Loni ihangayikishijwe cyane n’ibitero bya Isiraheli muri Gaza

  • NYIRANEZA JUDITH
  • Ukuboza 26, 2023
  • Hashize amezi 5
Image

Umuryango w’Abibumbye, Loni uhangayikishijwe n’uko Isiraheli ikomeje kugaba ibitero muri Gaza, abariyo bakaba babayeho mu buzima bubi.

Nk’uko byatangajwe kuri uyu wa Kabiri tariki ya 26 n’Umuvugizi w’Ishami ry’Umuryan go w’Abibumbye ryita ku burenganzira bwa Muntu Seif Magango, mu itangazo rigenewe abanyamakuru.

 Rigira riti: “Duhangayikishijwe cyane n’uko ingabo za Isiraheli zikomeje gutera ibisasu muri Gaza rwagati. […] Ibitero byose bigomba kubahiriza byimazeyo amahame y’amategeko mpuzamahanga arengera ikiremwamuntu, cyane cyane itandukaniro hagati y’abasivili n’abasirikare”.

Ni mu gihe kandi Minisitiri w’Ingabo wa Isiraheli ko nta kabuza igihugu cye kizakomeza intambara mu buryo bwose. Kuri uyu wa kabiri, tariki ya 26 Ukuboza,kandi  ingabo za Isiraheli zikomeje imirwano yabereye muri Gaza, nyuma yo gutangaza ku wa mbere ko igitero cyazo kigamije gusenya Hamas. Minisitiri w’Intebe wa Isiraheli, Benjamin Netanyahu, avuga ko amahoro azagerwaho ari uko ako gace kavanyweho intwaro.

Ibisasu bishya byarashwe n’ingabo za Isiraheli, inkambi y’impunzi ya Nur Shams, n’inzu zikikije ibitaro bya Nasser mu mujyi wa Khan Younes ni bo bibasiwe cyane.

Ibikorwa remezo by’itumanaho muri Gaza ntibikora nk’uko byatangajwe na kompanyi y’itumanaho muri Palesitina yitwa Patel kuri uyu wa Kabiri tariki 26 Ukuboza, bikaba ari ku nshuro ya kane bibaye kuva intambara yatangira hagati ya Isiraheli na Hamas ku ya 7 Ukwakira 2023.

Iyo sosiyete yagize iti: “Tubabajwe no gutangaza ihagarikwa ry’itumanaho rya serivisi n’itumanaho rya interineti […] mu karere ka Gaza kubera ko hakomeje kwibasirwa. Ni ibintu biteye akaga”.

Ku wa kabiri, tariki ya 26 Ukuboza, Ibiro ntaramakuru by’Abongereza Reuters, byashyize ahagaragara amafoto y’igisasu cyaturikiye mu mujyi wa Tulkram.

Nanone kandi Ikigo gishinzwe umutekano mu nyanja UKMTO cyatangaje ko hafi y’ubwato bwambukaga inyanja itukura, ibisasu byahumvikanye hanaboneka za misile.

UKMTO Iti: “Ibisasu byumvikanye ndetse na misile ziboneka hafi ya Hodeida, icyambu kiri mu burengerazuba bwa Yemeni kiyobowe n’inyeshyamba za Yemeni Houthi. Ubwo bwato n’abakozi bari bafite umutekano. Ikigo cyo mu Bwongereza cyo mu nyanja cyavuze ko mbere yo ku wa kabiri, ibindi bisasu bibiri byumvikanye hafi y’ubundi bwato ku nkombe za Hodeida. Ibyo bitero bikaba bitaravuzwe.

Isiraheli yishimiye icyemezo cy’u Buyapani cyo guhagarika umutungo wa bamwe mu bayobozi ba Hamas.

Mu butumwa bwashyizwe ku rubuga rwa Twitter mu kiyapani, Minisitiri w’ububanyi n’amahanga wa Isiraheli Eli Cohen yishimiye icyemezo cy’u Buyapani cyo guhagarika umutungo w’abayobozi batatu ba Hamas, Yahya Sinwar, Muhammad Deif na Marwan Isa. Eli Cohen yanditse ati: “Isiraheli yishimiye ubwitange bukomeye bw’u Buyapani mu kurwanya iterabwoba.”

Abaturage ba Gaza hafi ya bose bafite ikibazo cyo kwihaza mu biribwa. Mu gihe cy’ibyumweru bike, hafi abantu igice cya miliyoni bashobora kuba bibasiwe n’inzara.

Minisiteri y’Ubuzima ya Hamas yatangaje kuri uyu wa Kabiri, tariki ya 26 Ukuboza 2023, ko ibikorwa bya gisirikare bya Isiraheli mu karere ka Gaza byahitanye abantu 20 915 kuva intambara yatangira ku ya 7 Ukwakira 2023, abandi barenga 54 918 barakomereka.

Amakuru yatanzwe na Guverinoma ya Isiraheli avuga ko abantu 1 140 baguye mu gitero cya Hamas cyo ku ya 7 Ukwakira.  Ingabo za Isiraheli zavuze ko ku wa Kane zahitanye abarwanyi barenga 2 000 b’Abanyapalesitina kuva amasezerano yo guhagarika imirwano yarangira mu ntangiriro z’Ukuboza 2023.

  • NYIRANEZA JUDITH
  • Ukuboza 26, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE