Koreya y’Epfo: Umuyobozi w’abatavuga rumwe n’ubutegetsi yatewe icyuma

Polisi ya Koreya y’Epfo yatangaje ko Umuyobozi w’Ishyaka ritavuga rumwe n’ubutegetsi Lee Jae-Myung, yatewe icyuma mu ijosi n’umugabo wari ucyitwaje.

Ibiro Ntaramakuru by’Abongereza (Reuters) byatangaje ko uyu mugabo  utamenyekanye, yagerageje kumwica ubwo yari mu ruzinduko mu Mujyi wa Busan uherereye mu Majyepfo y’Iburasirazuba bwa Koreya y’Epfo.

Lee w’imyaka 59 w’amavuko, ni Umuyobozi w’ishyaka rikomeye ritavuga rumwe n’ubutegetsi. Akimara gukomeretswa yahise ajyanwa mu ndege mu Bitaro bya Seoul nyuma yo guhabwa ubuvuzi bw’ibanze i Busan.

Ubu bugizi bwa nabi bwabaye ubwo Lee yari kumwe n’abanyamakuru ndetse n’abandi bantu nyuma yo gusura ikibuga cy’indege gishya i Busan.

Umupolisi mukuru wa Busan, Sohn Jae-Han, yavuze ko ibyabaye ari: “Igitero cy’iterabwoba kuri Lee kandi kibangamiye demokarasi,” ahamagarira abapolisi gukora iperereza ryihuse.

Ibiro bya Perezida wa Koreya byatangaje ko Perezida Yoon Suk Yeol Yagara yababajwe n’ibyakorewe Lee, anavuga ko ahangayikishijwe cyane n’ubuzima bwe.

Yategetse abayobozi gukora iperereza kuri icyo gitero, avuga ko ihohoterwa nk’iryo ritazihanganirwa.

Lee yatsinzwe amatora y’Umukuru w’Igihugu ya 2022 na Yoon ku gipimo cya 0.7%, ayo akaba ariyo majwi make cyane yanditswe mu mateka y’amatora ya Perezida wa Koreya y ‘Epfo.

Kuva yatsindwa, Lee yagiye anenga cyane Politiki ya Yoon. Umwaka ushize, Lee yakoze imyigaragambyo y’iminsi 24 agaya Yoon ko yananiwe gukemura ibibazo by’ubukungu ndetse n’ibibazo bya politiki bikigaragara hagati yabo na Koreya Ruguru.