Kwihaza mu biribwa biracyari kuri 79,4%: Inama ihabwa Abanyarwanda

  • Imvaho Nshya
  • Ugushyingo 2, 2023
  • Hashize amezi 4
Image

Abatuye Isi bagenda biyongera ari na ko bashakisha uburyo ibibatunga byiyongera, bikaba bisaba guhinga kinyamwuga kandi hakabaho kuboneza urubyaro. Bityo mu Rwanda abihaza mu biribwa bageze kuri 79,4%, akaba ari yo mpamvu Leta ikora ibishoboka byose ngo hongerwe umusaruro w’ibibatunga.

Kurandura ubukene no kwihaza mu biribwa abatuye Isi ubu barenga Miliyari 8 bisaba gukoresha tekiniki zigezweho ngo ubuhinzi butange umusaruro mwinshi abantu babone ibibatunga.

Inzobere mu buhinzi kandi akaba Umuyobozi Mukuru muri Mnisiteri y’Ubuhinzi ushinzwe kuvugurura ubuhinzi Dr Karangwa Patrick, yasobanuye kwihaza mu biribwa icyo ari cyo.

Ati: “Iyo tuvuze kwihaza mu biribwa, ubushakashatsi bwakozwe n’Ikigo cy’Igihugu cy’Ibarurishamibare mu 2020 bwagaragaje ko Abanyarwanda bihaza mu biribwa ku kigero cya 79,4%, ababuraho ni abatihagije mu biribwa bangana na 20,6%.

Kwihaza mu biribwa, nk’uko bisobanurwa n’Ishami ry’Umuryango w’Abibumbye ryita ku Buhinzi (FAO), bishingira ku bintu 4 ari byo kuba ibiribwa bihari, kubasha kubigeraho, kuba bihari ku buryo buhoraho n’uko bikoreshwa.

Yongeyeho kandi ko kwihaza mu biribwa bivuze ibikwiye kuba bitunga umuntu birimo ibitera imbaraga, ibyubaka umuburi n’ibiwurinda indwara.

Yagize ati: “Si ibintu bihora hamwe, birahinduka, urebye ni ibikwiye kuba bitunga umubiri biwubaka, biwuha imbaraga ndetse n’ibiwurinda indwara. […] urebye hari ibigenda bishyirwamo imbaraga ngo abantu bihaze mu biribwa. 20,6% ni ukuvuga ko biba bidahagije ariko si uko mu buzima bwabo bwose ari ko biba bimeze”.

Starton Habyalimana, impuguke mu bukungu, we yagarutse ku buryo ubwiyongere bw’abaturage bwajyana no kwihaza mu biribwa ndetse ko binagira aho bihurira n’ubukungu.

Ati: “Ushobora kuba wariye, ariko wariye nabi ubwo ntukora neza. Icyo gihe n’ubukungu birumvikana ko bifite aho bihuriye. Ibihugu bikennye cyane ni nabyo biba bifite abaturage bakennye”.

Dr Kabano H. Ignace wigisha muri Kaminuza, asobanura ko kwiyongera kw’abaturage bizamo ihurizo kuko hagendewe ku bipimo hari ibihugu bimwe bifite abaturage bake cyangwa bigana mu kubabura.

Yagize ati: “Abatabafite bafashe icyerekezo cyo gushyira imbere ukwikunda, aho igisekuru cyashatse kubaho neza cyane ntibabyare, kuri ubu bashakisha abajya guturayo nko muri Amerika hifashishijwe Green Card, Canada na yo yabihagurukiye”.

Yakomeje agaragaza ko ubwiyongere bukiri mu bihugu biri mu nzira y’amajyambere bituruka cyane cyane ku miyoborere, ati: “Simvuga ngo Leta izashyiraho icyuma gipima ngo ubyare, ariko imyumvire ikiri hasi y’abaturage bisaba ko ubuyobozi bushyiraho icyerekezo cyo kubaha amakuru bakagana mu nzira yo kuboneza urubyaro.”

Hagarutswe ku mpamvu eshatu muri iki gihe zugarije Isi zituma abantu batihaza mu biribwa uko bikwiye harimo amakimbirane ateza intambara ikavana abaturage hamwe ikabarunda aho badafite uko babaho, badashobora kugera ku mibereho bakeneye. Nk’ubu intambara y’u Burusiya na Ukraine hari byinshi yabangamiye ku rwego rw’Isi.

Ikindi ni imihindagurikire y’ibihe, aho ibiza byimura abaturage ugasanga ibihugu byatangaga inkunga y’ibiribwa ku Isi ntibyorohewe, ibibazo byabaye byinshi. Akenshi iyo havuyemo amapfa, haza imyuzure hakazaho na COVID-19 yateje ibibazo ku mibereho ya muntu.

Mu gushakisha ibisubizo ngo abantu bihaze mu biribwa, hagenda havugururwa tekiniki mu buhinzi bugakorwa kinyamwuga, harimo gukoresha imbuto nziza, inyongeramusaruro, kuhira no korohereza abanhinzi n’aborozi binyuze muri gahunda ya Nkunganire n’ibindi.

Ikindi kuba ubwiyongere bw’abaturage butajyanye n’ubuhinzi ngo abantu bihaze mu biribwa, iterambere ntiryashingira ku buhinzi gusa, ni na yo mpamvu harimo gushishikariza abantu gukora ubuhinzi kinyamwuga bakeza ibiribwa bihagije aho guhingira amaramuko.

Ibyo ngo byaranatangiye kuko hari Ihuriro ry’urubyiruko rukora ubuhinzi (RYAF), abandi bakigishwa imyuga bityo hakabaho indi mirimo yatuma abantu babaho.

Ibi byagarutsweho mu kiganiro cyibanze ku cyakorwa ngo ubwiyongere bw’abatuye Isi bujyane no kwihaza mu biribwa cyatambutse kuri Radiyo Rwanda.

Abatuye Isi ubu barenga Miliyari 8, muri bo 10/100 bafite ibibazo by’inzara.

NYIRANEZA JUDITH

  • Imvaho Nshya
  • Ugushyingo 2, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE