Koreya ya Ruguru yarashe ibisasu birenga 200 ku nkombe y’Iburengerazuba

  • NYIRANEZA JUDITH
  • Mutarama 5, 2024
  • Hashize amezi 5
Image

Kuri uyu wa Gatanu, tariki ya 5 Mutarama, Minisiteri y’Ingabo ya Koreya y’Epfo, yatangaje ko Seoul yategetse kwimura abaturage bo mu birwa bya Yeonpyeong na Baengnyeong, biherereye hafi ya Koreya ya Ruguru, nyuma yuko Pyongyang yarashe ibisasu bya rutura bigera kuri 200 ku nkombe y’Iburengerazuba.

Ibisasu bya rutura bigera kuri 200 byarashwe na Koreya ya Ruguru (hafi) ku kirwa cya Yeonpyeong, bikaba byavuzwe n’umuyobozi wa Minisiteri y’Ingabo ya Koreya y’Epfo mu kiganiro n’abanyamakuru. Abayobozi kuri iki kirwa kandi babwiye Ibiro ntaramakuru by’Abafaransa AFP ko abaturage bacyo bategetswe kwimuka.

Mu kiganiro n’abanyamakuru, Umukozi wa Minisiteri y’Ingabo yagize ati: “Ingabo za Koreya ya Ruguru zarashe amasasu arenga 200 uyu munsi hagati ya saa tatu na saa tanu za mu gitondo (ku isaha yaho) mu turere twa Jangsan-got mu majyaruguru y’ikirwa cya Baengnyeong no mu majyaruguru y’Ikirwa cya Yeonpyeong”.

Abayobozi b’Inzego z’ibanze ku kirwa cya Yeonpyeong babwiye AFP ko abaturage bategetswe kwimuka mu rwego rwo gukumira.

Koreya y’Epfo, itangaza ko ikibunda cya rutura cya Koreya ya Ruguru ari igikorwa cy’ubushotoranyi. Seoul yaburiye Koreya ya Ruguru ko izafata ingamba zikwiye zo kurwanya umuriro yakomeza gucanwaho na Koreya ya Ruguru.

Usibye ikirwa cya Yeonpyeong, giherereye mu nyanja y’umuhondo, nko mu bilometero 80 mu burengerazuba bwa Incheon, abatuye ku kirwa cya Baengnyeong cyo muri Koreya y’Epfo mu majyaruguru y’uburengerazuba na bo basabwe kwimuka mu nzu zabo.

Nk’uko Ibiro ntaramakuru byo muri Koreya y’Epfo Yonhap bibitangaza ngo nyuma y’amasaha make nyuma y’amasasu ya Koreya ya Ruguru, ingabo za Koreya y’Epfo rero zakoze imyitozo yo kurasa.

Mu mwaka wa 2010, Pyongyang yarashe ibisasu bya rutura 170 ku kirwa cya Yeonpyeong, gihitana abantu bane, barimo abasivili babiri, mu gitero cya mbere cya Koreya ya Ruguru cyibasiye abasivili kuva haba Intambara ya Koreya (1950-1953).

Koreya zombi zatangiye inzira yo gutsura umubano mu 2018, zirangwa n’inama eshatu zahuje Kim Jong-un na perezida wa Koreya yepfo w’icyo gihe, Moon Jae-in. Ariko umubano hagati y’ibihugu byombi wifashe nabi cyane nyuma y’uko Pyongyang yohereje icyogajuru cy’ubutasi, cyatumye Seoul ihagarika igice cy’amasezerano ya gisirikare yo mu 2018 yari agamije guhosha amakimbirane.

Mu gusoza inama ya Komite nkuru y’ishyaka ry’abakozi muri Koreya, mu mpera z’Ukuboza 2023, umuyobozi wa Koreya ya Ruguru Kim Jong-un yategetse kwihutisha imyiteguro ya gisirikare y’intambara ishobora gutangira igihe icyo ari cyo cyose ku kirwa.

Mu 2023, Koreya ya Ruguru yakoze isuzuma ry’ibitwaro bya rutura (missiles balistiques), bikaba binyuranyije n’imyanzuro myinshi y’Umuryango w’Abibumbye ibuza ibyo bikorwa. Iki gihugu cyanditse kandi ko gifite ingufu za kirimbuzi mu Itegeko Nshinga ryacyo, kandi cyagerageje Hwasong-18, misile ikomeye yo mu bwoko bwa misile ballistique (ICBM) ikomeye mu ntwaro zayo, ifite ubushobozi bwo kwambukiranya imigabane ikagera muri Leta zunze ubumwe z’Amerika. Nyuma yo kurasa muri Koreya ya Ruguru, u Bushinwa bwiyemeje kwirinda bukaba maso.

  • NYIRANEZA JUDITH
  • Mutarama 5, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE