Mamelodi Sundowns yegukanye African Football League ku nshuro ya mbere

  • Imvaho Nshya
  • Ugushyingo 12, 2023
  • Hashize amezi 6
Image

Ikipe ya Mamelodi Sundowns yo muri Afurika y’Efo ni yo yegukanye Shampiyona Nyafurika y’Umupira w’Amaguru )African Football League) ku nshuro ya mbere,  itsinze Wydad AC yo muri Morocco igitego 2-0. 

Ni mu mukino wo kwishyura wabaye kuri iki Cyumweru tariki 12 Ugushyingo 2023 kuri Loftus Versfeld Stadium.

Umukino ubanza wahuje amakipe yombi muri Morocco, Wydad AC yari yatsinze Mamelodi Sundowns ibitego 2_1.

Ni umukino watangiye amakipe yombi yigana, umupira ukinirwa hagati cyane bategera izamu.

Ku munota wa 35 Modiba wari wazonze cyane Wydad AC mu kibuga hagati yateye umupira n’umutwe ujya hanze y’izamu rya Yousef El Motie.

Mbere yuko igice cya mbere kirangira umusifuzi wa kane yongeyeho iminota 12.

Ku munota wa 3 w’inyongera ni bwo Mamelodi Sundowns yabonye igitego cya mbere cyatsinzwe na Peter Shalulile ku mupira umuzamu yarutse maze atsinda igitego. 

Igice cya mbere cyarangiye Mamelodi Sundowns iri mbere n’igitego 1-0.

Mu gice cya kabiri Mamelodi Sundowns yakomeje gusatira cyane izamu rya Wydad AC. 

Ku munota wa 54 Mamelodi Sundowns yabonye igitego cya kabiri ku mupira myugariro wa Wydad AC yasubije inyuma maze ufatwa na Modiba Maphosa atsinda igitego arobye umuzamu.

Mu minota ya nyuma Wydad AC yagerageje  gusatira izamu rya Mamelodi Sundowns ishaka igitego kimwe ngo igaruke mu mukino ariko umuzamu Ronwin Williams ayibera ibamba.

Umukino warangiye Mamelodi Sundowns itsinze Wydad AC ibitego 2-0, mu mukino ibiri biba ibitego 3-2.

Mamelodi Sundowns yegukanye iri rushanwa ku nshuro ya mbere yahawe imidali, igikombe na cheque ya miliyoni 4 z’amadolari y’Amerika.

Umukinnyi mwiza na rutahizamu w’irushanwa yabaye Thapelo Maseko wa Mamelodi Sundowns, mu gihe umuzamu mwiza yabaye Ronwin Williams na we ukinira Mamelodi Sundowns.

Iri rushanwa rya African Football League ryasojwe kuri iki Cyumweru, ku nshuro ya mbere ryitabiriwe n’amakipe umunani yitwaye neza mu marushanwa ya CAF mu myaka icumi ishize ari yo Mamelodi Sundowns ( Afurika y’Efo), Wydad AC ( Morocco), Esperance de Tunis (Tunisia), AL Ahly (Egypt) , Petro de Luanda ( Angola),  Enyimba ( Nigeria) Simba Sports Club (Tanzania) na TP Mazembe ( DR Congo).

SHEMA IVAN

  • Imvaho Nshya
  • Ugushyingo 12, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE