Kubaka ibyumba by’amashuri no kwishyurira abatishoboye Mituweli ibyaranze umuganda muri Gatsibo  (Amafoto)

  • KAYITARE JEAN PAUL
  • Mutarama 27, 2024
  • Hashize ukwezi 1
Image

Kuri uyu wa Gatandatu tariki 27 Mutarama 2024, hirya no hino mu Karere ka Gatsibo mu Ntara y’Iburasirazuba hakozwe umuganda rusange usoza ukwezi kwa Mutarama 2024.

Ku rwego rw’Akarere wakorewe mu Murenge wa Remera mu Kagari ka Bushobora ku ishuri rya GS Bushobora.

Witabiriwe n’abaturage, ubuyobozi bw’Akarere ka Gatsibo, abafatanyabikorwa n’inzego z’umutekano.

Ku ishuri rya GS Bushobora hashyizwe ibuye ry’ifatizo ahagiye kubakwa ibyumba by’amashuri 6, ubwiherero 12 n’icyumba cy’umukobwa bizubakwa ku bufatanye n’uruganda rutunganya kawa ruzwi nka RWACOF.

Ni mu gihe mu Murenge wa Muhura, nyuma y’igikorwa cy’umuganda habaye igikorwa cyo guha imiryango 399 igizwe n’abantu 1,133 umusanzu w’ubwisungane mu kwivuza (MUSA) w’umwaka wa 2023-2024.

Umusanzu ungana na 3,399,500 FRW, wakusanyijwe muri gahunda y’ubukangurambaga bw’amezi atatu bwo kwishyurira Musa abatishoboye.

Umunyamabanga Nshingwabikorwa w’Umurenge wa Muhura Ndayisenga Jean Claude, yabwiye Imvaho Nshya ko ubukangurambaga bwakozwe ku bufatanye bw’ubuyobozi, abakomoka mu Murenge wa Muhura batuye ahandi, abahakorera n’abahatuye mu rwego rwo gufasha abatishoboye bari barabuze ubushobozi bwo kwirihira Mituweli.

Bamwe mu bishyuriwe ubwisungane mu kwivuza ndetse n’ubuyobozi bw’Umurenge wa Muhura bashimiye abafatanyabikorwa uruhare bagize mu kurengera abatishoboye.

Uyu muhango witabiriwe n’Umujyanama mu nama njyanama y’Akarere ushinzwe Umurenge wa Muhura Kapiteni Athar Eleazar, ari nawe wari umushyitsi mukuru.

Mu Murenge wa Kiramuruzi, umuganda witabiriwe n’Umunyamabanga Nshingwabikorwa w’Umurenge ndetse n’inzego z’umutekano bafatanyije n’abaturage.

Mu tugari twose tugize Umurenge wa Kiramuruzi, umuganda wibanze ku bikorwa byo gutunganya imihanda, ibiraro, no gusanira inzu abatishoboye.

Mu tugari tugize Umurenge wa Rugarama mu Karere ka Gatsibo, abaturage bazindukiye mu muganda rusange aho umuganda wibanze ku bikorwa bitandukanye nko gutunganya imiferege, gusana inzu zimeze nabi, gutunganya imihanda y’imigenderano, no kwita ku mashyamba haterwa ibiti.

Mu Murenge wa Ngarama hakozwe umuganda rusange usoza ukwezi kwa Mutarama 2024. Ku rwego rw’Umurenge wa Ngarama, umuganda wakorewe mu Kagari ka Karambi.

Kimwe nk’ahandi hose mu Karere ka Gatsibo, nyuma y’umuganda rusange, abaturage bahawe ubutumwa bwo kwicungira umutekano, kwitabira gahunda ya Gira wigire, kwishyura ubwisungane mu kwivuza, Ejoheza ndetse banasobanurirwa ibikorwa bizakorwa ku munsi w’Intwari wizihizwa tariki ya 01 Gashyantare buri mwaka.

  • KAYITARE JEAN PAUL
  • Mutarama 27, 2024
  • Hashize ukwezi 1
TANGA IGITEKEREZO
is puravive fda approved says:
Mutarama 28, 2024 at 4:32 am

I loved even more than you will get done right here. The overall look is nice, and the writing is stylish, but there’s something off about the way you write that makes me think that you should be careful what you say next. I will definitely be back again and again if you protect this hike.

Andika igitekerezo

AMATEGEKO AGENGA IYANDIKA RY'IGITEKEREZO CYAWE