Lionel Messi yegukanye Ballon d’Or ya munani yandika amateka

  • Imvaho Nshya
  • Ukwakira 31, 2023
  • Hashize amezi 4
Image

Rutahizamu w’Ikipe y’Igihugu ya Argentine na Inter Miami yo muri Leta zunze ubumwe za Amerika, Lionel Messi, yegukanye Ballon d’Or ya 2023 nyuma yo gutorwa nk’umukinnyi mwiza wahize abandi muri uyu mwaka mu bihembo bya France Football byatangiwe muri Théâtre du Châtelet i Paris ku mugoroba wo kuri uyu wa Mbere tariki 30 Ukwakira 2023.

Lionel Messi w’imyaka 36, yegukanye iki gihembo ku nshuro ya munani mu birori biryoheye amaso nyuma yo gutwara icya 2009, 2010, 2011, 2012, 2015, 2019 na 2021.

Iki gihembo yagihawe nyuma yo kugira amezi 12 meza aho yatwaye igikombe cy’Isi bwa mbere ari kumwe na Argentine mu Kuboza umwaka ushize wa 2022, muri iri rushanwa yabaye umukinyi mwiza waryo anaba umukinnyi wa kabiri watsinze ibitego byinshi aho yatsinze birindwi akurikirwa na Kylian Mbappé watsinze ibitego umunani.

Uyu mukinnyi wahoze muri Paris Saint-Germain muri 2022 yegukanye Ligue1 na Trophée des Champions nyuma yaho yatandukanye nayo muri iyi mpeshyi yerekeza muri inter Miami ayifasha kwegukana Leagues Cup kiba igikombe cya 42 atwaye kuva yatangira gukina umupira w’amaguru nk’umukinnyi wabagize umwuga muri 2004. 

Umukinnyi watwaye Ballon d’Or mu bagore yabaye Umunya-Espagne Aitana Bonmatí w’imyaka 25, akaba asanzwe akinira FC Barcelone yatwaye shampiyona, Champions League n’igikombe cy’Isi.

Aitana Bonmatí

Manchester City yabaye ikipe y’umwaka mu bagabo ku nshuro ya kabiri yikurikiranya mu gihe FC Barcelona yabaye ikipe y’umwaka mu bagore.

Umukinnyi ukiri muto yabaye Umwongereza Jude Bellingham ukinira Real Madrid.

Mu bindi bihembo byatanzwe, rutahizamu w’umwaka yabaye Erling Haaland ukinira Manchester City yo mu Bwongereza ibitego 56 mu marushanwa yose, umunyezamu mwiza yabaye umunya Argentine Emiliano Martinez wa Aston villa yo mu Bwongereza mu gihe umunya Brazil Vinicius JR yahawe igihembo cya Socrates kubera uruhare rwe mu kurwanya irondaruhu rikorerwa abakinnyi babirabura no guteza imbere uburezi muri Brazil.

Ballon d’Or ya 2023 ifite umwihariko ko kuva 2003 itarimo Cristiano Ronaldo uyifite inshuro eshanu wahanganye igihe kirekire na Lionel Messi mu myaka 20 ishize. 

Nyuma yo kwegukana iyi Ballon d’or Lionel Messi yavuze ko ayituye Maradona witabye Imana muri 2020 azize uburwayi.

Uko abakinnyi 5 bakurikiranye mu bagabo

1. Lionel Messi inter Miami na Argentina

2. Erling Haaland Man City na Norway

3. Kylian Mbappe PSG n’u Bufaransa

4. Kevin De Dryune Man City na Beligium

5. Rodri Man City na Espagne

SHEMA IVAN

  • Imvaho Nshya
  • Ukwakira 31, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE