Meddie Kagere, Rutahizamu w’Ikipe y’Igihugu Amavubi, yerekeje muri Namungo FC avuye muri Singida Fountain Gate, kugera uyu mwaka w’imikino wa 2023-2024 urangiye.
Ibi byemejwe n’iyi kipe kuri uyu wa kabiri tariki 16 Mutarama 2024 ibinyujije ku mbugankoranyambaga zayo.
Yagize iti: “Twishimiye gutangaza rutahizamu ukomeye Meddie Kagere, nk’umunyamuryango mushya w’ikipe ya Namungo FC.”
Kagere w’imyaka 37 yageze muri Singida Fountain Gate tariki 5 Kanama 2022, avuye muri Simba SC.
Asize Singida Fountain ku mwanya wa gatanu wa Shampiyona imaze gukinwa imikino 14 mu gihe yerekeje muri Namungo FC iri ku mwanya wa munani n’amanota 17.
Kagere wahawe izina rya MK14 muri Simba amaze kwandika amateka muri Tanzania kuko yayitsindiye ibitego 66 mu myaka ine y’imikino yahamaze.
Meddie Kagere yanyuze mu makipe akomeye arimo Police FC, Rayon Sports FC zo mu Rwanda, Gor Mahia yo muri Kenya, Simba SC yo muri Tanzania na KF Tirana yo muri Albania.
Nta gitekerezo kiratangwa. Ba uwa mbere gutanga igitekerezo.
Andika igitekerezo
AMATEGEKO AGENGA IYANDIKA RY'IGITEKEREZO CYAWE