Kubaka Afurika dushaka ni twe bireba-Perezida Kagame

  • NTAWITONDA JEAN CLAUDE
  • Werurwe 3, 2022
  • Hashize imyaka 2
Image

Guharanira kwigira no kwihesha agaciro ni urugendo umuntu adashobora gusangira n’undi. Ibyo byashimangiwe na Perezida Repubulika y’u Rwanda Paul Kagame, kuri uyu wa Kane taliki ya 3 Werurwe mu muhango wo gutangiza Icyiciro cya 8 cy’Inama Nyafurika yiga ku iterambere rirambye.

Iyi nama ngarukamwaka iteraniye i Kigali itegurwa na Komisiyo y’Ubukungu y’Umuryango w’Abibumbye muri Afurika (UNECA) ku bufatanye n’ibihugu by’Afurika ndetse na Komisiyo y’Umuryango w’Afurika Yunze Ubumwe (AUC).

Afungura iyo nama ku mugaragaro, Perezida Kagame yagaragaje ko yishimiye kwifatanya n’abayobozi ndetse n’abandi banyacyubahiro bitabiriye iyo nama baturutse mu ice bitandukanye by’Isi, aboneraho kubakira no kubaha ikaze.

Perezida Kagame yavuze ko icyorezo cya COVID-19 cyadindije inyungu z’iterambere, ndetse hamwe na hamwe ugasanga intambwe yari yaratewe yarasubiye inyuma.

Yavuze ko nubwo ibyo byabaye Abanyafurika bakwiye kureba amahirwe ari muri ibyo bibazo, by’umwihariko ashingingiye ku buryo bwo guhangana na byo. Ati: “Binyuze mu buryo duhangana na byo, dushobora kubaka Afurika irushijeho kuba itoshye, kandi ibasha guhangana n’ibibazo byose binyuze mu ntego z’iterambere rirambye n’Icyerekezo 2063.”

Yakomeje agira ati: “Aho kugira ngo bitubere intaza, bikwiye kudufasha guhangana n’icyorezo ndetse no guharanira kuzahura ubukungu nk’umusingi wo kwihutisha iterambere no guhanga udushya tworoshya gushora imari mu iterambere rya muntu.”

Aho ni ho yahereye ashimangira ko ibyo bikwiye gukorwa binyuze mu nzira eshatu z’ingezi. Icya mbere ni uko Afurika igomba kubaka ubufatanye bw’ingirakamaro kandi butanga inyungu ku mpande zose mu kongerera imbaraga ubushobozi bwayo bwo gukora inkingo n’indi miti.

Iya kabiri, Afurika ikwiye gushyigikira gahunda yo gukusanya ubushobozi buhagije bwo gutera inkunga iterambere, by’umwihariko inzego z’ubuzima za buri gihugu. Perezida Kagame yashimangiye ko ari intambwe imaze guterwa mu gutera inkunga inzego z’ubuzima ku mugabane wacu kandi dukwiye kubakira kuri uwo mujyo.

Inzira ya nyuma yagarutseho ni uko, mu gushyigikira Iterambere ritangiza ibidukikije muri Afurika, Isoko Rusange ry’Afurika (AfCFTA) rikwiye kwifashishwa mu bukangurambaga bwo gukoresha ikoranabuhanga n’ibikorwa remezo birambye.

Perezida Kagame yagize ati: “Kugira ngo tugere ku Cyerekezo 2063, intego zikwiye guhuzwa n’igenamigambi ry’ibihugu kuko icyo cyerekezo ntigishobora kugerwaho ubwacyo. Ni ingirakamaro cyane kuba dufite ingamba zo gukurikirana intambwe ziterwa no kwihutira kujyanisha ishyirwa mu bikorwa n’umuvuduko ukenewe.”

Yaboneyeho gushima ko iyi nama irimo kugaragaza inyungu zo kwigenzura ku bushake  kw’ibihugu n’uturere hagamijwe kubaka Afurika ibereye Abanyafurika bose.

Ati: “Kubaka Afurika dushaka ni twe bireba. Dukwiye kubiyobora kandi tukabigira ibyacu, ari na ko dushyigikirana ubwacu. Ni yo mpamvu izi gahunda ebyiri z’iterambere ari ingenzi. Zijyanye no guharanira amahoro n’uburumbuke ku mugabane wacu. Kugira ngo urubyiruko rwacu ruzabashe kubona ahazaza harukwiriye.”

Yasoje ahamya ko iyi nama izatanga imyanzuro izafasha mu gushinga inkingi zihamye z’iterambere ry’Afurika.

Umukuru w’Igihugu yaboneyeho gushima abafatanyabikorwa batandukanye bagize uruhare mu gutegura iyi nama n’uruhare bagira mu guharanira iterambere ry’Afurika.

Muri bo harimo Umunyamabanga Nshingwabikorwa wa UNECA Vera Songwe, n’Umunyamabanga Mukuru wungirije w’Umuryango w’Abibumbye Dr. Amina Mohammed.

  • NTAWITONDA JEAN CLAUDE
  • Werurwe 3, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE