Kirehe: Abakoresha umuhanda Nyakarambi-Rusumo babangamiwe na rigole zangiritse

  • NGABOYABAHIZI PROTAIS
  • Ukuboza 11, 2023
  • Hashize amezi 3
Image

Abakoresha umuhanda Nyakarambi-Rusumo bagenda n’amaguru, bavuga ko babangamiwe na rigole zagiye zivaho beto zizipfudikiye bigatuma bakunda kugwamo kuko ari yo nzira yagenewe abanyamaguru muri uwo muhanda wa kaburimbo.

Abaturage bavuga ko izo rigore zapfundikiwe mu myaka itatu ishize, ariko ubu ibisima byari bizipfundikiye hamwe na hamwe byagiye bimenwa n’imodoka zabinyuraga hejuru zijya guparika ku buryo hasigayemo ibinogo bamwe na bamwe bagwamo bakahavunikira.

Abaturiye isantere y’Ubucuruzi ya Nyakarambi ni bo bavuga ko bafite ikibazo kibaremereye cyane nk’uko Muhorakeye Marie Claire yabibwiye Imvaho Nshya.

Yagize ati: “Uko ureba izi rigole za beto zagiye zigwamo hasigara ibyobo, ibi byatewe no kuba hari ibimodoka binini bijya kwambukiranya uyu muhanda bijya ku maduka bikahasenyura. Nkatwe rero hari ubwo abana bacu bagwamo, abakuru na twe iyo umuriro ubuze twirohamo hari n’ubwo ujya guhigamira igare ukumva waguye muri izi rigole. Ubuyobozi nibudufashe bugaruzeho ziriya beto”.

Hakizimana Obed, umwe mu baturage bo muri santere ya Nyakarambi, nawe ashimangira ko ku banywa agatama hari bamwe mu bagabo bavunikiramo.

Yagize ati: “Izi rigole njye nzi abantu bageze ubwo bajya mu bitaro kubera imvune bakura muri izi rigole zidatwikiye. Kubera ko beto zimwe zaramenetse izindi zigwamo gusa binagaragara ko bazisondetse; iki kibazo ubuyobozi burakizi duhora twihondaguramo bamwe bavunitse amaguru, hari n’umugabo uherutse kugwamo avamo amenyo abiri y’imbere yavuyemo. Iki ni ikibazo gikomeye bamwe banyuraho bakabona byoroshye ariko noneho kuri twe ni ikibazo gikomeye ubuyobozi budufashe busubizeho izi beto.”

Umuyobozi w’Akarere ka Kirehe Bruno Rangira, aganira n’umunyamakuru wa Imvaho Nshya  yavuze  ko ikibazo cyo kuba za beto zaravuye kuri uriya muhanda  bagiye kukiganiraho na RTDA, cyane ko ngo uriya muhanda uri ku rwego rw’igihugu.

Yagize ati: “Uriya muhanda buriya uri ku rwego rw’Igihugu ubu rero ziriya rigole kuba zaragiye zangirika tugiye ku biganiraho n’Ikigo cy’Igihugu Gishinzwe Iterambere rya Taransiporo (RTDA) zibe zasanwa kuko buriya imihanda nk’iriya ntabwo iba iri mu nshingano n’ubushobozi bw’akarere kandi nawe ubizi neza ko ari umuhanda mpuzamahanga.”

Isantere y’ubucuruzi ya Nyakarambi inyurwamo n’imodoka ziva n’izijya muri Tanzania, hakaba iziba zikoreye imizigo mu gihe zijya gushyira imizigo ku maduka mu gihe zambukiranya umuhanda zikangiza beto ziba zitwikiriye rigole.

  • NGABOYABAHIZI PROTAIS
  • Ukuboza 11, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE