Loni yamaganye urwango nk’urwabaye mu Rwanda rwongeye gukangurwa

  • NTAWITONDA JEAN CLAUDE
  • Werurwe 24, 2024
  • Hashize ibyumweru 4
Image

Mu gihe Isi yose yitegura kwibuka ku nshuro ya 30 Jenoside yakorewe Abatutsi mu 1994, Umuryango w’Abibumbye wamaganye urwango, ubuhezanguni n’amacakubiri bikomeje gukangurwa mu bice bimwe na bimwe byo ku Isi.

Umunyamabanga Mukuru w’Umuryango w’Abibumbye António Guterres, yavuze ko ubunyamaswa bw’abantu bukomeje kuzurwa binyuze mu buhezanguni, amacakubiri n’urwango, amenyesha abashaka kwimakaza iyo myumvire ko ubutumwa bwumvikana bubagenewe ari uko ‘bitazongera kubaho ukundi.’

Mu gihe habura iminsi mike Abanyarwanda n’inshuti z’u Rwanda batangire icyumweru cy’Icyunamo n’iminsi 100 yo Kwibuka ku nshuro ya 30 Jenoside yakorewe Abatutsi, Guterres yagize ati: “Uyu munsi, ku Isi yose, ubushake bwijimye bwa kimuntu bukomeje gukangurwa n’amajwi y’ubuhezanguni, amacakubiri n’urwango. Ku bashaka kuducamo ibice, dukwiye gutanga ubutumwa bwihutirwa kandi bwumvikana tugira tuti: ntibizasubira ukundi.”

Yavuze ko Kwibuka 30 byibutsa ko umuzi karundura wa Jenoside ari urwango, cyane ko Jenoside yakorewe Abatutsi mu 1994 yahitanye abasaga miliyoni mu gihe cy’iminsi 100 gusa ifitanye isano ya bugufi n’urwango rwabibwe mu mitima y’Abanyarwanda mu myaka myinshi yabanje.

Yagize ati: “Urwo rwango rwakongejwe n’amakimbirane ashingiye ku moko yaseguwe n’igicucu cy’ubukoloni.”

Muri ubwo butumwa yatanze ku wa Gatanu tariki ya 22 Werurwe, butegura Umunsi Mpuzamahanga wahariwe kuzirikana Jenoside yakorewe Abatutsi ku wa 7 Mata  buri mwaka, Guterres yibukije ko iyo tariki n’iminsi 100 yayikurikiye mu 1994 mu Rwanda habaye amarorerwa akomeye aho Abanyarwanda basaga miliyoni bishwe na bagenzi babo.

Ati: “Imiryango yarashyamiranye, abari inshuti bahinduka abanzi, kandi umwuka mubi w’ubwicanyi bwateguwe ukwira igihugu cyose.”

Agaruka ku bubabare bw’abishwe muri Jenoside yakorewe Abatutsi mu 1994, Guterres yashimangiye ko bakwiye kwibukwa iteka ryose ndetse anaboneraho gushima ukwihangana no kwiyubaka kw’abarokotse.

Ati: “Ntituzigera twibagirwa abazize iyi Jenoside kandi ntituzibagirwa ubutwari no kwihangana kw’abarokotse, bagize imbaraga n’ubushake bwo kubabarira, bikaba urumuri n’icyizere byoroshya uburemere bw’ayo mateka ya muntu yijimye kurusha ayandi ku Isi.”

Guterres yasabye abatuye Isi ko mu gihe cyo kwibuka inzirakarengane zazize Jenoside yakorewe Abatutsi, bakwiye kwamagana bivuye inyuma urwango n’amacakubiri by’uburyo bwose.

Yashimangiye ko kugendera kure urwango n’amacakubiri ari bwo buryo bwonyine bwo guharanira ko Jenoside yatangiye ku ya 7 Mata 1994 mu Rwanda, nta handi yakongera gukorwa ku Isi yose.

  • NTAWITONDA JEAN CLAUDE
  • Werurwe 24, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE