Leta yakebuye imiryango iha akato abafite ibibazo byo mu mutwe

  • Imvaho Nshya
  • Ugushyingo 1, 2023
  • Hashize amezi 7
Image

Minisiteri y’Ubuzima yakebuye abagize imiryango ibashishikariza kudaha akato abafite ibibazo byo mu mutwe, ahubwo igafata iya mbere mu kubafasha kugana ubuvuzi kuko byagaragaye ko abenshi iyo bitaweho hakiri kare bavurwa bagakira.

Ni mu gihe bamwe mu bafite ibibazo byo mu mutwe basaba Leta guhagurukira imwe mu miryango ikomeza guha akato abagaragaza ko bafite ibimenyetso by’indwara zo mu mutwe.

Ibi byagarutsweho ubwo hasozwaga Ukwezi kwahariwe kwita ku buzima bwo mu mutwe, mu muhango wabereye mu Karere ka Nyanza, Intara y’Amajyepfo ku wa Kabiri tariki ya 31 Ukwakira 2023.

Umuyobozi w’Umuryango w’Abarwaye indwara zo mu mutwe, Claver Haragiyimana, yavuze ko abafite ibibazo byo mu mutwe bakomeza gutereranwa kandi na bo ari abantu bakeneye kwitabwaho, akemeza ko ikibazo cy’abagaragaza ibimenyetso by’indwara zo mu mutwe bikwiye guhagurukirwa abagaragara bose mu mihanda bagafashwa kwivuza.

Yagize ati: “Bayobozi bacu rwose mudufashe kumvisha imiryango ifite abantu bagaragaza ibimenyetso by’indwara zo mu mutwe kuko turacyababona mu mihanda barateranwe n’imiryango yabo, kandi bitaweho byatuma na bo bagira ubuzima bwiza. Bityo rero reka tubivane mu magambo tugaragaze ibikorwa tugafasha abafite uburwayi bwo mu mutwe bakajyanwa kwa muganga kuko imodoka itwara ibisambo yanakoreshwa ijyana abarwayi kwa muganga”.

Nyirangendahimana Jeannette wemeza ko yatangiye kugira ibibazo byo mu mutwe afite imyaka 26, avuga ko ufite uburwayi bwo mu mutwe akira mu gihe yegerewe agafatwa neza akavuzwa, kuko na we yagize umuryango uramufata uramuvuza yongera kugira ubuzima buzira umuze anatangira gucuruza.

Yagize ati: “Njyewe nagize uburwayi mfite imyaka 26 gusa nitaweho ndavurwa ndakira, ariko turacyabona abarwayi birirwa bagenda mu mihanda barahawe akato kandi bitaweho bakavurwa, imiryango ikababa hafi, bongera kugira icyizere cy’ubuzima kuko baba bivuza kandi bakanywa imiti neza. Nanjye murabona ko nasubiranye ubuzima nkaba nacuruza mu isoko”.

Nyirangendahimana Jeannette wemeza ko hari abagikorerwa akato kubera ibibazo byo mu mutwe

Umukozi ushinzwe ibijyanye n’ubuzima bw’abana n’ababyeyi mu Ishami ry’Umuryango w’Abibumbye ryita ku Buzima (OMS) Dr Theopista John Kabuteni, avuga ko buri muntu wese akwiye kwisuzumisha indwara zo mu mutwe kuko zivurwa zigakira, anemeza ko umuryango mwiza udatererana umurwayi wawo, ahubwo umuba hafi, ukamuvuza kandi ukamukurikirana.

Yagize ati: “Buri muntu wese akwiye kwisuzumisha indwara zo mu mutwe kugira ngo amenye uko ubuzima bwe buhagaze, kandi izi ndwara ziravurwa zigakira ariko ntabwo umuryango mwiza ufite umurwayi wo mu mutwe umuha akato, ahubwo uramuvuza kandi ukamukurikira ubuzima bugakomeza ariko tunirinde kubaha akato”.

Umunyamabanga wa Leta muri Minisiteri y’Ubuzima Dr Butera Yvan, yashishikarije abagize imiryango kudaha akato abafite ibibazo byo mu mutwe ahubwo igafata iya mbere mu kubafasha kugana ubuvuzi. Avuga ko buri wese wumvise ubuzima butangiye guhinduka agomba kujya kwivuza indwara zo mu mutwe kuko zivurwa zigakira

Yagize ati: “Icyo twifuza ni uko buri wese wumvise ubuzima butagenda neza agomba kujya kwivuza kugira ngo nibasanga afite ikibazo cyo mu mutwe akurikiranwe kuko ziravurwa zigakira ariko kandi hari bimwe mu bitera izi ndwara harimo ikoreshwa ry’ibiyobyabwenge ndetse hakiyongeraho amakimbirane yo mu muryango; ariko turasaba imiryango irimo abagaragaza ibi bibazo ko bakwiye kubavuza bakirinda kubaha akato kuko birushaho kuba bibi”.

Yemeza ko Minisiteri y’Ubuzima izakomeza gufasha abakorana n’Inzego z’ubuzima mu guhugura Abajyanama b’Ubuzima n’abaganga kugira ngo bakomeze gufasha abafite ibibazo byo mu mutwe kandi turishimira intambwe tumaze gutera ariko turacyafite urugendo rurerure rwo kugenda kugira ngo tubashe kugera ku byo twifuza.

Ikigo cy’Igihugu cy’Ubuzima (RBC) giherutse gutangaza ko abagera kuri 24% bafite ibibazo byo mu mutwe, gusa Umuryango w’Abafite ubumuga bwo mu mutwe mu Rwanda (NOUSPR) uvuga ko abasaga ibihumbi 3700 bafata imiti nubwo imibare y’abarwayi itaramenyekana neza ari naho bahera basaba abantu kwisuzumisha.

Umunyamabanga wa Leta muri Minisiteri y’Ubuzima, Dr Butera Yvan avuga ko indwara zo mu mutwe zivurwa zigakira
Umuhanzi AM G The Black yasusurukije abari bitabiriye isozwa ry’Ukwezi kwahariwe ubuzima bwo mu mutwe
Umuyobozi mu Ishyirahamwe ry’abafite uburwayi bwo mu mutwe, Habiyaremye Claver, avuga ko buri wese abigize ibye nta murwayi wakongera kugaragara ku muhanda

AKIMANA JEAN DE DIEU

  • Imvaho Nshya
  • Ugushyingo 1, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE