Kwibuka ku Munyarwanda ni umurage wo kudaheranwa n’agahinda

  • NTAWITONDA JEAN CLAUDE
  • Mata 7, 2022
  • Hashize imyaka 2
Image

Kwibuka Jenoside yakorewe Abatutsi mu 1994 bikwiye kuba umurage wo kudaheranwa n’agahinda ahubwo ko ari umwanya wo gutekereza uruhare rwa buri wese yagira mu kubaka Igihugu.

Byagarutsweho mu kiganiro cyatambutse kuri Televiziyo y’u Rwanda kuri uyu wa Kane tariki 7 Mata 2022, ku nsanganyamatsiko igira iti ‘Kwibuka Umurage w’ubudaherwana ku Rwanda’.

Depite Muhongayire Christine yavuze ko Kwibuka ari ibihe bikomeye ku Banyarwanda by’umwihariko ku bacitse ku icumu rya Jenoside.

Kwibuka Jenoside yakorewe Abatutsi mu 1994, by’umwihariko byibutsa abayirokotse amateka banyuzemo, mu by’ukuri bikaba ishingiro ryo kumva ko badakwiye guheranwa nayo, ahubwo hakwiye ‘Kwibuka Twiyubaka’.

Ati: “Umuntu iyo avuze kudaheranwa aba avuga ikintu gikomeye cyane cyamubayeho cyagombaga ubundi kuba cyamuherana, ariko we akacyanga, akanga guherayo.”

Yakomoje ku mateka y’u Rwanda aho mbere y’abakoloni Abanyarwanda bari bameze neza, ariko mu 1959, aho abakoloni bari batangiye kuzana urwango mu Banyarwanda hashingwa amashyaka ashingiye ku moko arimo urwango n’ubugome, batangira kwanganisha Abanyarwanda kugeza ku rwego rwo kumva Umututsi ari icyaha, agiye kuba ikibazo mu Rwanda.

Yakomeje avuga ko byaje kugera mu 1959 noneho bafata umwanzuro wo kubica n’urokotse agahunga, urokotse bakamusyigingiza se nk’uko hariho itegeko rimwe ryabivugaga ngo musyigingize Abatutsi, kubiba urwango byakomeje kugenda byigishwa, rukomeza kwigishwa mu Banyarwanda, rukomeza gukura rwumvisha ko Umututsi atari umuntu, ari umuntu ugomba kwicwa.

Byarakomeje baricwa mu 1962- 1963, nabwo Abatusi barabica [….] ariko ntibyitabwaho, Isi isa nibyihoreye. Mu 1973, nabwo Abatutsi baricwa abari mu mashuri, abandi barahunga, abari mu mirimo barirukanwa, abandi barameneshwa birakomera.

Mukarugwiza Judith

Murebwayire ati: “Urwo rwango rwakomeje kuzamuka guhera iyo myaka yose, biza rero noneho kugera mu 1994, Interahamwe zaratojwe, gutegura Jenoside byose babyujuje, intwaro bazizanye, bamaze gushyiraho amalisiti yo kwica abantu. Bamaze gukora byose ku buryo Jenoside bari buyikore kandi igakunda. Muranabyibuka ko bageze aho  nka Bagosora akavuga ngo twebwe turimo turategura imperuka y’Abatutsi. Ibyo byose byari ibintu bikwereka ko Jenoside yarimo itegurwa, nubwo yari yaragiye igeragezwa hose ikorwa mu bihe byashize ariko bigeze mu 1994, Jenoside iba ibaye karundura, kabutindi.”

Muhongayire yavuze ko Abatutsi bahigwaga bishwe nabi nta kirengera, bakicwa na banyirarume, ba nyinawabo, ababyeyi babo.

Yashimiye Inkotanyi zahagaritse Jenoside ashima Perezida Kagame wari uzirangaje imbere, ashima kuba bararokoye abahigwaga.

Yavuze ko nubwo yari muto ariko Abarokotse babuze abavandimwe, ababyeyi, ba bandi bataramanaga, ababyeyi babuze abana, abana babuze ababyeyi mu by’ukuri imitima iratentebutse […] hari n’abari bafite ibikomere ku buryo kugira ngo bihangane byari bigoye.

Ati: “Kurenga kuri ubwo buzima bugoye, kurenga kuri ibyo byose maze kuvuga ugahitamo kubaho ntabwo byoroshye, ni ho havuye Umurage w’ubudaheranwa, ku bari barokotse Jenoside haturutse kudaheranwa banga guheranwa n’aka gahinda, n’ibibazo byose Jenoside iteje, banga ubwo buzima bwose babayemo, banga guheranwa no kubura ababo, banga guheranwa n’ibikomere n’intimba zose bafite ku mutima biyemeza kubaho”.

Yakomeje avuga ko ibyo byatewe nuko igihugu cyari kimaze kubona ubuyobozi bwiza gihinduka cyiza, kiriyubaka gihereye ku busa busa kuko ubukungu bwari bugeze munsi ya zero ho 9% ( -9%), icyizere cyo kubaho nacyo cyari hasi cyageze ku myaka 32. Yashimye aho u Rwanda rugeze mu kubaka ubumwe bw’Abanyarwanda.

Alain Ndayishimiye nk’urubyiruko we yavuze ko urubyiruko rugomba gutekereza ku mateka ya Jenoside rwibuka ko ari imbaraga z’igihugu kandi ko rugomba guharanira icyateza imbere Igihugu rukacyubaka aho kugisenya.

Ati: “Ni igihe cyo kubona ko urubyiruko rufite imbaraga zo kubaka igihugu n’izo kuba rwagisenya… ariko iyo twibutse ko Jenoside yahagaritswe n’urubyiruko rwishyize hamwe bitwubakamo imbaraga. Iki gihe nasaba urubyiruko gutangira gutekereza umusanzu wanjye ni uwuhe?  Ese nifuza ko igihugu cyatera imbere, u Rwanda nshaka kubona rusa gute, Ese ni iki binsaba?”.

Umunyamuryango wa GAERG, Mukarugwiza Judith we yavuze ko nyuma yo guca mu bikomeye, kuri ubu hari icyizere cyo kubaho ari nayo mpamvu badakwiye guheranwa.

Ati: “Icyizere cyo kubaho cyahise kiremwa Inkotanyi zigifata iki gihugu, Jenoside ihagaritswe aho abantu bari bihishe bavuyeyo […] baje biruka bavuga bati turatabawe batabawe hehe no gupfa, hehe no kongera kubona ibibi tubonye. Icyababaje gusa ni uko abenshi bavaga ahongaho, ugasanga uvuga uti nanjye uwanjye hirya no hino yari yihisheyo ndaza kumubona, ariko ukisanga nta n’umwe ubonye.

Abantu bamwe ni ho bavana uko guheranwa, ariko nababwira ko guheranwa mu by’ukuri ni ibintu urenga, ni wowe biheraho, imbaraga ni wowe ugomba kuzishakamo ukavuga uti ngomba kubirenga, cyane cyane ko  ufite Leta igushyigikiye, ishyiraho ibikorwa bikenewe bibasha kugufasha kugira ngo ubashe kubaho.

Yavuze kandi ko hari imiryango nka Imbuto Foundation ikomeza kwita ku barokotse ikomeza kubakurikirana kubaha icyanga cy’ubuzima cyo gukomeza kumva ko nyuma ya Jenoside basigaye, barokotse kandi bagomba gukomeza kubaho ntibaheranwe n’agahinda. Ku bufatanye n’indi miryango nka GAERG na Imbuto Foundation, habaho gukomeza ibikorwa by’isanamitima no kurwanya ihungabana abantu bagiye bahura na ryo.

  • NTAWITONDA JEAN CLAUDE
  • Mata 7, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE