Mapinduzi Cup: APR FC na Simba SC byisanze mu itsinda rya kabiri

  • SHEMA IVAN
  • Ukuboza 20, 2023
  • Hashize amezi 3
Image

Ikipe ya APR FC hamwe na Simba Sports (SC) byisanze mu itsinda rya kabiri, mu irushwana rya Mapinduzi Cup rizahura amakipe 12 muri Zanzibar kuva tariki 28 Ukuboza 2023 kugeza ku ya 13 Mutarama 2024.

Iyi tombola igaragaza uko amakipe azahura mu matsinda yabaye ku wa Kabiri tariki 19 Ukuboza 2023, yasize APR FC izaba iri mu Itsinda rya kabiri hamwe na Simba SC, Jamhuri na Singida Fountain Gate isanzwe ikinamo Umunyarwanda Meddie Kagere.

Ubusanzwe, iri rushanwa rihuza amakipe yo muri Zanzibar na Tanzania, ariko kuri iyi nshuro ryaraguwe, hatumirwa n’andi makipe yo mu Karere ka Afurika y’Iburasirazuba.

Uretse APR FC yo mu Rwanda, andi makipe azarikina arimo Bandari FC yo muri Kenya, Vital’o yo mu Burundi na Uganda Revenue Authority yo muri Uganda.

Itsinda rya mbere ririmo Mlandege ifite igikombe giheruka, Azam FC, Chipukizi na URA mu gihe Itsinda rya Gatatu  rigizwe na Young Africans SC, Bandari FC, KVZ na Vital’o

Mapinduzi Cup ni irushanwa ryashyizweho na Federasiyo ya Ruhago muri Zanzibar mu 1998 rigamije kwizihiza impinduramatwara y’iki gihugu ubwo cyabonaga ubwigenge mu 1964 kibukuye mu maboko y’ubwami bw’abarabu bake bayoboraga iki kirwa cyari kigizwe n’umubare munini w’abirabura.

Ubwo riri rushanwa ryakinwaga bwa mbere mu 1998 ryitabirwaga n’amakipe yo muri Zanzibar na Tanzania gusa.

Guhera mu 2013 ni bwo bwa mbere Federasiyo ya Ruhago muri Zanzibar itegura iri rushanwa yatangiye gutumira amakipe yo hanze y’ibyo bihugu byombi maze rikinwa n’ayo muri Kenya na Uganda.

Ni ubwa mbere Ikipe yo mu Rwanda igiye kwitabira iri rushanwa.

Mapinduzi Cup yo muri Mutarama uyu mwaka yegukanywe na Mlandege FC yo mu Zanzibar itsinze Singida Big Stars ibitego 2-1 mu gihe Iki Gikombe cyari cyitabiriwe n’amakipe 12 arimo Aigle Noir yo mu Burundi yari yatumiwe.

  • SHEMA IVAN
  • Ukuboza 20, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE