Leta yatangiye guha abagore batwite inyongeramirire idasanzwe

  • ZIGAMA THEONESTE
  • Mutarama 18, 2024
  • Hashize ukwezi 1
Image

Minisiteri y’Ubuzima (MINISANTE) yatangije uburyo bushya bwo kurwanya igwingira ry’abana binyuze mu guha ababyeyi batwite ibinini byifitemo inyongeramirire ikomatanyije n’imyunyu ngungu na Vitamini zahurijwe hamwe (MMS) bibarinda  kuzabyara abana bagwingiye.

Ni gahunda yatangirijwe mu Karere ka Ngororero mu Ntara y’Iburengerazuba ku wa Gatatu tariki ya 17 Mutarama 2024, yitezweho gufasha u Rwanda mu guhangana n’ikibazo cy’igwingira ry’abana bari munsi y’imyaka itanu. 

Ubu buryo bw’inyongeramirire ikomatanyije bwitezweho gufasha Leta y’u Rwanda kugera ku ntego yihaye y’uko  mu mwaka wa 2025 izaba yagabanyije igwingira ry’abana bari munsi y’imyaka itanu rikagera munsi ya 19% rivuye kuri 33%, ikigero kiriho uyu munsi. 

Minisitiri w’Ubuzima Dr.Nsanzimana Sabin, yavuze ko ubu buryo bwo guha ababyeyi batwite inyongeramirire ikomatanyije (MMS) bufasha mu gukumira ibibazo bitera igwingira ry’abana hakiri kare.

Yagize ati: “Uburyo bw’inyongera mu kurwanya ikibazo cy’igwingira hatangwa inyongeramirire ku bagore batwite, tubaha ibyongera imyunyungungu na Vitamini zahurijwe hamwe zigera kuri 15, bityo haba ku mwana uzavuka bigabanya kuba yavuka atujuje ibiro cyangwa se akaba yavuka imburagihe, ndetse byanagiraga ingaruka nyinshi mu igwingira ry’abana.”

Minisitiri w’Ubuzima apima uburebure bw’umwana w’umukobwa

Ababyeyi batwite mu Karere ka Ngororero babwiye Imvaho Nshya ko ubu buryo buje kubafasha kurwanya igwingira.

Nyiransabimana Josiane yagize ati:“Tuzajya dukoresha ibi binini nk’uko babidusobanuriye, tuzajya tubikoresha kugira ngo twirinde igwingira”

Manirakiza Hycenta na we ati: “Batubwiye ko tugomba gukoresha ibyo binini kuko kubikoresha mbere y’imyaka ibiri ugatangira ugisama ari byo bituma turwanya igwingira.”

Nkusi Christophe, Umuyobozi w’Akarere ka Ngororero, avuga ko ingamba zo kurwanya igwingira bazikomeje nubwo hakiri imbogamizi, agahamya ko ubu buryo bwa (MMS) bwatangijwe buzakomeza kubafasha gukomeza kwita ku buzima bw’umubyeyi n’umwana by’umwihariko mu minsi igihumbi ya mbere. 

Yagize ati: “Iyi gahunda yo kurwanya igwingira iradufasha. Bimwe mu bibazo dukomeje guhangana na byo ni urugero rw’igwingira kuko imibare yo muri 2020 nkuko twabigaragarijwe n’ubushakashatsi bwakozwe ku buzima n’imibireho iri hejuru. 

Ni muri urwego twiyemeje guhangana na ryo binyuze muri gahunda zitandukanye, binyuze mu gukomeza gukura abaturage mu bukene, guteza imbere gahunda y’igi rimwe ku mwana buri munsi n’ibindi bikomoka ku matungo, dufasha abaturage mu bworozi bw’inkoko n’andi matungo magufi n’ibindi.”

Mu ngamba zo kurwanya igwingira mu  bana bato zashyizweho na Guverinoma y’u Rwanda, MINISANTE igaragaza ko zigenda zitanga umusaruro mu mezi atandatu ashize Akarere ka Ngororero kagabanyijeho 10% ku mibare y’igwingira ry’abana kari gafite.

Ubwo buryo bwiswe MMS bwatangijwe ni bushya ku Isi, u Rwanda rukaba mu bihugu bitatu muri Afurika butangirijwemo buzafasha guhangana n’igwingira hakiri kare.

Ku ikubitiro buzakoreshwa hatangwa ibinini ku bagore batwite mu Turere tw’Igihugu turindwi, twagaragayemo igwingira riri ku gipimo cyo hejuru kurusha utundi harimo n’aka Ngororero bwatangirijwemo.

  • ZIGAMA THEONESTE
  • Mutarama 18, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE