Kubabaza amatungo mbere y’uko abagwa byangiza inyama-RICA

  • ZIGAMA THEONESTE
  • Mutarama 22, 2024
  • Hashize amezi 4
Image

Ikigo cy’Igihugu gishinzwe Ubuziranenge, Ihiganwa mu Bucuruzi no Kurengera Umuguzi (RICA) cyirihanangiriza ababaga amatungo kwirinda kuyababaza mbere y’uko abagwa kuko bigira ingaruka ku buziranenge bw’inyama ziyakomokaho.

Simbarikure Gaspard, Umuyobozi ushinzwe kugenzura isuku, ubuziranenge n’akato k’ibikomoka ku matungo muri RICA, avuga ko uko itungo rihohoterwa cyangwa uburyo ritwarwamo mbere y’uko ribagwa bigira ingaruka ku bwiza bw’inyama zirikomokaho.

Avuga ko ari byiza kubungabunga umutekano w’itungo rigiye kubagwa rikabanza gushyirwa mu mwanya mwiza wabugenewe, mu nzira zose rinyuramo mu gihe rigiye kubagwa.

Ati: “Gufata nabi amatungo bituma adatanga inyama nziza, bikagabanya ubuziranenge bwazo, biturutse ku binyabutabire byaje mu mubiriri waryo mu gihe yatwarwaga nabi. Ibi bikagira ingaruka ku musaruro w’inyama zikomoka ku mubiri wayo kuko ibi binyabutabire bizijyamo bitari ngombwa, kugabanyuka k’ubwiza bw’inyama bigira ingaruka ku gaciro kazo ndetse no ku buzima bw’uwaziriye”.

Muri iki gihe amatungo aracyafatwa nabi mu gihe ajyanywe ku mabagiro.

Umubazi w’amatungo mu Karere ka Gakenke, Mvunabandi Alex na we avuga ko izi mbogamizi bagihura na zo mu gihe amatungo ajyanwa ku mabagiro kuko “Imodoka atwarwamo ba nyirazo batubahiriza amabwiriza abigenga.”

RICA ikangurira ababaga amatungo maremare ko nibura bajya babanza kuyashyira ahantu hatuje mbereho amasaha 24, naho inkoko n’andi magufi agaturishwa nibura mu gihe cy’amasaha 2 mbere yo kubagwa, mu rwego rwo kuyagabanyiriza ukutishimira uko yafashwe mu gihe agiye kubagwa, ndetse no kwirinda ibyago byaterwa n’inyama ziyakomokaho zangiritse.

RICA kandi ihamya ko usibye ibibazo byagera ku muntu wariye inyama zitujuje ubuziranenge kubera uko zabazwe, umuguzi afite uburenganzira bwo guhabwa inyama nziza zijyanye n’igiciro yaziguzeho.

  • ZIGAMA THEONESTE
  • Mutarama 22, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE