Kung Fu Wushu: Hatangijwe umushinga ugamije kugeza uyu mukino mu mashuri

  • NYIRANEZA JUDITH
  • Ukuboza 3, 2023
  • Hashize amezi 3
Image

Mu rwego rwo guteza imbere no kumenyekanisha umukino wa Kung Fu Wushu mu Rwanda, ishyirahamwe nyarwanda  ry’uyu mukino “RKWF” ku bufatanye na Ambasade y’u Bushinwa mu Rwanda, hatangijwe umushinga wo guteza imbere uyu mukino binyuze mu mashuri

Iyi gahunda yiswe “Imbarutso Project- Kungfu in Schools” yatangirijwe mu ishuri ribanza EP Intwali riherereye i Nyamirambo, ku wa Gatanu tariki 1 Ukuboza 2023.

Perezida wa RKWF, Uwiragiye Marc yagaragaje ko iyi gahunda bayitekereje kuva mu 2017 ubu akaba ari bwo ishyizwe mu bikorwa. Ati: “Ni ibyo kwishimira ko tubashije gutangiza iyi gahunda kuko izadufasha gukwirakwiza uyu mukino mu gihugu hose bihereye mu mashuri.”

Uwiragiye avuga ko batangiriye mu Mujyi wa Kigali ariko gahunda izakomereza no mu yandi mashuri mu bice bitandukanye by’igihugu kugira ngo bagere ku ntego bihaye.

Ubwo yatangizaga uyu mukino ku mugaragaro, Perezida wa RKWF, Uwiragiye yavuze ko bazakomeza gufasha EP Intwali kugira ngo abana bahiga bigishwe umukino wa Kung Fu Wushu.

Yakomeje avuga ko kandi mu bushobozi bafite bazafasha abana 100 batishoboye babarihira amafaranga atuma bafatira amafunguro ku ishuri “School Feeding”.

Umuyobozi wa EP Intwali, Sengabo Ayubu yishimiye iyi gahunda ashimangira ko izafasha abana kugira imyitwarire myiza ndetse no kuzamura umusaruro wabo mu masomo.

Yakomeje avuga ko umukino wa Kung Fu Wushu nawo wiyongereye mu mikino abana basanzwe bakina ariko by’akarusho uyu mukino ukaba utoza abana kurangwa n’ikinyabupfura.

Iri shuri, EP Intwali ryashinzwe mu 1957, kuri ubu higa abanyeshuri bose hamwe 2473.

Sun Chenguang, Umujyanama wa Ambasaderi w’u Bushinwa mu Rwanda

Mu gutangiza uyu mushinga hari kandi Umujyanama wa Ambasaderi w’u Bushinwa mu Rwanda, Sun Chenguang aho yavuze ko iyi gahunda izafasha mu kuzamura impano z’abana bo mu mashuri atandukanye mu Rwanda.

Yakomeje avuga ko bazakomeza gufatanya na RKWF kugira ngo iki gikorwa kizakomeza kigere no mu yandi mashuri.

Nyuma yo gutangiza uyu mukino muri EP Intwali, ubuyobozi bwa RKWF butangaza ko hazakurikiraho ishuri “Irerero Academy” riherereye ku Ruyenzi mu Karere ka Kamonyi nyuma gahunda ikazakomereza no mu yandi mashuri mu bice bitandukanye by’igihugu aho intego ari uko umwaka wa 2024 uzarangira iyi gahunda igeze mu bigo by’amashuri 8.

Perezida wa RKWF, Uwiragiye Marc
Umuyobozi wa EP Intwali, Sengabo Ayubu
  • NYIRANEZA JUDITH
  • Ukuboza 3, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE