Kuba ba “Mutima w’Igihugu” ntabwo byatunanira- Jeannette Kagame

  • Imvaho Nshya
  • Ukwakira 29, 2023
  • Hashize amezi 7
Image

Umugore yitwa Mutima w’Urugo kuko mu muryango aba agira akamaro kagereranywa n’ako umutima ufitiye umubiri w’umuntu. Ni we umenya ibintu byinshi byo mu rugo, byaba ibiribwa, imyambaro y’umugabo n’iy’abana, ababa mu rugo bamubitsa byinshi, byaba ibyo abana bahura na byo cyangwa ibyo ku kazi k’umugabo.

Usanga abenshi uretse kuba ari abafasha b’abagabo babo, baba abajyanama, abacungamutungo, abayobozi, abahanzi, abashinzwe ubuzima, abarimu, abashinzwe ikinyabupfura, ababyeyi n’ibindi byinshi.

N’iyo umugore atirirwa mu rugo akora akazi ka Leta cyangwa yikorera, ahanini usanga izo nshingano azigeza no mu byo akora kuko aharanira ko aho ari ibintu byose byaba biri ku murongo nk’uko atifuza kubona akajagari mu rugo iwe.

Uretse kuba ari bo bakora izo nshingano, ni na bo soko y’ubuzima kuko nta muntu ubaho ku Isi utarabyawe n’umugore, nk’uko Perezida wa Repubulika y’u Rwanda Paul Kagame aheruka kubikomozaho muri iki cyumweru i Riyadh muri Saudi Arabia, mu nama ya karindwi ya Gahunda yimakaza Ishoramari ry’Ahazaza (Future Investment Initiative/FII7).

Madamu Jeannette Kagame akaba Umuyobozi Mukuru wa Unity Club Intwararumuri, ubwo yatangizaga akanayobora Inteko Rusange n’umwiherero wa 4 w’uwo Muryango, na we yakomoje ku kamaro ka Mutima w’Urugo mu muryango aboneraho no gushimangira ko gashobora no kwaguka kakagera ku rwego rw’Igihugu.

Yagize ati: “Kuba mutima w’urugo bivuga ko ari twe twita ku rugo, tukamenya kurinda ubuzima n’isura by’urugo. Kuba ba ‘Mutima w’Igihugu’ na byo rero ntabwo byatunanira. Uru rumuri dutwaye rukomeze kutumurikira aho turi hose.”

Uyu mwiherero ngarukamwaka ubaye ku nshuro ya 4, wabimburiye Ihuriro ngarukamwaka rya 16 rya Unity Club Intwararumuri riba kuri iki Cyumweru tariki ya 29 Ukwakira 2023.

Ihuriro rya 15 ryaherukaga ryabaye ku ya 12 Ugushyingo 2022 ku nsanganyamatsiko igira iti: “Ndi Umunyarwanda, igitekerezo ngenga cy’ukubaho kwacu”.

Icyo gihe Madamu Jeannette Kagame yashimangiye ko Unity Club Intwararumuri yabaye, kandi izakomeza kuba umufatanyabikorwa w’imena mu kubaka u Rwanda.

Yafashe umwanya wo gushimira Intwararumuri za Unity Club, bemeye umuhamagaro wo kubaka ubumwe, by’umwihariko ashimira abanyamuryango bose bakomeje ubukangurambaga no kuyobora ibiganiro bya Ndi Umunyarwanda, gukemura bimwe mu bibazo byugarije abaturage, cyane cyane abafite intege nke.

Amafoto: Jeannette Kagame

NTAWITONDA JEAN CLAUDE

  • Imvaho Nshya
  • Ukwakira 29, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE