Kunywa amata ku Munyarwanda byikubye inshuro 4

  • NYIRANEZA JUDITH
  • Mutarama 18, 2024
  • Hashize amezi 4
Image

Uko inka zagiye ziyongera kubera gahunda zitandukanye zo guteza imbere ubworozi, mu myaka 30 Umunyarwanda yakubye inshuro hafi enye igipimo cy’amata yanywaga ku mwaka.

Nk’uko byatangajwe n’Umuyobozi Mukuru wungirije ushinzwe iterambere ry’Ubworozi muri RAB, Dr Uwituze Solange yabitangaje yavuze ko abanywa amata biyongereye.

Yagize ati: “Abanyarwanda banywaga nibura Litiro 20,5 ni bo banywaga amata ku mwaka mu 2005 none ubu bageze kuri Litiro 78,7 ku mwaka, twikubye inshuro enye mu myaka 30 z’amata umunyarwanda anywa ku mwaka.”

Yongeyeho ko uko umubare w’inka wagiye uzamuka ari nako n’umukamo wazamutse.

Ati: “Mu 1996, mu Rwanda hari hasigaye inka 172 000 gusa. Uyu munsi nyuma y’imyaka 30 hari inka zirengaho gato 1 600 000.”

Dr Uwituje yanagaragaje impamvu inka ziyongereye harimo gahunda ya Girinka Munyarwanda, Inka Abanyarwanda babaga mu mahanga batahanye na gahunda yo gutera intanga.

Dr Uwituze Solange, Umuyobozi Mukuru wungirije ushinzwe iterambere ry’Ubworozi muri RAB

Yagize ati: “Kwiyongera kw’inka byaturutse ku ngamba zikomeye Leta y’u Rwanda yashyizeho cyane cyane harimo inka zatahanywe n’Abanyarwanda batashye.

Hari na Gahunda ya Girinka Munyarwanda yatangijwe na Perezida Paul Kagame mu 2006[…..] ndetse mu . Uyu munsi rero, guhera 2006 hamaze gutangwa inka zisaga ibihumbi 451, urumva ko bingana na 1/4 cy’inka zose ziri mu gihugu.  Iyi gahunda yagize uruhare rufatika mu kuzamura umubare w’inka mu gihugu.”

Yasobanuye ko iyi gahunda yashingiye ko ari byiza ko Umunyarwanda utishoboye ahawe inka byamufasha kunoza imirire harwanywa imirire mibi kandi igafasha kongera iterambere ry’urugo rwe binyuze mu mata acuruza, mu ifumbire ariko noneho ndetse mu muco uwaguhaga nka waramwirahiraga, akaba ari gahunda yakoreshejwe mu buryo bwo kongera kunga Abanyarwanda.

Indi gahunda ya 3 ni ugutera intanga inka havugururwa icyororo. Izo gahunda 3 akaba ari zo zatumye Inka zidacika ahubwo ziriyongera.

Dr Uwituze yanavuze ko ikindi cyafashije ari ugutera intanga amatungo, kuri ubu hariho inganda ebyiri zitanga umwuka ubikwamo intanga, hakaba hashobora gutera intanga inka zirenga 120 000 buri mwaka.

Yongeyeho kandi ko urugendo rugikomeza kuko hataragerwa ku bipimo bya ngombwa biteganywa.

Ati: “Ntituragera aho dushaka kugera kuko urebye ku bipimo ngenderwaho cyane cyane by’Ishami ry’Umuryango w’Abibumbye ryita ku Buhinzi n’Ibiribwa FAO n’Ishami ry’Umuryango w’Abibumbye ryita ku Buzima OMS, Umunyarwanda nibura yagombye kuba anywa Litiro 120 ku mwaka.”

Ubu butumwa bukubiye mu kiganiro Dr Uwituze yatanze cyatambutse kuri Televiziyo y’u Rwanda hagarukwa ku ngamba igihugu gifata mu kongera umusaruro uva mu buhinzi n’ubworozi, hagamijwe ko Abanyarwanda bihaza mu biribwa.

Umubare w’Abanyarwanda banywa amata wikubye hafi kane mu myaka 30
  • NYIRANEZA JUDITH
  • Mutarama 18, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE