Leta yakebuye abahingira n’abororera isoko bakiyibagirwa

  • Imvaho Nshya
  • Nzeri 17, 2023
  • Hashize amezi 8
Image

Mu gihe imibare igaragaza ko hejuru ya 70% by’abaturage b’u Rwanda biganje mu byaro batunzwe no gukora ubuhinzi n’ubworozi, igwingira ntiryakabaye ikibazo ukurikije n’uburyo u Rwanda ruri mu gace k’Isi gafite ikirere gishobora kwera mu gihe cy’umwaka wose.

Impuguke mu by’ubuzima zigaragaza ko kimwe mu bituma mu Rwanda hakigaragara abana bagwingiye, ari imyumvire ikiri hasi irimo no kuba bamwe  mu bahinzi n’aborozi bakunda amafaranga kuruta kwita ku buzima bwabo, aho umusaruro w’ubuhinzi n’ubworozi bawujyana ku isoko bo bakiyibagirwa.  

Ni muri urwo rwego Leta y’u Rwanda ibinyujije mu Kigo cy’Igihugu gishinzwe Imikurire no Kurengera Umwana (NCDA) yifatanyije na Minisiteri y’Ubuhinzi n’Ubworozi n’Imiryango Itegamiye kuri Leta, mu gutangiza ubukangurambaga bukangurira abaturage kurya indyo yuzuye cyane cyane barya amagi kuko ahendutse kandi afite intungamubiri nyinshi.

Imibare y’Ubushakashatsi bwa gatandatu ku mibereho y’Abaturage n’Ubuzima (RDHC) bwa 2019/2020, yatangajwe n’Ikigo cy’Igihugu cy’Ibarurishamibare mu Rwanda (NISR), igaragaza ko 33% by’abana bari munsi y’imyaka 6 bagwingira kubera kutagaburirwa indyo yuzuye.

Ni mu gihe indyo yuzuye abana baba bakeneye iboneka ahantu hose mu Rwanda, uhereye ku magi, amata, inyama, amafi, imboga n’imbuto bikize kuri vitamin A, ibinyamafu, ibinyampeke n’ibibikomokaho.

Ku wa Kane tariki ya 14 Nzeri, ni bwo mu Murenge wa Gatumba mu Karere ka Ngororero, hatangirijwe ubwo bukangurambaga bushishikariza abaturage kureka kwiyibagirwa mu musaruro w’ubuhinzi n’ubworozi, bafata ibyo kurya bituruka ku matungo bibanda ku magi aboneka ahantu hose mu Gihugu.

Ni ubukangurambaga bwibanze ku gutanga ibisubizo bikemura imyumvire idahwitse abantu banyuranye bagira ku magi harimo kuba bamwe bavuga ko ari ay’abantu bakize, ahenze cyangwa ko agenewe kuribwa igihe umuntu yarwaye kugira ngo akire vuba.

Hari n’abandi bakeka ko amagi agenewe kugurishwa gusa, ku buryo iyo inkoko iyateye mu miryango imwe n’imwe yo mu cyaro, bahita bayajyana ku isoko bakibagirwa ko na bo bayakeneye cyane mu kurandura imirire mibi n’ikibazo cy’igwingira.

By’umwihariko ubwo bukangurambaga bugamije kwimakaza kurya amagi, ariko rikajyana no guharanira ko ayo magi aboneka ahantu hose kandi ku giciro gihendukiye buri wese.

Abakinnyi n’Urunana batambukije ikinamico yagarutse ku myitwarire y’abaturage benshi, himakazwa kubashishikariza kuyarya inshuro nyinshi zishoboka mu cyumweru, korora inkoko mu miryango inyuranye no gukuraho inzitizi zituma abantu benshi banga kurya amagi no kuyagaburira abana babo.

Ubwo bukangurambaga buhuriwemo na Minisiteri y’Ubuhinzi n’Ubworozi (MINAGRI) ibinyujije mu Kigo gishinzwe Amakuru y’Ubuhinzi (CICA), NCDA, Umushinga Orora Wihaze uterwa inkunga na USAID, Ihuriro ry’Aborozi b’Inkoko mu Rwanda, Umuryango Sight and Life n’abandi bafatanyabikorwa banyuranye.

Abana bato bagaburiwe indyo yuzuye yateguwe mu biribwa biboneka hose mu Rwanda
ABakinnyi b’Urunana banyujijeho umukino ushishikariza abaturage korora inkoko no kurya amagi
  • Imvaho Nshya
  • Nzeri 17, 2023
  • Hashize amezi 8
TANGA IGITEKEREZO
Sam says:
Nzeri 17, 2023 at 1:56 pm

Abanyarwanda dukwiye kugira imyumvire ituganisha ku kwimakaza imirire myiza kugeza turanduye burundu ikibazo cy’igwingira mu bana b’u Rwanda. Imiririre myiza kuri bose itangirira kuri njye!
#Turandurigwingira
#OneEggPerChildEveryDay

Andika igitekerezo

AMATEGEKO AGENGA IYANDIKA RY'IGITEKEREZO CYAWE