Mali: Abarenga 70 bapfiriye mu kirombe cya Zahabu

  • ZIGAMA THEONESTE
  • Mutarama 25, 2024
  • Hashize amezi 4
Image

Abantu basaga 70 ni bo bamaze kubarurwa ko baguye mu mpanuka ikomeye y’ikorombe cya Zahabu cyabaridukiye ubwo barimo gucukura mu buryo butemewe n’amategeko.

Ni impamuka yabaye kuwa Gatanu w’icyumweru gishize ariko imibare y’abayiguyemo iragenda yiyongera, aho ubu habarurwa abarenga 70 bamaze gupfa, nk’uko ubuyobozi bwabitangaje kuri uyu wa Kane tariki ya 25 Mutarama 2024.

Hari ubwoba  bwinshi ko uwo mubare ukomeza kwiyongera.

Karim Berthé, Umuyobozi Mukuru ushinzwe ibyo mu nda y’Isi n’ubucukuzi bw’amabuye y’agaciro muri Mali, yemereye The Associated Press iby’iyi mpanuka ikomeye.

Bivugwa ko ubwo iyo mpanuka yabaga mu kirombe harimo abantu barenga 100, nk’uko Umuyobozi Mukuru w’Urwego rw’Ubucukuzi muri Mali Abdoulaye Pona yabitangaje.

Impamvu yateye uku kuriduka kw’ikirombe kwabereye mu Karere ka Kangaba, mu gace k’Amajyepfo y’Uburengerazuba bwa Koulikoro, iracyakorwaho iperereza.

Ni impanuka yatangajwe bwa mbere na Minisiteri ishinzwe Ubucukuzi bw’Amabuye y’Agaciro muri Mali ku wa Kabiri, aho yatangaje ko ari abantu bakora ubucukuzi bw’amabuye y’agaciro  benshi bayiguyemo.

Izo mpanuka ziteye ubwoba muri Mali zikunze kuhaba cyane, kikaba n’igihugu kiza ku mwanya wa 3 muri Afurika mu gucukura Zahubu nyinshi.

Ni impanuka ziterwa ahanini n’ubucukuzi butari ubwa kinyamwuga, kuba aho bakorera ari hato ndetse kandi n’ababukora bakabukora bihishe.

Berthé yagize ati: “Leta igomba gufata ingamba zo guhanga n’ubu bucukuzi bwa gakondo, mu kwirinda impanuka nk’izi ko zakongera kuba no mu gihe kiri imbere.”

Mu myaka ya vuba aha, ubwo bucukuzi bw’amabuye y’agaciro bwakunze guteza umutekano muke, aho imitwe y’ibyihebe iza iyakurikiye ikica abaturage by’umwihariko mu gice cyo mu majyaruguru ya Mali.

Ikigo gishinzwe ubucuruzi muri Leta Zunze Ubumwe z’Amerika cyemeza ko Zahabu ari ryo buye ry’agaciro ryinjiriza Mali amafaranga menshi mu yoherezwa hanze, aho mu mwaka wa 2021 yihariye 80% y’ibyo icyo gihugu cyohereje.

Icyo kigo kandi cyanavuze ko abarenga miliyoni 2 babarirwa bangana 10% by’abaturage ba Mali batunzwe n’ubucukuzi bw’amabuye y’agaciro.

Ubucukuzi bwa gakondo bwa zahabu butanga toni 30 za zahabu ku mwaka, bingana na 6% by’umusaruro mbumbe wa zahabu yose icukurwa muri Mali buri mwaka.

Imibare ya Minisiteri ishinzwe Mine muri Mali igaragaza ko icyo gihugu gitunze mu bubiko bwacyo toni zisaga 800 za Zahabu kandi gifite abaturage miliyoni 2 bari mu bucukuzi bwa Zahabu bakorera mu birombe 300 bikorerwamo ubucukuzi bwa gakondo.

  • ZIGAMA THEONESTE
  • Mutarama 25, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE