Leta yihanganishije abagizweho ingaruka n’ubugizi bwa nabi muri Nyungwe

  • Imvaho Nshya
  • Kamena 19, 2022
  • Hashize imyaka 2
Image

Ku gicamunsi cyo ku wa Gatandatu, ni bwo inkuru y’inshamugongo yakwirakwiye nyuma y’aho abagizi ba nabi bitwaje intwaro bikekwa ko ari abo mu mutwe w’inyeshyamba we FLN bambutse umupaka banyuze mu ishyamba barashe ku modoka itwara abagenzi igeze mu Murenge wa Kitabi mu Karere ka Nyamagabe yerekezaga i Rusizi.

Bivugwa ko umushoferi n’umugenzi bahise bahasiga ubuzima mu gihe abandi batandatu bahise bajyanwa kuvurirwa ku bitaro bya Kigeme mu Karere ka Nyamagabe no ku Bitaro bikuru bya Kaminuza by’i Butare (CHUB) mu Karere ka Huye.

Kuri ubu batanu ni bo barimo kuvurirwa muri CHUB ndetse batangiye no koroherwa, mu gihe undi umwe we bivugwa ko yari yakomeretse bikomeye yoherejwe mu Bitaro Bikuru bya Kaminuza bya Kigali (CHUK).

Guverineri w’Intara y’Amajyepfo Kayitesi Alice, yasuye abarwariye muri CHUB abashyikiriza ubutumwa bw’abagize Guverinoma bubahumuriza no kubahamiriza ko abagize uruhare muri ubwo bugizi bwa nabi bazakurikiranwa abafashwe bagahanwa.

Nyuma yo kubasura yanaganirije abayobozi b’Inzego z’ibanze mu Mirenge ikora ku Ishyamba rya Nyungwe mu Karere ka Nyamagabe, abamenyesha ko bakwiye kugeza ubutumwa bwa Guverinoma ku baturage.

Yagize ati: “Ubutumwa dusaba ko bageza ku baturage ni uko Guverinoma y’u Rwanda yihanganisha imiryango y’abagiriye ikibazo muri buriya bugizi bwa nabi… Ikindi ni uko abakomeretse twabasuye bameze neza, barimo kwitabwaho n’abaganga. Ikindi ni ugukomeza kubwira abaturage binyuze muri aba bayobozi ko badakwiye gucikamo igikuba kuko umutekano w’Igihugu urarinzwe kandi neza, ndetse n’abakoze ubugizi bwa nabi barakomeza gukurikiranwa kandi abazafatwa bazahanwe n’amategeko.”

Yakomeje asaba abaturage gukomeza ibikorwa byabo by’iterambere, birinda guhungabanywa n’ibyabaye ku wa Gatandatu, aboneraho no gushimangira ko imiryango yabuze ababo ndetse n’abakomerekeyemo bakomeza gufashwa na Leta mu kubavuza ndetse no guherekeza abo babiri babuze ubuzima bwabo.

Abakomeretse barimo kwitabwaho barashimira Leta y’u Rwanda ihora yitaye ku buturage haba mu kubacungira umutekano ndetse n’igihe hari ugizweho ingaruka n’ubugizi bwa nabi agakurikiranwa mu maguru mashya.

Umwe muri bo yagize ati: “Batwitayeho, urusasu rwari rurimo barukuyemo. Icya mbere turashima Leta y’Ubumwe bw’Abanyarwanda, kubera ko ibyo yakoze igaragaje ko yita ku baturage cyane.”

Undi na we yabwiye RBA ati: “Bari kudufasha, ndaboba batwakiriye neza muri byose nta kibazo na kimwe twagize, kandi n’ikigo dukorera na cyo cyatubaye hafi.”

Abayobozi mu Nzego z’ibanze mu Mirenge ikora ku Ishyamba rya Nyungwe bongeye kwibutswa gukaza amarondo no gushyiraho ingamba zinyuranye zigamije kwicungira umutekano.

Ku ruhande rwabo bavuze ko abaturage baturiye Ishyamba rya Nyunwe bumva neza agaciro k’umutekano, bemeza ko bakomeza gukaza amarondo ndetse banasaba abaturage kujya batanga amakuru ku kintu cyose babona kidasanze cyangwa ku muntu bakeka ko ashobora guteza umutekano muke bigakumirwa bitaraba.

Polisi y’u Rwanda, ari na yo yahise ihagoboka ubwo abagizi ba nabi bari bakimara kugaba igitero ku modoka ihetse abagenzi, ivuga ko hakomeje igikorwa cyo gushakisha ababigizemo uruhare kugira ngo bagezwe imbere y’ubutabera.

  • Imvaho Nshya
  • Kamena 19, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE