Kirehe: Abasenyewe n’imashini zubaka umuhanda barasaba ingurane

  • Imvaho Nshya
  • Ugushyingo 7, 2023
  • Hashize amezi 4
Image

Bamwe mu baturage batuye mu Kagari ka Nyabikokora mu Murenge wa Kirehe, Akarere ka Kirehe, bavuga ko ubwo ikorwa ry’umuhanda w’ibilometero bitatu uva ku biro by’Akarere ka Kirehe ugana Nyabikokora imashini zawukoze zabasenyeye inzu zabo, bakifuza ko bahabwa ingurane.

Abo baturage bavuga ko basenyewe n’ikorwa ry’umuhanda wa Kayonza-Rusumo guturuka ahitwa Nyabikokora unyura mu Mudugudu wo Kwihanika ugakomeza ujya ku biro by’Akarere ka Kirehe.

Bavuga ko inzu zabo zangiritse ku buryo bafite impungenge ko zizabagwaho, bagasaba ko bahabwa ingurane cyangwa bagahabwa amafaranga yo kuzisana.

Uwimana Clementine yagize ati: “Mfite impungenge zuko mbona iyi nzu yanjye izangwira, abasigaye rero ni uko twafashwa tugahabwa amafaranga tugasana inzu zacu zitaratugwira tukareba ko twamaramo kabiri. Iyo imvura iguye kwinjiramo biba ikibazo kuko turavirwa amazi akareka mu nzu.”

Gakuba Theoneste yagize ati: “Uyu muhanda wubakwa hakoreshejwe imashini ubundi ziradusenyera kubera gutsindagira umuhanda. Twifuza ko basana inzu zangiritse cyangwa bakaduha amafaranga tukivugururira.”

Mukamurara Savera na we yunzemo agira ati: “Njye ngira igishyika kuko inkuta z’inzu mba mbona zarashinyitse bitewe n’imashini zakoraga umuhanda. Narasannye ariko urabona ko bidafatika nkeneye ubufasha”.

Umuyobozi wungirije w’Akarere ka Kirehe ushinzwe imibereho myiza y’abaturage Mukandayisenga Janviere, yavuze ko abangirijwe ibyabo babariwe ndetse bakaba baratangiye no kwishyurwa, bityo abaturage batarabarirwa bakaba basabwa kwegera ubuyobozi nabo bakazishyurwa n’abandi cyangwa bakazasanirwa.

Yagize ati: “Abangirijwe n’abasenyewe bose turi kubishyura kuko turimo gukorana na RTDA kugira ngo bose bishyurwe. Umuntu wese utarabarirwa, dufite abakozi babishinzwe dufatanyije na RTDA bityo iyo tubamenye bahita bajyayo bakababarira kuko mbere na mbere barabanza bakareba niba inzu yarasenywe n’umuhanda; twasanga ariko bimeze bakabarirwa. Turasaba abagifite ibibazo nk’ibyo ko batugana cyangwa bakatuvugisha kuri telefoni kuko ntituzi abafite iki kibazo abo ari bo.”

Iki kibazo cy’imiryango 20 yangirijwe hakorwa umuhanda ariko ntibahabwe ingurane, si aba Nyabikokora gusa kuko kivugwa n’abaturage bangirijwe imyaka hakorwa umuhanda Kayonza-Rusumo na bo bavuga ko batigeze babarirwa ibyabo byangijwe, bagasaba ubuyobozi gukemura ibi bibazo.

NSHIMIYIMANA FAUSTIN

  • Imvaho Nshya
  • Ugushyingo 7, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE