Kwibuka 28: WASAC na REG bibutse abari abakozi ba Electrogaz

  • NTAWITONDA JEAN CLAUDE
  • Mata 15, 2022
  • Hashize imyaka 2
Image

Ikigo cy’igihugu gishinzwe amazi, isuku n’isukura (WASAC) gifatanyije n’Ikigo gishinzwe ingufu mu Rwanda (REG) byibutse abari abakozi ba Electrogaz bazize Jenoside yakorewe Abatutsi mu 1994.

Kugeza ubu habarurwa abakozi hafi 200 ba Electrogaz bazize Jenoside yakorewe Abatutsi.  

Uwase Patricie, Umunyamabanga wa Leta muri Minisiteri y’Ibikorwa Remezo (MININFRA) yavuze ko kwibuka ari umwanya wo guha agaciro abazize Jenoside yakorewe Abatutsi, gukira ibikomere no gukomeza abarokotse.

Yagize ati: “Uyu ni umwanya dufata wo kubasubiza agaciro bambuwe”.

Akomeza avuga ko kwibuka ari igihe cyo gukira kandi abarokotse Jenoside yakorewe Abatutsi bakura imbaraga mu kwibuka.

Umuhumuza Gisèle, Umuyobozi Mukuru w’agateganyo w’Ikigo cy’igihugu gishinzwe amazi, isuku n’isukura (WASAC) yihanganishije imiryango y’abahoze ari abakozi ba Electrogaz bazize Jenoside yakorewe Abatutsi.

Yizeza ko WASAC na REG bazakomeza kubaba hafi muri byose. Agira ati: “Tubibutse dutandukanye ntitwaba duhaye agaciro abafatanyaga bagatanga amazi n’amashanyarazi”.

Ashimangira ko nubwo bishwe ariko ngo umusanzu batanze na wo urazirikanwa.

Rugero Paulin, Perezida wa IBUKA mu Karere ka Nyarugenge, asaba abacitse ku icumu rya Jenoside yakorewe Abatutsi kubiba urukundo kuko ari yo nzira nziza yo gusarura amahoro.

Ahamya ko mu kigo cya Electrogaz cyahozemo interahamwe nyinshi. Asaba abakozi ba WASAC na REG kuzarangwa no gukunda igihugu ndetse no kugikorera.

Ashishikariza abacitse ku icumu rya Jenoside yakorewe Abatutsi kudatatira igihango bafitanye n’Inkotanyi.

Ron Weiss, Umuyobozi Mukuru w’Ikigo gishinzwe ingufu mu Rwanda (REG), asobanura ko hari byinshi Jenoside yakorewe Abatutsi ihuriyeho n’iyakorewe Abayahudi.

Yishimira ko nyuma yo guhagarika Jenoside yakorewe Abatutsi, hari ibimaze kugerwaho. Ati: “Turabona byinshi byagezweho birimo ubumwe n’ubwiyunge”.

Akomeza agira ati: “Dufite inshingano zo kurwanya abahakana n’abapfobya Jenoside kuko bagamije gukomeza umugambi wabo”.

Yizeza ko ibigo byombi REG na WASAC bazakomeza guteza imbere ubumwe.

Mu buhamya bwa Mutamuriza Charlotte, avuga ko Katabarwa André wayoboye Electrogaz yari yarahaye akazi Abatutsi benshi mu gihe kubona akazi mu bindi bigo byari ingorabahizi.

Avuga ko iyo babonaga uri umututsi baguhaga urupapuro rwanditseho 02 bityo uwo uruhaye ntabe akiguhaye akazi. Uwahabwaga urwanditseho 01 bivuze ko yabaga ari umuhutu.

Mutamuriza avuga ko mu 1994 indege yari itwaye Habyarimana imaze guhanuka, ibintu byaje kuba bibi.

Ashimira Imana ko yakoresheje Inkotanyi zikaza kubasohora aho bari bihishe, zikabatwara kuri St André. Kugeza ubu yashoboye kwiyubaka, arikorera kandi abana be bose bize neza, bafite n’akazi keza mu gihugu.

Avuga ko Jenoside yamutwaye abana 3 agasigarana n’umugabo we gusa ariko Imana yarabafashije bongera kubyara abana batatu.

Hon Kalisa Evariste, wakoreye Electrogaz imyaka 20, mu izina ry’imiryango y’abari abakozi ba Electrogaz bazize Jenoside yakorewe Abatutsi ashimira WASAC na REG kuba ibigo byombi bihamagaza abo mu miryango y’abasigaye ndetse n’abakozi bakagira umwanya wo kwibuka abakozi ba Electrogaz bazize Jenoside.

Ahamya ko imodoka za Electrogaz ari zo zifashishwaga muri mitingi (Meetings) za MRND na CDR ndetse no mu zindi kampanye za MRND.

Uwase Patricie, Umunyamabanga wa Leta muri Ministeri y’Ibikorwa Remezo (Foto WASAC)
  • NTAWITONDA JEAN CLAUDE
  • Mata 15, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE