Kwibuka 28: Abakoze Jenoside baratsinzwe-Ibuka  

  • NTAWITONDA JEAN CLAUDE
  • Mata 11, 2022
  • Hashize imyaka 2
Image

Perezida w’Umuryango Uharanira Inyungu z’Abarokotse Jenoside yakorewe Abatutsi (Ibuka) Nkuranga Egide, yakomoje ku buryo abateguye bakanashyira mu bikorwa umugambi wa Jenoside yakorewe Abatutsi batsinzwe kuko batageze ku mugambi wo kubatsemba burundu nk’uko bari barabiteguye.

Nkuranga yabigarutseho ku Cyumweru taliki 10 Mata 2022, mu muhango wo kwibuka ku nshuro ya 28 Jenoside yakorewe Abatutsi mu Murenge wa Gahanga, Akarere ka Kicukiro, by’umwihariko gusubiza icyubahiro Abatutsi biciwe ku Kiliziya ya Gahanga no mu nkengero zayo.

Ku wa 08 Mata 1994 ubwo Jenoside yari yakajije umurego ni bwo Abatutsi benshi ba Gahanga bahungiye muri Kiliziya ya Gahanga.  

Nkuranga yavuze ko imiryango y’Abatwarangabo yari ituye i Kagarama, Kicukiro, Kabeza na Gahanga imyinshi yajyanywe ku Kiliziya izi ko ihungishijwe ariko ikaza kwicwa.

Avuga ko gahunda y’abateguye Jenoside bakanayishyira mu bikorwa itagezweho, abijanditse muri byo na bo bakaba baratsinzwe kuko hari abarokotse Jenoside atari ku mpuhwe z’ababahigaga, ahubwo kubera ubutabazi bwatanzwe n’Inkotanyi zabakuye mu menyo ya rubamba.

Ati: “Turahari! Icyo nababwira ni uko… twarabyaye, dufite abana turabyiruye ngira ngo bamwe muri bo baranababona nagira ngo nongere mbishimangire, baratsinzwe”.

Iyi kiliziya yahungiyemo Abatutsi benshi bavuye impande zitandukanye mu nkengero za Gahanga. 

Mu buhamya bwa Kalisa warokokeye ku Kiliziya y’i Gahanga, avuga ko yanyuze inzira ndende y’umusaraba agashimira Inkotanyi zamurokoye zikamugeza kuri Sitade Amahoro.

Muri iyi kiliziya hinjiyemo abantu bavanze harimo Abahutu ndetse n’Abatutsi kuko mbere hari bamwe mu Bahutu batari bazi neza abicwa abo ari bo. 

Bigeze ku wa 09 Mata 1994 ni bwo abayobozi ndetse n’Interahamwe batangiye kuvuga ngo Abahutu musohoke. 

Gahunda yo kwibuka muri Gahanga yitabiriwe n’ingeri z’abantu batandukanye (Foto Kayitare J.P)

Ubwo uwabaga ari Umuhutu wese icyo gihe yarasohotse, ubwo hazaga umugabo w’Umuhutu agafata umugore we cyangwa umwana we waba yahungiye muri Kiliziya.

Uwabaga ari Umututsi wese ntiyemererwaga gusohoka. Byageze ku wa 10/04/1994 Abahutu bose bari bahungiye muri Kiliziya bari bamaze kuvamo hasigayemo Abatutsi gusa.

Uwo munsi 10/04 ni bwo batangiye kwica Abatutsi ariko Abatutsi bari bahahungiye bagerageje kwirwanaho bigeze aho Interahamwe ziravuga ziti turagiye rwose muraducitse ntabwo tuzagaruka.

Uwitwa Konseye Buregeya ni we wasabye ko haza abasirikare ngo bice Abatutsi bakoresheje imbunda.

Nyuma kuri uwo munsi  ku wa 10 Mata 1994 haje abasirikare barasa muri Kiliziya Abatutsi benshi barahagwa, nyuma haza Interahamwe zikajya zireba abagihumeka zikabatemagura.

Abatutsi bari bahungiye muri Kiliziya hafi ya bose bahasize ubuzima n’uwabashije kuhava yari yarakomeretse cyane.

Ubu aho iyo Kiliziya yahoze hubatswe urwibutso rwa Jenoside hakaba hashyinguye imibiri isaga ibihumbi birindwi (7,000).

Mu kiganiro cyatanzwe na Amb Dr Nsengimana Joseph, yavuze ko mu Rwanda ari ho habaye Jenoside igahitana Abatutsi benshi mu gihe gito.

Yagarutse ku bumwe bw’Abanyarwanda ndetse n’inkomoko yabwo. Ati “Ubumwe bw’Abanyarwanda bushingiye kuri Kanyarwanda, ni ngombwa gukomera kuri Ndi Umunyarwanda”.

Avuga ko nyuma ya Jenoside hatekerejwe Inama y’Igihugu y’Umushyikirano mu rwego rwo kugira ngo u Rwanda rukomeze kunga ubumwe no kureba ko rwatera imbere.

Hagiyeho kandi Girinka kugira ngo Abanyarwanda bongere basangire ibihari kandi babihane.

Abafite imiryango yabo yaguye ku kiliziya i Gahanga bagize umwanya wo kubibuka (Foto Kayitare J.P)

Ubuyobozi bw’Akarere ka Kicukiro bwagaragaje ko kwibuka Jenoside yakorewe Abatutsi, ari ugusubiza icyubahiro n’urukundo Abatutsi bavukijwe n’abicanyi.

Umutesi Solange, Umuyobozi Nshingwabikorwa w’Akarere ka Kicukiro, yavuze ko kwibuka ari umwanya wo kuzirikana. Ati: “Kwibuka ni ukuzirikana akarengane k’urwango rukabije umututsi yakorewe mu gihugu cye akabura gitabara”.

Avuga ko muri uko kwibuka ari no kuzirikana igihombo igihugu n’umuryango nyarwanda cyagize cyo guhomba abarenga miliyoni bishwe muri Jenoside yakorewe Abatutsi.

Ati: “Kwibuka ni ukubasubiza icyubahiro n’urukundo bavukijwe n’abicanyi. Tukabibuka mu masura no mu mazina yabo, tukibuka imirimo myiza n’umuco mwiza wabaranze, bikaduha imbaraga zo kwiyubaka nyabyo”.

Yongeraho ko kwibuka ari ukuzirikana ubutwari bw’Inkotanyi zakotanye cyane, bato batari gito bagahagarika Jenoside yakorerwaga Abatutsi.

Asobanura ko Inkotanyi zabohoye u Rwanda zikongera gufatanya n’Abanyarwanda bose mu kurwubaka, uyu munsi bakaba bibuka Jenoside yakorewe Abatutsi.

Akomeza agira ati: “Kwibuka ni ugukomeza icyizere twahawe na Leta yacu y’Ubumwe bw’Abanyarwanda, tukavuga dushize amanga ko Jenoside itazongera kubaho ukundi”.

Imwe mu miryango y’abafite ababo baguye i Gahanga bafashe umwanya wo kubunamira (Foto Kayitare J.P)
Umuhanzi Bonhomme yaririmbye indirimbo zifasha kwibuka Abatutsi bazize uko baremwe (Foto Kayitare J.P)
Umutesi Solange, Umuyobozi Nshingwabikorwa w’akarere ka Kicukiro, yagaragaje ko kwibuka ari ukuzirikana Abatutsi bavukijwe ubuzima n’abicanyi (Foto Kayitare J.P)
Perezida wa Ibuka, Nkuranga Egide avuga ko Abatutsi bari bazi ko bahungishirijwe ku kiliziya i Gahanga ariko baricwa (Foto Kayitare J.P)
Urubyiruko rwagize umwanya wo gucana urumuri rw’icyizere (Foto Kayitare J.P)
Mudahogora Chantal, ni umwe mu bafite abe biciwe kuri Kiliziya ya Gahanga (Foto Kayitare J.P)
Abarokokeye i Gahanga bongeye kugira icyizere cyo kubaho (Foto Kayitare J.P)
  • NTAWITONDA JEAN CLAUDE
  • Mata 11, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE