Kwibuka 28-Ngororero: Hashyinguwe mu cyubahiro imibiri 212

  • NTAWITONDA JEAN CLAUDE
  • Mata 10, 2022
  • Hashize imyaka 2
Image

Uyu munsi taliki ya 10 mu Karere ka Ngororero, ku Rwibutso rwa Jenoside yakorewe Abatutsi rwa Ngororero hashyinguwe mu cyubahiro imibiri 212 y’Abatutsi bishwe muri Jenoside yakorewe Abatutsi mu 1994.

Uwatanze ubuhamya, Rurangwa Appolinnaire yashimye ingabo za FPR Inkotanyi zabarokoye zari ziyobowe ku isonga na Perezida Paul Kagame, anashima Leta y’Ubumwe bw’Abanyarwanda ukuntu ibitaho.

Yagarutse ku buzima bugoye Abatutsi bahigwaga banyuzemo by’umwihariko mu 1994, ariko kandi ko gutotezwa byahereye kera.

Yagize ati: “Hano mu Ngororero ubwicanyi bwatangiye mu 1990, Gutotezwa byahereye kera, ubwicanyi bwatangiye ku ya 1 Ukwakira 1990 ubwo Inkotanyi zateraga mu Mutara hatangiye urugamba rwo kubohoka Igihugu. Twe icyo gihe mu rugo baradusenyeye, abandi barabasahura, Abatutsi b’i Ramba na Mbuye bari bahunze, abandi biciwe mu ngo zabo.”

Guhanuka kw’indege si yo mbarutso ya Jenoside, ni ikinyoma

Yagize ati: “Guhanuka kw’indege si yo mbarutso yo kwica Abatutsi,  ni ikinyoma, ahubwo ni uko urwango rwigishijwe igihe kirekire, kuko uko imirwano yo kubohora Igihugu yuburaga ubwo inaha Abatutsi baricwaga”.

Uhagarariye Ibuka mu Karere ka Ngororero Niyonsenga Jean d’Amour

Yakomeje avuga ko ku italiki ya 10 Mata 1994, Abatutsi bose bahungiye muri iyo nzu, (ingoro ya Muvoma), Abantu bamwe bahungiye ku muzungu witwa Buruge, ndetse bamwe muri bo bashobora gukomeza berekeza i Kabgayi abandi baguma hano.

Ati: “Abajandarume, abasirikare n’interahamwe bari barateguye uburyo bazaza kwicira abantu hano. Bafite imihoro, bambaye amashara ku buryo utashoboraga kumenya umuntu.

Abantu twari twuzuyemo maze, Interahamwe n’abasirikare batangira guteramo gerenade, barasamo bakomeza kuturasa kuva saa yine kugeza nka saa kumi n’ebyiri murumva uko byari bimeze ntibyari byoroshye, noneho ariko ubwo rwose abantu bari bakomeretse harimo n’abapfuye.

Nyuma bagiye gushaka lisansi baraza bayimena ku bantu, baratwika”.

Yakomeje avuga ukuntu yavuye mu Ngororero agenda yihisha, agera muri Muhanga, akomeza yerekeza Rubavu kuko yari afiteyo mukuru we, ariko ntibyari byoroshye kuko urwo rugendo rwose yabaga yibazwaho n’abo ahuye na bo, bati uyu mwana si Umututsi? Agera aho interahamwe zica, akagira Imana akazicika gutyo gutyo, ku buryo urwo rugendo rwe rwahereye muri Mata rukagera muri Nyakanga.

Rurangwa yasabye abaturage b’Akarere ka Ngororero gutanga amakuru ku haherereye imibiri itarashyingurwa kugira ngo ishyingurwe mu cyubahiro, bityo abarokotse Jenoside baruhuke, kuko kudashyingura uwawe bibabaza.

Gushyingura uwawe biruhura umutima

Uhagarariye Umuryango Ibuka mu Karere ka Ngororero Niyonsenga Jean d’Amour mu Ijambo rye yashimye ingabo za FPR Inkotanyi zabarokoye n’abaje kwifatanya na bo kwibuka ababo bazize Jenoside yakorewe Abatutsi mu 1994.

Yashimye ubuyobozi bwiza bukomeje kwita ku bacitse ku icumu rya Jenoside yakorewe Abatutsi, ndetse avuga ko iyo abantu bibutse ababo baruhuka.

Ati: “Iyo tugeze ahangaha tuba turuhutse, iyo tugeze ahangaha ibikomere dufite ku mutima ntibikira, ahubwo biromorwa”.

Yasabye abacitse ku icumu rya Jenoside gukomeza bagatwazanya, bakibuka biyubaka ntibaheranwe n’agahinda.

Yagaragaje inzira itoroshye abahigwaga banyuzemo, aho Abatutsi 14,500 bari bahungiye mu ngoro ya Muvoma mu Ngororero batwikiwemo, imibiri 8,475 yabonetse mu nkengero hirya no hino mu ngo naho  imibiri 212 yashyinguwe mu cyubahiro uyu munsi.  Yavuze ko Urwibutso rwa Jenoside yakorewe Abatutsi rwa Ngororero hashyinguyemo imibiri 23,187.

Yongeyeho ati: “Tuzahora tubabwira amateka y’ahangaha kandi turizera ko n’ubuyobozi bw’Akarere buzashyiramo imbaraga mu gikorwa cyo kwandika amateka yaho kugira ngo atazibagirana”.

Abaturage barasabwa gutanga amakuru y’aho imibiri iherereye

Perezida wa Ibuka kandi yagaragaje ikibazo abacitse ku icumu rya Jenoside bagifite, icy’imibiri bataramenya aho iherereye, asaba abaturage gutanga amakuru.

Ati: “Uyu munsi turanungutse kuba tubonye aba bavandimwe tukaba tugiye kubashyingura mu cyubahiro. Ntabwo ari abangaba gusa, hari abandi [……] Muduhe amakuru ni mwe muzi ahantu mwabashyize, tubakureyo tubashyingure mu cyubahiro kibakwiriye, kuko barakibimye ariko twebwe turahari ni cyo twasigariye tuzakibasubiza”.

Izindi mbogamizi ni amacumbi ashaje 239 y’abarokotse Jenoside akeneye gusanwa, ikibazo cy’ubuvuzi kuko bafite ibikomere ku mutima ndetse no ku mubiri, Imitungo itishyurwa mu manza zaciwe n’Inkiko Gacaca. Gusa nanone ashimira ubuyobozi ko hari igikorwa mu gukemura ibyo bibazo.

Ndutiye umwe mu bafite abari bushyingurwe mu cyubahiro uyu munsi, yashimiye buri wese wageze aho kubafata mu mugongo ndetse yihanganisha abacitse ku icumu rya Jenoside.

Leta y’Ubumwe yiyemeje guhindura amateka mabi

Guverineri w’Intara y’Iburengerazuba Habitegeko Francois yashimiye ingabo za FPR Inkotanyi zabohoye Igihugu, zigahagarika Jenoside zikarokora Abatusi bahigwaga zari zirangajwe imbere na Nyakubahwa Perezida Paul Kagame.

Yashimye uburyo Leta y’Ubumwe bw’Abanyarwanda yiyemeje guhindura amateka mabi yaranze iki gihugu cyacu kuva ku mwaduko w’abazungu ndetse no mu gihe cya Repubulika ya mbere n’iya kabiri, amateka yoretse u Rwanda.

Yihanganishije abacitse ku icumu rya Jenoside, asaba abazi aho imibiri itarashyingurwa iherereye gutanga amakuru. Ndetse yamagana ubugwari bw’abayiteguye bakayishira mu bikorwa  

Yagize ati: “Abazi ahaherereye imibiri itarashyingurwa nibatange amakuru, bandike agapapuro cyangwa se bahashyire ikimenyetso, kuko kudashyingura uwawe bikomeza kuba imbogamizi ku bumwe n’ubwiyunge”.

Ku Rwibutso rwa Jenoside yakorewe Abatutsi rwa Ngororero hashyinguwe mu cyubahiro imibiri 212

Guverineri yagize umurongo aha ibibazo bikibangamiye abacitse ku icumu rya Jenoside yakorewe Abatutsi, mu rwego rwo kubishakira ibisubizo.

Ingengabitekerezo ya Jenoside yashenye umuryango

Uwatanze Ikiganiro, Budengeri Eulade yagaragaje neza ko mu irangashingiro ry’itegeko Nshinga rya Repubulika y’u Rwanda ryo muri 2003 nk’uko ryavuguruwe muri 2015 rishimangira ko Leta yiyemeje gukumira no guhana icyaha cya Jenoside, kurwanya ihakana n’ipfobya rya Jenoside yakorewe Abatutsi no kurandura ingengabitekerezo yayo n’ibyo igaragariramo byose.

Insanganyamatsiko y’ikiganiro ni ‘Uruhare rw’ingengabitekerezo ya Jenoside mu gusenya ubumwe bw’Abanyarwanda n’inshingano za buri wese zo kububumbatira.

Budengeri yavuze ko ikiganiro cyerekana iby’ingenzi by’amateka y’u Rwanda bigaragaza uko ingengabitekerezo ya Jenoside yashenye umuryango w’Abanyarwanda kugeza kuri Jenoside yakorewe Abatutsi mu 1994.  

Icyo kiganiro kigaragaza kandi uko nyuma yo guhagarika Jenoside, Abanyarwanda bataheranwe na politiki mbi, ahubwo bagaharanira kongera kubaka ubumwe, baharanira no guteza Igihugu imbere.

Yagize ati: “Abanyarwanda twese cyane cyane urubyiruko dufite inshingano zo kwigira ku mateka no kubungabunga ubumwe bwacu kuko ari wo musingi w’iterambere rirambye”.

Leta y’Ubumwe bw’Abanyarwanda yiyemeje kurandura burundu ivangura n’amacakubiri bishingiye ku bwoko, ku karere n’ibindi ahubwo igashyira imbere ubumwe bw’Abanyarwanda.

Muri rusange mu Karere ka Ngororero hashyinguwe mu cyubahiro imibiri isaga 54, 000.

Uwatanze Ikiganiro, Budengeri Eulade
Ku Rwibutso rwa Jenoside yakorewe Abatutsi rwa Ngororero hashyinguwe mu cyubahiro imibiri 212
  • NTAWITONDA JEAN CLAUDE
  • Mata 10, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE