Leta yateguriye ababyeyi integanyayigisho ku rushako no kurera 

  • KAMALIZA AGNES
  • Ukuboza 29, 2023
  • Hashize amezi 5
Image

Mu gihe abana bagaragaje icyifuzo cy’uko ababyeyi bahugurwa kuko ari bo batuma bagenzi babo baba inzererezi, Guverinoma y’u Rwanda yemeza ko yamaze gutegura integanyayigisho yihariye ihugura ababyeyi ku buryo bwiza bwo kurera. 

Ubwo hasozwaga Inama  y’Igihugu y’Abana kuri uyu wa 28 Ukuboza, mu Karere ka Burera, abana bagaragaje ko intandaro ya bamwe bishora mu ngeso mbi nk’ubuzererezi ahanini babiterwa n’ababyeyi babo batita ku nshingano zabo zo gutanga uburere bukwiye.

Aba bana basaba ko ababyeyi bahabwa amahugurwa yihariye bakigishwa kunoza inshingano zabo zo kurera bityo ko byatuma ibibazo by’abana b’inzererezi bigabanyuka.

Iyi nama Nkuru y’Iguhugu y’Abana  yateguwe n’Ikigo cy’Igihugu Gishinzwe Imikurire no Kurengera Umwana (NCDA) yateranye ku nshuro yayo ya 16, mu ntara y’Amajyaruguru,Akarere ka Burera,Umurenge wa Nkumba, ku nsanganyamatsiko igira iti,  ”Ejo Ni Njye”.

Bamwe mu bana bitabiriye iyi nama bagaragaje ko uburere buke butangwa n’ababyeyi n’ibibazo byo mu muryango ari byo bibatera kujya mu buzererezi, basaba ko ababyeyi bahabwa amahugurwa.

Ishimwe Lily ati: ”Akenshi tubona abana bishora mu ngeso mbi bari mu muhanda, barara muri ruhurura, aho usanga baba banywa n’ibiyobyabwenge. Ariko abenshi bajya mu muhanda kuko mu miryango yabo nta mahoro aba arimo kereka ababyeyi mubahaye amahugurwa nka gutya iyo dusoje amashuri batujayana mu itorero na bo bakigishwa.”

Manishimwe Vicent na we ati:”Twebwe iyo tubona aba bana baba mu mihanda kuko ni bagenzi bacu biratubabaza cyane. Ntibajya mu ishuri nk’abandi kandi kubera n’inzara no kutagira icyo bakora benshi muri bo bahinduka abajura bishoboka mwajya mwigisha ababyeyi babo bakamenya uko babaha uburere bwiza bakabajyana no mu ishuri.”

Ingabire Assoumpta, Umuyobozi Mukuru wa NCDA, yavuze  ko baha agaciro gakomeye ibitekerezo by’abana, haba hari  ibyo bifuza bibafitiye umumaro bakabikorerwa.

Ati: ”Abana bafite ibitekerezo kandi uyu ni umwanya mwiza kuko barisanzura bakavuga, batubwira ibibabangamira mu muryango kandi icyo bibafasha ni ukububakira ubushobozi.”

Yagarutse no ku bana bo mu muhanda, agaragaza ko kubakurayo bagasubira mu muryango bisaba kubanza gukemura ibibazo byari byabavanye iwabo. 

Yongeyeho ko hamwe n’imikoranire n’izindi nzego icyihutirwa ari ugukemura ikibazo mu mizi mbere y’uko bakura umwana mu muhanda.

Minisitiri w’Uburinganire n’Iterambere ry’Umuryango Dr Uwamariya Valentine, avuga ko kugeza ubu hateguwe integanyanyigisho zigenewe ababyeyi zijyanye n’uburyo bwiza bwo kurera.

At: ”Abana bagaragaje ko ibibazo byinshi biva mu muryango ndetse n’ababyeyi batamenya icyo gukora. Rero ubu hateguwe integanyanyigisho ebyiri, hari ijyanye n’uburyo bwo kurera hakaba n’ijyanye n’uburyo hubakwa urugo mu bashakanye, mu mibanire yabo. Igikurikiraho ni ukuzisakaza no kuzigisha kugirra ngo ababyeyi bose bazimenye.”

Inama y’Igihugu y’Abana yateraniye mu Kigo cy’Ubutore cya Nkumba, yitabiriwe n’abasaga 1600 baturutse mu Turere dutandukanye tw’Igihugu, ikaba yanarebeye hamwe imyanzuro yafashwe mu nama iheruka ya 15. 

  • KAMALIZA AGNES
  • Ukuboza 29, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE