Kirehe: Mu Kigo Nderabuzima cya Musaza barinubira kubyarira mu mfunganwa

  • NSHIMIYIMANA FAUSTIN
  • Gashyantare 22, 2024
  • Hashize amezi 2
Image

Bamwe mu babyeyi babyarira mu Kigo Nderabuzima cya Musaza kiri mu Murenge wa Musaza mu Karere ka Kirehe, barasaba ko inzu ababyeyi babyariramo yakwagurwa kuko aho babyarira ari mu mfunganwa kandi hahora ubucucike bushobora kubateza izindi ngorane.

Bavuga ko ubwo bucucike buterwa n’ababyara baba ari benshi ndetse n’abategereje bakabangamirwa n’urujya n’uruza rw’abantu benshi ahantu hato.

Ababyeyi bagana iki Kigo Nderabuzima bavuga ko kuba icyumba ababyeyi babyariramo ari gito ndetse ababyeyi bakabyarira ahantu hatisanzuye bibagiraho ingaruka mu mitekerereze.

Isuku nke no kubona serivisi mbi bituma batanahagaruka n’ikindi gihe, bakifuza ko icyumba cyakagurwa bakajya babyarira ahantu hisanzuye.

Umwe mu babyeyi yagize ati: “Rwose icyumba cyakira ababyeyi ni gito kuko ntitwisanzura kandi kubera urujya n’uruza rw’abantu benshi ubona nta suku ihari kubera kwegeranamo turi benshi. Twifuza inzu nshya y’ababyeyi isukuye kandi nini ku buryo twajya tuza kuhabyarira tuhishimiye.”

Undi na we yagize ati: “Waba umaze kubyara ukabona hinjiye abarwaza b’ubundi mubyeyi, ukabona baguhagaze hejuru mucuranwa umwuka. Turasaba ko hakagurwa umubyeyi akajya ahantu hisanzuye kandi hameze neza hatari akavuyo.”

Umuyobozi w’Ikigo Nderabuzima cya Musaza, Uramutse Alleluia, yemeza ko icyumba cyakira ababyeyi ari gito ndetse n’ibikoresho bikirimo bikaba ari bike.

Yagize ati: “Nkuko bivugwa n’abantu batandukanye, koko icyumba ababyeyi babyariramo ni gito kandi natwe turabibona kuko harimo ibitanda bine biba biriho abategereje kubyara ndetse n’abamaze kubyara niho baba bari. Bigaragara ko ari nto cyane ku buryo abantu benshi bo muri Musaza batifuza kuhabyarira kuko abahaza akenshi ni abantu baba babuze uko bagira n’abadafite ubushobozi bwo kujya ahandi. Mbese mu byifuzo batubwira, ntibaba bifuza kuza hano bitewe n’imiterere n’icyumba gito cy’ababyeyi.”

Umuyobozi w’Akarere ka Kirehe, Rangira Bruno yavuze ko ikibazo cy’ubuto bw’inzu ababyeyi babyariramo bakizi kandi giteye impungenge, ariko hari gahunda yo kubaka indi nzu y’ababyeyi, imirimo ikaba izatangira mu kwezi kwa Werurwe 2024.

Yagize ati: “Amafaranga yarabonetse yo kubaka inzu y’ababyeyi ku bufatanye na Partners In Health kandi ibikorwa byo gutangira imirimo yo kubaka ni vuba kuko inzira zo gutanga isoko ku bazacyubaka, iri kugana ku musozo. Uyu mwaka urarangira inyubako yuzuye kandi turi gukora kugira ngo abaturage bavurirwe ahantu hisanzuye.”

Ubuyobozi bw’Ikigo Nderabuzima cya Musaza butangaza ko bwakira mu kwezi ababyeyi baza kwisuzumisha batwite bari hagati ya 40 na 60 ariko abahabyara bahipimishirije bakakira abari hagati ya 20-25 bitewe n’ubuto bw’iki cyumba.

Uretse ubuto bw’icyumba, ababyeyi basaba ko n’umubare w’ibitanda wakwiyongera kuko ukiri muto.

  • NSHIMIYIMANA FAUSTIN
  • Gashyantare 22, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE