Kongera umusaruro bijyana no guhangana n’imihindagurikire y’ibihe

  • NYIRANEZA JUDITH
  • Ugushyingo 24, 2023
  • Hashize amezi 6
Image

Imihindagurikire y’ibihe ni imwe mu mbogamizi zituma umusaruro w’Ubuhinzi n’Ubworozi ugabanyuka, bityo Leta ibinyujije muri Minisiteri y’Ubuhinzi n’Ubworozi MINAGRI yashyizeho gahunda zo kuvugurura ubuhinzi n’ubworozi hagamijwe guhangana n’icyo kibazo.

Gahunda y’icyiciro cya 4 yo kuvugurura ubuhinzi n’ubworozi PSTA4 ifite inkingi 4 ari zo kubakira ubushobozi abahinzi n’aborozi, guhangana n’imihindagurikire y’ibihe, ubushakashatsi no guhanga udushya no kugera ku masoko.

Nk’uko byatangajwe n’Umuyobozi Mukuru ushinzwe igenamigambi muri Minisiteri y’Ubuhinzi n’Ubworozi MINAGRI Dr Ingabire chantal PSTA4 yatangiye mu 2018 izageza muri Kamena 2024 yo kongera umusaruro.

Yagize ati: “PSTA4 Ni gahunda yo kuvugurura ubuhinzi n’ubworozi guhera mu 2000, igamije kuzamura umusaruro w’ubuhinzi n’ubworozi kandi bagasagurira isoko”.

Yongeyeho ati: “Mu ntangiriro icyihutirwaga  cyari gikomeye ni ubushobozi bwo guhangana n’imihindagurikire y’ibihe, hubatswe ubushobozi no kubona ibikoresho byifashishwa mu buhinzi. Ikindi cyari gikomeye cyari ugufata neza umusaruro ngo ugezwe ku isoko”.

Yakomeje agaragaagaza ibyakozwe kugira ngo hongerwe umusaruro ndetse n’ubonetse ufatwe neza.

Ati: “Hatunganyijwe ibyanya byuhirwa, twongereye amaterasi y’indinganire yiyongereyeho 24%, ingo zihaza mu biribwa umubare wazo warazamutse ugera kuri 79% ugereranyije na mbere, gukoresha inyongeramusaruro byavuye kuri  4,8% bigera kuri 36% , kongera ingano y’ifumbire ikoreshwa yavuye kuri kilogarama 32 kuri hegitari bigera kuri 70% .

Mu gufata umusaruro neza hashyizwemo imbaraga abahinzi n’aborozi bahawe ibikoresho birimo imbuga, ubwanikiro, ibyuma bikonjesha, amakusanyirizo yiyongereheyo inshuro zirenga 2, bifite icyo byongera ku gaciro no kugera ku isoko”.

Dr Semwaga Octave umujyanama mu by’ubuhinzi muri MINAGRI akaba umukozi w’umushinga Hinga Wunguke.

Yasobanuye icyo Umushinga Hinga Wunguke witezweho muri gahunda ya Leta yo kongera umusaruro.

Ati: “Uyu mishinga uterwa inkunga na USAID ugamije kongera umusaruro, kongera ishoramari mu buhinzi no kunoza imirire, abahinzi bakongera umusaruro bakabona amafaranga  ndetse no guhugura abari mu buhinzi ngo babe bazi amategeko, ubu umushinga uri ku mwaka wa 2”.

Gahunda yo kuvugurura ubuhinzi n’ubworozi PSTA4 izasoza muri Kamena 2024.

MINAGRI ivuga ko PSTA4, yatumye ubuhinzi butanga umusaruro, aho wiyongereyoho 28% mu myaka ine ku bikomoka ku buhinzi byoherejwe hanze y’u Rwanda.

Ibikorwa bitashoboye kugerwaho muri PSTA4 bizakomerezwaho muri PSTA5.

  • NYIRANEZA JUDITH
  • Ugushyingo 24, 2023
  • Hashize amezi 6
TANGA IGITEKEREZO
Rwabukwisi Desire says:
Ugushyingo 25, 2023 at 4:05 pm

Ubuhinzi nubworozi bikozwe
Kinyamwuga Niyo mizero yimibereho mwiza yejo hazaza
Cyane mubihugu biri munzira yamajyambere esp Africa
Uwo mushinga wihutishe amahugurwa adusigire ubumenyi
Tububyaze umusaruro

Andika igitekerezo

AMATEGEKO AGENGA IYANDIKA RY'IGITEKEREZO CYAWE