Leta imaze gushora miliyari 20 Frw mu bwishingizi bw’amatungo

  • ZIGAMA THEONESTE
  • Mutarama 19, 2024
  • Hashize ukwezi 1
Image

Ikigo cy’Igihugu gishinzwe Iterambere ry’Ubuhinzi n’Ubworozi (RAB) cyatangaje ko muri gahunda yo guteza imbere ubworozi bwishingiwe, Leta y’u Rwanda yateye inkunga imishinga y’ubwishingizi bw’amatungo ishoramo agera kuri miliyari 20 z’amafaranga y’u Rwanda.

Ubusanzwe mu gutanga ubwishingizi bw’amatungo, Leta yishyurira 40% umworozi ushaka ubwishingizi bw’amatungo ye, asigaye 60% y’ikiguzi cy’ubwishingizi akayitangira.

Imwe mu myanzuro yafatiwe mu Nama y’Igihugu y’Umushyikirano, iheruka harimo koroshya kubona inguzanyo zo guteza imbere ibikorwa by’ubuhinzi n’ubworozi, gufasha aborozi n’abahinzi kongera umusaruro no kubashishikariza gufata ubwishingizi bw’amatungo cyangwa ubw’ibihingwa nka kimwe mu byafasha mu guhangana n’ibibazo bijya byugariza uru rwego.

Dr. Uwituze Solange, Umuyobozi Mukuru Wungirije ushinzwe ubworozi muri RAB, mu kiganiro aheruka kugirana na RBA yavuze ko kuva Inama y’Umushyikirano iheruka yaba hamaze gushyirwa imbaraga mu gushishikariza aborozi kwishingira amatungo yabo.

Ati: “Mu nama nyinshi tugirana na za Banki baravuga bati twe ducuruza amafaranga y’abantu ntabwo rero twajya ahantu hakiri ibibazo (mu rwego rw’ubuhinzi n’ubworozi), ni yo mpamvu byari ngombwa, gushishikariza abantu kujya mu bwishingizi bw’amatungo. Kuko iyo amatungo yawe cyangwa imirima yishingiwe nibura ibafasha kubona ingwate ku ijanisha runaka Banki zigenderaho.”

Dr. Uwituze kandi anavuga ko Leta y’u Rwanda yakomeje gushyira imbaraga mu gushyigikira gahunda y’ubwishingizi bw’amatungo aho yashyizemo miliyari 20 Frw.

Ati: “Twabashije gutanga miliyari 3,260 z’amafaranga yagiye mu nguzanyo yunganiwe; ni inganzuzo ya 8% yahawe abahinzi n’aborozi 262. Muri ayo hafi kimwe cya kabiri cy’ayo kingana na miliyari imwe n’ibihumbi 600 yashyizwe mu borozi 83.”

Nyuma y’ingaruka z’icyorezo cya COVID-19, Leta y’u Rwanda yashyizeho ikigega nzahurabukungu (Economic Recovery Fund) mu byasabwaga kugira ngo umuntu yunganirwe nk’uwikorera byasabaga ko agaragaza ko yahombye 50% by’ibyo yungukaga.

RAB ivuga ko mu kugira ngo aborozi babashe kugaragaza igihombo batewe na COVID-19, bitabakundiye kuko abenshi muri bo imishinga yabo ntaho iba yanditse.

Dr Uwituze ati: “Abakora ubuhinzi n’ubworozi usanga imishinga yabo iba itanditse, rero binyuze muri Enabel, twaravuze tuti reka dutangirane n’aborozi urugendo rwo kwiga no kumenyera kwandika ibyo bakora, abone igishobora kumufasha kumenya ngo nahombye, nungutse ariko byandikwe.”

RAB ihamya ko mu gihe aborozi bazaba bamaze kumenyera kwandika ibyo bakora bizoroshya uburyo bwo kwaka inguzanyo kuko Banki zizaba zishobora gusuzuma ibyo umworozi akora binyuze mu nyandiko yabikoreye bityo kubaha inguzanyo bikoroha.

Kugeza ubu, hishingirwa amatungo arimo inka, ingurube n’inkoko.

RAB ivuga ko bitarenze ukwezi kwa Nyakanga 2024, abarozi b’amafi na bo bazagerwaho na gahunda y’ubwishingizi bw’amatungo yabo.

  • ZIGAMA THEONESTE
  • Mutarama 19, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE