Kwiga TVT ni amahitamo meza aganisha ku kwiteza imbere

  • NYIRANEZA JUDITH
  • Mutarama 13, 2024
  • Hashize amezi 4
Image

Kwiga imyuga n’ubumenyingiro si ukubura uko umuntu agira cyangwa se ngo bibe bisaba abatari abahanga, ahubwo ni umuyoboro wo kwiteza imbere umuntu ku giti cye ndetse n’igihugu muri rusange.

Ubu butumwa bwagarutsweho na Minisitiri w’Uburezi, Twagirayezu Gaspard ubwo yasuraga bimwe mu bigo by’amashuri mu Karere ka Rubavu, yibutsa abanyeshuri ko kwiga imyuga ari amahitamo meza agamije kubafasha kwiteza imbere, abasaba gukomeza kwiga neza bashyizeho umwete.

Yagize ati: “Banyeshuri murasabwa kwiga neza no gukomera ku ndangagaciro. By’umwihariko, kwiga TVT ni amahitamo meza mu rwego rwo kwiteza imbere no guteza imbere igihugu muri rusange, kuko imyuga yagaragajwe nk’inzira yo kwivana mu bukene no kubona akazi byihuse”.

Minisitiri Twagirayezu yanageneye abarimu ubutumwa abayobozi b’amashuri n’abarimu bwibanze cyane ku gushima ubwitange bwabo mu guteza imbere ireme ry’uburezi no gukomeza kurerera u Rwanda.

Ari kumwe na Visi Meya ushinzwe imibereho myiza mu Karere ka Rubavu  Ishimwe Pacifique n’abandi bayobozi batandukanye, basuye amashuri 4 yo muri ako Karere bareba ibijyanye n’imyigire n’imyigishirize, n’uko itangira ry’igihembwe cya 2 ryagenze.

Minisitiri Twagirayezu yasabye abana kwigana umwete

Amashuri 4 yasuwe ni TTC Gacuba II, ishuri nderabarezi rimaze gutanga impamyabumenyi 3020 kuva mu 1999; ETAG akaba ari ishuri ryigisha ubukanishi bw’imodoka; Groupe Scolaire Rambo na Rubavu Technical College, ryigisha imyuga itandukanye.

Uruzinduko Minisitiri Twagirayezu yagiriye muri amwe mu mashuri yo mu Ntara y’Iburengerazuba mu Karere ka Rubavu rwatangiye tariki 10 Mutarama 2024.

Intego ya Leta yihaye y’uburezi bushingiye ku myuga, tekiniki n’ubumenyingiro, ni uko mu mwaka wa 2024, nibura abagera kuri 60% by’abanyeshuri biga mu mashuri yisumbuye bazaba biga mu mashuri y’imyuga.

Minisitiri yashimiye abagira uruhare mu burezi ubwitange bagaragaza
  • NYIRANEZA JUDITH
  • Mutarama 13, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE