Kwibuka28: Umujyi wa Kigali wibutse abari abakozi ba Perefegitura, bashima ubutwari bw’Inkotanyi

  • NTAWITONDA JEAN CLAUDE
  • Gicurasi 7, 2022
  • Hashize imyaka 2
Image

Ubuyobozi bw’Umujyi wa Kigali n’abakozi bawo bibutse abari abakozi ba Perefegitura ya Kigali bazize Jenoside yakorewe Abatutsi mu 1994.

Ni gahunda yabaye ku mugoroba wo kuri uyu wa Gatanu tariki 06 Gicurasi 2022, yitabirwa n’inzego zitandukanye ndetse n’imiryango ifite ababo bari abakozi ba Perefegitura ya Kigali bazize Jenoside yakorewe Abatutsi.

Umujyi wa Kigali wibuka abari abakozi ba Perefegitura y’Umujyi wa Kigali 47 bishwe bazira kuba ari Abatutsi.

Kwibuka abari abakozi ba Perefegitura y’Umujyi wa Kigali byabanjirijwe no kunamira ndetse no gushyira indabo ku rwibutso rwa Jenoside rwa Kigali ruri ku Gisozi.

Minisitiri w’ibikorwa remezo Dr Nsabimana Erneste wari umushyitsi mukuru muri gahunda yo kwibuka ku nshuro ya 28 Jenoside yakorewe Abatutsi, yagaragaje ko Abanyarwanda bakomba kwibuka.

Minisitiri Dr Nsabimana Erneste yavuze ko kwibuka bigomba kuba ubuzima bw’Abanyarwanda kugira ngo ibyabaye bitazongera kuba

Ati “Tugomba kwibuka, kwibuka ni urugendo tugomba kubamo nk’ubuzima bwacu, kwibuka ni byo bitumye tugeze ahangaha.

Iyo hatabaho kwibuka hari byinshi mu bimenyetso byari gusibanganywa, iyo utibutse uheranwa n’agahinda kandi ntabwo tugomba guhera muri buno buzima, ni yo mpamvu habaho kwibuka”.

Asaba ko urubyiruko gukomeza kwigishwa amateka ya Jenoside yakorewe Abatutsi, rugasura inzibutso, ayo mateka yose abantu bakayasobanukirwa cyane cyane urubyiruko kugira ngo rugire imyumvire yo kurwana n’abayihakana.

Abanyarwanda bunze ubumwe kuko ari yo inzira bahisemo nk’Abanyarwanda, kuba umunyarwanda umwe ni ugukomeza kubaka igihugu cyabo.  

Nkuranga Egide, Perezida w’Umuryango uharanira inyungu z’abacitse ku icumu rya Jenoside yakorewe Abatutsi, IBUKA, avuga ko kwibuka abantu bari hamwe bifasha mu gusangira amateka.

Perezida wa Ibuka, Nkuranga Egide, yashimye Inkotanyi zahagaritse Jenoside yakorewe Abatutsi

Yasabye abagifite ingengabitekezo ya Jenoside ko bahinduka kuko ukuri kutazatsindwa.

Ashimira Inkotanyi zarokoye Abatutsi bicwaga mu 1994 agashimira Inkotanyi zayihagaritse.

Ati “Leta yatwitayeho, Jenoside igihagarikwa mu 1994 hari ibibazo byinshi cyane ariko ubu nimurebe uko Umujyi umeze mugereranye n’icyo gihe.

Ni yo mpamvu nshimira cyane Nyakubahwa Perezida wa Repubulika Paul Kagame. Muri icyo gihe abantu bari bababaye pe! Abandi bahunga nyuma y’ibyo bari bamaze gukora”.

Avuga ko icyakurikiyeho ko cyari ukubaka igihugu no kubaka abacitse ku icumu no kubaka umunyarwanda muri rusange.

Kagitare Assia uhagarariye abarokotse bo mu miryango y’abari abakozi ba Perefegitura y’Umujyi wa Kigali yashimye ubuyobozi bw’Umujyi wa Kigali kuba bugira umwanya wo kwibuka abari abakozi bawo.

Anashimira Inkotanyi zahagaritse Jenoside yakorewe Abatutsi agaragaza ko byatumye ntabapfira gushira.

Akomeza agira ati “Ndashimira Inkotanyi, iyo zitaza kubaho nta n’umwe warikurokoka hano. Tumeze neza turi aho (turi amahoro)”.

Mu buhamya bwa Rugero Paulin, umuturage w’Umujyi wa Kigali warokotse Jenoside yakorewe Abatutsi agaragaza uko Abatutsi bahizwe bakicwa nabi hirya no hino mu Mujyi wa Kigali ndetse n’uburyo Ingabo za RPF Inkotanyi zarokoye abari bagihumeka.

Uwamahoro Fabien, umukozi mu ishami rishinzwe kwibuka no gukumira Jenoside muri MINUBUMWE yatanze ikiganiro ‘Twahisemo kuba umwe’asaba abitabiriye gahunda zo kwibuka, gukumira ibyaha by’ingengabitekerezo ya Jenoside.

Avuga ko hari ibyaha bifitanye isano n’ingengabitekerezo ya Jenoside twibutswa buri gihe ko dukwiriye gukumira.

Icya mbere ni uguhakana Jenoside, gupfobya Jenoside no guha ishingiro Jenoside.

Ati “Muri iyi minsi hari abantu baha ishingiro Jenoside, nk’abavuga ngo kuba Abatutsi barishwe nuko hari abohereje abana babo mu Nkotanyi gufatanya na zo hanyuma bituma bicwa”.

Ahamya ko ibyo ari uguha ishingiro Jenoside kandi ko ari icyaha gikomeye.

Akomeza agira ati “Kuzimiza cyangwa gutesha agaciro ibimenyetso n’amakuru bya Jenoside, kwiba cyangwa kwangiza imibiri y’abazize Jenoside, gusenya, konona, gutesha agaciro urwibutso rwa Jenoside cyangwa ahashyinguye imibiri y’abazize Jenoside no guhohotera uwacitse ku icumu rya Jenoside, ibi ni ibigize ibyaha by’ingengabitekerezo ya Jenoside, Abanyarwanda bose bashishikarizwa kwirinda igihe cyose”.

Rubingisa Pudence, Meya w’Umujyi wa Kigali, yagaragaje ko abari abakozi b’Umujyi wa Kigali bari bafite imigambi y’iterambere kandi bafite umwete wo gukorera igihugu ariko bakicwa rubi kubera ubuyobozi bubi.

Meya w’Umujyi wa Kigali Rubingisa Pudence, yavuze ko abari abakozi ba Perefegitura y’Umujyi wa Kigali bazize Jenoside yakorewe Abatutsi batazabibagirwa

Ati “Kubibuka ni igihamya ko bitazongera”.

Akomeza kandi avuga ati “Abari abakozi ba Perefegitura y’Umujyi wa Kigali twibuka none, bari mu nshingano zitandukanye nk’abaveterineri, abashinzwe imibereho myiza, abashoferi, ba burugumesitiri, abapolisi, abashinzwe imari n’abandi. Tuzahora tubikuka”.

Gahunda yo kwibuka ku nshuro ya 28 Jenoside yakorewe Abatutsi mu cyahoze ari Perefegitura y’Umujyi wa Kigali, yitabiriwe n’abo mu nzego za Leta batandukanye
Abafite ababo bari abakozi ba Perefegitura y’Umujyi wa Kigali bifatanije n’ubuyobozi bw’Umujyi kwibuka abazize Jenoside yakorewe Abatutsi
  • NTAWITONDA JEAN CLAUDE
  • Gicurasi 7, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE