandukanye.

Imvaho Nshya yagukoreye urutonde rwa bamwe mu bakobwa babaye ba nyampinga b’ibihugu mu marushanwa atandukanye.

Ku ikubitiro turahasanga nyampinga w’u Bubiligi wa 2024 Miss Kenza Johanna Ameloot ufite inkomoko mu Rwanda, kuko nyina umubyara ari umunyarwandakazi.

Uyu mukobwa w’imyaka 21 aheruka gutorerwa kuba nyampinga w’u Bubiligi mu mpera za Gashyantare ubwo yari ahigitse bagenzi be 32 bahataniraga iryo kamba, asimbuye Emillie vesttinkiste wari ufite irya 2023.

Ni umukobwa wa Gakire Joselyne wakuriye i Burundi, nyuma agataha mu Rwanda, ari na ho yavuye yerekeza mu Bubiligi, yashakiye akanabyarira umukobwa we Kenza Ameloot.

Nta wavuga urutonde rw’abakobwa bafite inkomoko mu Rwanda, babaye ba Nyampinga ahandi, ngo yirengagize Hanna Karema Tumukunde wabaye Miss Uganda 2023, akaba akomoka kuri nyina w’umunyarwandakazi hamwe na Se w’umuhima, bumwe mu bwoko bw’abakomoka muri Uganda mu gace ka Ankole.

Miss Uganda 2023 Hanna Tumukunde Karema ufite inkomoko mu Rwanda kuri ubu ari mu bakobwa 10

Uyu mukobwa urimo kubarizwa mu marushanwa ya Miss World arimo kuba ku nshuro ya 71, yongeye kwandika amateka ubwo yagaragaraga ku rutonde rw’abakobwa 10 bafite ubwiza bufite intego, ni mu cyiciro cyitwa Beauty with Purpose.

Muri ayo marushanwa Miss Tumukunde ahatanye n’abandi barimo Umunyatanzania, Halima Ahmad Kopwe, Lesego Chombo wabaye Miss Botswana 2022, Leticia Frota wo muri Brazil na Miss World Trinidad & Tobago, Aché Abrahams.

Ku rutonde rw’abahatanye na Miss Uganda 2023, Hannah Karema Tumukunde, harimo kandi Umunya Indonesia, Audrey Vanessa, Priyanka Rani Joshi wo muri Nepal, Nursena Say wo muri Türkiye, Krystyna Pyszková wo muri Repubulika ya Tchèque na Sophi Shamie wo muri Ukraine.

Miss World ni irushanwa ry’ubwiza ryitabiriwe n’abakobwa barenga 100, barimo 25 bahagarariye Umugabane w’Afurika, bikaba biteganyijwe ko icyiciro cya nyuma kizaba tariki 09 Werurwe 2024.

Uwitonze Sonia Rolland, ni undi mukobwa ufite inkomoko mu Rwanda wanditse amateka ku mugabane w’u Burayi, kuko tariki 17 Ukuboza 2000 yatorewe kuba nyampinga w’u Bufaransa.

Uwitonze Sonia Rolland Miss France 2000 na we afite inkomoko mu Rwanda

Uwitonze Sonia Rolland akomoka kuri nyina w’Umunyarwandakazi na se w’Umufaransa.

Ari kumwe n’umuryango we, bavuye mu Rwanda mu mwaka wa 1990 bajya mu Burundi, aho baje kuva afite imyaka 13 berekeza mu Bufaransa mu 1994, ku bw’ibibazo by’intambara. Yashyingiranywe na Jalil Lespert bafitanye abana 2 b’abakobwa Tess na Kahina.

Uretse abakobwa bafite inkomoko mu Rwanda banditse amateka mu marushanwa y’ubwiza mu ruhando mpuzamahanga, hari n’ibindi byamamare mpuzamahanga bifite inkomoko mu Rwanda barimo umuraperi Gael Faye, Uwase Naomi Schiff uvuka ku Munyarwandakazi na se w’Umubiligi na Stromae uvuka kuri se w’Umunyarwanda.

  • MUTETERAZINA SHIFAH
  • Werurwe 4, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE