Mapinduzi Cup: APR FC yatsizwe umukino wa mbere

  • SHEMA IVAN
  • Mutarama 1, 2024
  • Hashize amezi 5
Image

APR FC yatsizwe na Singida Fountain Gate FC yo muri Tanzania ibitego 3-1, itakaza umukino wa mbere mu irushanwa Mapinduzi Cup ya 2024.

Uyu mukino wabaye kuri uyu wa Mbere tariki ya 1 Mutarama 2024, kuri Amaan Stadium muri Leta ya Zanzibar

Mapinduzi Cup ni irushanwa ritegurwa n’Intara ya Zanzibar muri Tanzania mu rwego rwo kwizihiza ubwigenge irimo  kwishimira ku nshuro ya 60.

Umukino uryoheye ijisho amakipe yombi yatangiye asatirana cyane.

APR FC yinjiye mu mukino ifite imbaraga myinshi, yabonye igitego cya mbere cyatsizwe na rutahizamu Victor Mboama kuri kuri ‘coup franc’nyuma y’ikosa ryari rikorewe Mugisha Gilbert inyuma y’urubuga rwamahina.

Ikipe y’Ingabo yakomeje gukina neza ariko ikoresha uruhande rw’iburyo cyane rwariho Ndayishimiye Dieudonné na Kwitonda Alain ‘Bacca’.

Uko iminota yicumaga ni ko Singida yatangiye kwinjira mu mukino ariko amahirwe Elvis Rupia na Marouf Tchakei babonaga ntibayabyaze umusaruro.

Mu minota 30, Singida yihariye umupira cyane ariko ntibigire icyo biyifasha kuko iyo yatangaga imbere mu bataha izamu bayo, kenshi umusifuzi yagaragazaga ko baraririye.

Mbere y’uko igice cya mbere kirangira, Singida yateye koruneri nziza umunyezamu Pavelh Ndzila asohoka nabi akurura umukinnyi, umusifuzi atanga penaliti yatsizwe na Elvis Rupia.

Igice cya mbere cyarangiye amakipe yombi anganyije igitego kimwe kuri kimwe 

APR FC yongeye gutangirana imbaraga igice cya kabiri. Ku munota wa 51, Mbaoma yongeye kubona ‘coup franc’ ariko ayiteye umupira ukubita mu rukuta uvamo.

Ku munota wa 60, rutahizamu w’Umunyarwanda, Meddie Kagere yinjiye mu kibuga asimbuye Yussuf Kagoma. Ni mu gihe ku munota wa 65, Apam Bemol yasimbuye Kwitonda Alain.

Singida yakomeje gukina neza ndetse ku munota wa 75, Moris Chukwu atsinda igitego cya kabiri ku ishoti rikomeye cyane yatereye hanze y’urubuga rw’amahina, Umunyezamu Ndzila ashaka kuwufata umuca mu myanya y’intoki.

Ikipe y’Ingabo yakomeje gukina nabi cyane, mu gihe ku rundi ruhande Singida yari yashyushye ari na ko yiharira umupira cyane.

Ku munota wa 86, Kagere Meddie yacometse umupira imbere ku ruhande rw’iburyo, uhindurwa imbere y’izamu usanga Francy Kazadi atsinda igitego cya gatatu.

Umukino warangiye APR FC itsizwe umukino wa mbere na Singida BS yo muri Tanzania ibitego 3-1.

Singida yahise iba ikipe ya mbere mu itsinda rya kabiri ibonye itike ya 1/4 nyuma yo gutsinda imikino ibiri ibanza.

APR FC izagaruka mu kibuga tariki 3 Mutarama 2024 ikina JKU yo muri Zanzibar saa 15:15 z’i Kigali, mbere yo gusoza imikino y’amatsinda ikina na Simba SC ku wa Gatanu.

  • SHEMA IVAN
  • Mutarama 1, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE