Kwibuka 28: Minisiteri y’Ubuzima yifuza gushimira abayikoreye barokoye Abatutsi

  • NTAWITONDA JEAN CLAUDE
  • Mata 13, 2022
  • Hashize imyaka 2
Image

Nyuma y’imyaka 28 ishize Ingabo za RPA-Inkotanyi zihagaritse Jenoside yakorewe Abatutsi yatwaye ubuzima bw’abasaga miliyoni mu mezi atatu gusa, hamaze kumenyekana abahoze ari abakozi ba Minisiteri y’Ubuzima 41 bishwe icyo gihe.

Minisiteri y’Ubuzima n’izindi nzego ziyishamikiyeho byabuze imbaga nini y’abari abakozi ndetse na bamwe mu bari bafite ibibazo by’ubuzima bagombaga kwitabwaho ariko bikarangira bambuwe ubuzima n’abari bararahiriye kububasubiza.

Ku rundi ruhande ariko, hari abahoze bakora muri uru rwego bagaragaje ubutwari muri icyo gihe barokora ubuzima bw’abari abarwayi n’abakozi bagenzi babo bahigwaga ngo bicwe n’Interahamwe cyangwa bagenzi babo bijanditse muri Jenoside.

Mu muhango wo kwibuka abari abakozi mu rwego rw’ubuzima bazize Jenoside yakorewe Abatutsi ku wa Kabiri taliki ya 12 Mata 2022, bamwe mu barokowe na bagenzi babo cyangwa abo mu miryango y’abishwe barokotse, basabye Minisiteri y’Ubuzima kwegeranya amazina y’abagize uruhare mu kurokora bagenzi babo bahigwaga kugira ngo bazashimirwe by’umwihariko.

Minisitiri w’Ubuzima Dr. Ngamije Daniel, yashimye icyo gitekerezo agira ati: “Turashima igitekerezo cyiza kivuye mu biganiro tugize, byo kumenya abakozi ba Minisiteri y’Ubuzima baba baragize uruhare mu kurokora Abatutsi bahigwaga. Abashinzwe abakozi muri Minisiteri turabasaba gushakisha ayo makuru yose, abo bantu bazamenyekane kandi bazashimirwe.”

Uyu muhango wo kwibuka witabiriwe n’abakozi ba Minisiteri y’Ubuzima n’ab’ibigo biyishamikiyeho, abafatanyabikorwa ba Minisiteri mu iterambere, imiryango y’abari abakozi mu rwego rw’ubuzima bishwe muri Jenoside.

Minisitiri Dr Ngamije yihanganishije imiryango yabuze abayo muri Jenoside yakorewe Abatutsi, by’umwihariko abahoze ari abakozi ba Minisiteri y’Ubuzima, ashimangira ko kwibuka ari umwanya wihariye wo gusubiza icyubahiro abishwe mu bugome ndengakamere.

Yagize ati: “Kwibuka twiyubaka ni umwanya wihariye wo gusubiza icyubahiro abakozi bagenzi bacu bacyambuwe ndetse n’abarwayi twari dushinzwe kuvura bishwe mu bugome ndengakamere muri Jenoside yakorewe Abatutsi, aho bari mu bigo n’ibitaro bitandukanye mu gihugu. Ni umwanya wo kuzirikana ubutwari bw’abacitse ku icumu mu rugamba rukomeye rwo kongera kubaho nta muryango nta kivurira.”

Yagarutse ku cyizere cyaje kuboneka ubwo Ingabo za RPF Inkotanyi zahagarikaga Jenoside yakorewe Abatutsi mu 1994, zigatanga n’urugero rwo kwimakaza agaciro k’Umunyarwanda ari na rwo rukiyobora Igihugu mu rugamba rwo kubaka Igihugu cyunze ubumwe kandi cyageze ku bwiyunge nyabwo.

“[…] RPF yahisemo kutihorera, si uko itari ifite ubushobozi bwo kubikora, ni uko binyuranye n’amahame yayo n’indangagaciro by’Umuryango wa RPF. Turashima ubwitange n’ubushishozi bwa Nyakubahwa Perezida wa Repubulika Paul Kagame, ku ruhare yagize mu guhagarika Jenoside yakorewe Abatutsi, ku buryo yita ku bayirokotse no guha agaciro ubuzima bw’Umunyarwanda ndetse akanadutoza kubaha izo ndangagaciro ntagereranywa.”

Yanavuze ko Abakozi ba Minisiteri y’Ubuzima n’ibigo biyishamikiyeho bashyigikiye gahunda z’ubuyobozi bwa Leta y’u Rwanda bakaba batazatezuka ku mugambi wo kuba ku isonga mu kwiyubaka, mu kubaka agaciro k’ubuzima n’uburenganzira bwo kubaho kwa buri wese, mu kurwanya ingengabitekerezo ya Jenoside aho iva ikagera, by’umwihariko bakomeza kuba hafi y’abarokotse Jenoside yakorewe Abatutsi.

Abatanze ubumamya bw’ibyabaye muri Minisiteri y’Ubuzima mu gihe cya Jenoside yakorewe Abatusti na mbere ya ho, bavuze ko icyo gihe byari bigoye kwemeza ko yitwa iy’ubuzima kuko guhera ku muyobozi ukageza ku bandi bakozi wasangaga abumva agaciro k’ubuzima ari mbarwa kuko bashyiraga imbere inda nini, irondakoko, irondakarere n’irindi vangura ry’ingeri zitandukanye.

Banagarutse ku kuba ariko by’umwihariko imiyoborere mibi ari yo ntandaro y’ibikorwa byose bibi byabayeho mu mateka ya Jenoside yakorewe Abutsi nk’uko byagiye binagenda mu kaga kagwiriye muntu mu mateka ye.

  • NTAWITONDA JEAN CLAUDE
  • Mata 13, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE