Leta yatije ubutaka bw’Uturere 9 yongera imiyoboro y’Itumanaho 

  • ZIGAMA THEONESTE
  • Gashyantare 5, 2024
  • Hashize amezi 4
Image

Minisiteri y’Ibidukikije yatangaje ko yakodesheje ubutaka bwa Leta, isosiyete y’itumanaho izobereye mu kohereza umuyoboro wa fibre optique no gukwirakwiza ihuzanzira mu itumanaho (TRES Infrastructure Ltd), mu rwego rwo kongera imiyoboro y’itumanaho mu gihugu hose.

Ni itizwa ry’ubutaka bwa Leta, ryari mu myanzuro y’inama y’Abaminisitiri yashyizwe ahagaragara tariki ya 25 Mutarama 2024.

Iyo Kompanyi izakoresha ubutaka bwa Leta bwagenewe kwagura imiyoboro mu gihugu hose.

Dr Mujawamariya Jeanne d’Arc, Minisitiri w’Ibidukikije yatangarije The New Times ko ibibanza byagenewe kwagurirwamo imiyoboro, biherereye mu Turere twa Kamonyi, Nyanza, Muhanga, Ruhango, Nyamagabe, Musanze, Gakenke, Karongi, na Nyagatare.

Ati: “Kwagura imiyoboro y’itumanaho ni gahunda ya Guverinoma yiyemeje yo gutanga serivisi z’itumanaho zizewe kandi zujuje ubuziranenge ku baturage mu gihugu hose.”

Yavuze ko ishyirwaho ry’iminara muri utwo turere dutandukanye, rigamije kuziba icyuho cyari mu itumanaho no kugira uruhare mu iterambere rusange ry’igihugu.

Ni icyemezo cyafashwe nyuma y’aho hari abaturage bakunze kwinubira kubura ihuzanzira mu itumanaho, mu bice bimwe na bimwe by’igihugu.

Umwe mu baturage bo mu Karere ka Rubavu, Neza Rodriguez yagize: “Mu Karere ka Rubavu by’umwihariko mu Murenge wa Nyakiriba, tuhafite ikibazo cy’ihuzanzira mu itumanaho. Tugorwa no kubona interineti.”

Imanashimwe Peter, umuturage wo mu Murenge wa Jabana mu Karere ka Gasabo mu Mujyi wa Kigali yagize ati: “Tumaze imyaka 3 tudafite ihuzanzira mu itumanaho muri Bweramvura mu Murenge wa Jabana. Guhamagara, kohereza ubutumwa bugufi cyangwa gukoresha interineti ntabwo bigenda neza. Kugira ngo tubashe kubikora bidusaba kujya i Karuruma.”

Abaturage ba Nyakariro mu Karere ka Rwamagana ndetse n’abo mu Murenge wa Ruhuha mu Karere ka Bugesera na bo bakunze kwinubira kugira ihuzanzira mu itumanaho ricikagurika bituma bagorwa no gutumanaho  na telefone ngendanwa.

Mu mwaka wa 2021, Urwego rw’Igihugu rushinzwe inzego zimwe z’imirimo ifitiye igihugu akamaro (RURA), rwasabye kompanyi z’itumanaho gukemura ibibazo byose bigaragara mu itumanaho kubera ko abaturage bari bamaze imyaka myinshi bagaragaza ko guhamagara no gukoresha interineti bigoranye cyane.

Hakenewe iminara irenga 2000

Mu kwakira kwa 2023, Minisitiri w’Ikoranabuhanga na Inovasiyo Ingabire Paula yatangaje ko u Rwanda rukeneye iminara irenga ibihumbi 2 kugira ikibazo cy’ihuzanzira rya interineti mu gihugu hose gikemuke.

Kugeza ubu iminara igera ku bihumbi 2,800 yamaze gushingwa hirya no hino mu gihugu.

Minisitiri Paula yavuze ko hakenewe nibura miliyoni 30 z’amadolari y’Amerika (arenga miliyari 30 z’amafaranga y’u Rwanda) mu kwagura imiyoboro ya interineti kuri site 300 zatoranyijwe hirya no hino mu gihugu.

Ikigo gishinzwe ikoreshwa rya telefone ngendanwa ku Isi kigaragaza ko u Rwanda ruri ku kigero cya 61,5 by’ibikorwa remezo bikenewe ku gukwirakwiza interineti, mu gihe  abaturage 30.3 %  ari bo babona iyo interineti mu buryo bworoshye kandi buhendutse ndetse na 42.1% by’abaguzi bashobora kuyibona.

Kugeze ubu abaturage bashobora kugerwaho na interineti mu Rwanda hose ni 60.6%. Abakoresha telefone ngendanwa ni 81,4%.

  • ZIGAMA THEONESTE
  • Gashyantare 5, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE