Kirehe: Hatangijwe icyiciro cya 2 cy’umushinga wo kuhira imyaka uzatwara miliyari 122 Frw

  • NTAWITONDA JEAN CLAUDE
  • Werurwe 1, 2022
  • Hashize imyaka 2
Image

Uyu munsi ku wa 1 Werurwe 2022, Umunyamabanga wa Leta muri Minisiteri y’Ubuhinzi n’Ubworozi Prof. Ngabitsinze Jean Chrysostome na Ambasaderi w’u Buhinde mu Rwanda Oscar Kerketta,  bashyize ibuye ry’ifatizo ahagiye kubakwa ibikorwa remezo by’icyiciro cya kabiri cy’umushinga wo kuhira imyaka mu Murenge wa Mahama, mu Karere ka Kirehe.

Ni icyiciro cya kabiri cy’umushinga wo kuhira ku buso  bungana na hegitari zisaga 7,000 hakoreshejwe ikoranabuhanga, iki cyiciro cyatangijwe uyu munsi kikaba kizakorwa ku buso bungana na hegitari 2,669. Biteganyijwe ko kubaka ibikorwa remezo bizarangira  mu mezi 18, uyu mushinga ukaba witezweho kuzafasha abahinzi bagera ku 4,000.

Ugiye gushyirwa mu bikorwa ku bufatanye bw’u Rwanda n’u Buhinde, uzakorwa mu byiciro bibiri bizarangira bitwaye  miliyoni 120,5 z’amadolari y’Amerika (asaga miliyari 122 z’amafaranga y’u Rwanda).

Abahinzi bavuga ko ari igisubizo ku kibazo bakunze guhura na cyo cy’izuba ryinshi ryangizaga imyaka ntibabone umusaruro baba biteze.

Umunyamabanga wa Leta muri Minisiteri y’Ubuhinzi n’Ubworozi Prof. Ngabitsinze Jean Chrysostome yasabye abaturage gutangira gutekereza uko bazabyaza umusaruro ibi bikorwa byo kuhira imyaka nibimara kuzura, bityo bibafashe gutera imbere.

Ati: “Turashimira Nyakubahwa Perezida Paul Kagame na Leta y’u Buhinde batumye uyu mushinga wo kuhira imyaka muri aka gace uboneka. Mu myaka 10 iri imbere, ntawashidikanya ko aka gace kazaba keza imyaka myinshi kakanasagurira amahanga”.

Yakomeje avuga ko iyi mishinga yo kuhira imyaka ari gahunda ikomeye Igihugu kirimo yo gukura abaturage mu bukene no kwihutisha iterambere ry’ubuhinzi no kohereza hanze ibibukomokaho.

Guverineri w’Intara y’Iburasirazuba  CG Emmanuel K. Gasana,  yavuze ko Ubuyobozi ndetse n’abaturage b’iyi Ntara bashimira Leta y’u Rwanda yagize uruhare mu kuzana iyi mishinga ngo ifashe mu guhangana n’ingaruka z’imihindagurikire y’ikirere zibasiraga ibice bimwe by’iyi Ntara.

Yagize ati: “Ni ishema kuba turi hano tuvuga ibyiza gusa bigamije guteza imbere abaturage, Intara n’Igihugu muri rusange”.

Yakomeje agira ati: “Intara ishyize imbere gahunda yo gushishikariza abaturage kwibumbira mu makoperative, bagahinga ku buso bunini  no gushyiraho ibiraro by’amatungo kugira ngo ibisigazwa by’ibikomoka ku buhinzi byifashishwe mu kugaburira amatungo kandi n’abahinzi babone ifumbire hafi”.

Guverineri  CG Gasana yagaragaje ko hari imishinga minini yo kuhira imyaka yubatswe n’iri kubakwa muri iyi Ntara irimo uwa Kagitumba, uwa Gabiro Agri Business Hub, umushinga wo kuhira imyaka mu Karere ka Kayonza, Nasho,… Yitezweho kwihutisha iterambere ry’ubuhinzi.

Umuyobozi w’Akarere ka Kirehe Rangira  Bruno, na we yashimiye ubuyobozi bwahisemo kuzana uyu mushinga muri aka gace kakundaga kwibasirwa n’izuba, asaba abaturage kuzabyaza umusaruro ibi bikorwa remezo bikabafasha kongera umusaruro.

Guverineri w’Intara y’Iburasirazuba C.G. Gasana K. Emmanuel, avuga ko imishinga yo kuhira bunguka igira uruhare mu iterambere ry’ubuhinzi
Umuyobozi w’Akarere ka Kirehe Rangira Bruno
Umunyamabanga wa Leta muri Minisiteri y’Ubuhinzi n’Ubworozi Prof. Ngabitsinze Jean Chrysostome
  • NTAWITONDA JEAN CLAUDE
  • Werurwe 1, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE