Kirehe: Abagenzi barasaba gushyirirwaho icyapa cy’imodoka

  • Imvaho Nshya
  • Ugushyingo 7, 2023
  • Hashize amezi 4
Image

Bamwe mu baturage bajya n’abava mu mujyi wa Nyakarambi mu Karere ka Kirehe babangamiwe no kuba umuhanda uva Kayonza-Rusumo utagira aho bahagarara, ku buryo iyo bageze muri uyu mujyi bituma bajyanwa muri gare bagasubira inyuma bajya gushaka serivisi ku biro by’Akarere ka Kirehe, bagasaba ko hashyirwaho ahantu imodoka zajya zihagarara.

Abaturage bakoresha umuhanda Kayonza-Rusumo bavuga ko biteye impungenge n’ikibazo gikomeye cyo kuba nta hantu hafi bashobora guhagarara iyo batwawe n’imodoka rusange bageze mu mujyi wa Nyakarambi bagiye gushaka serivisi z’amahoteli, ku karere, bajyanye abana ku ishuri, mu gakiriro, ku kigo cy’urubyiruko n’ahandi hatandukanye; dore ko nta cyapa gishobora guhagararaho imodoka uretse ku bitaro bya Kirehe no muri Gare ya Nyakarambi.

Ibi ngo bituma bagezwa muri gare bakagaruka inyuma bagakora urugendo rugera hafi ku kilometero dore ko moto bayishyura amafaranga 500 y’u Rwanda bajya gushaka izi serivisi.

Kubwimana Andrea yagize ati: “Iyo ufite amafaranga utega moto ya 500 kandi hari igihe uza udafite amafaranga yo gutega moto ukagenda urugendo rw’iminota 20 cyangwa 30 uva muri gare ugiye gushaka serivisi mu karere. Twasabaga ko badushyiriraho icyapa cy’imodoka zikajya zidusiga hafi kuko wajya uzamuka n’amaguru”.

Mukundwa Josee nawe yagize ati: “Umuturage uturutse ahantu kure byabaye akamenyero ko agomba kuviramo muri gare ariko birabangamye kuko twakabaye tuvuramo hano ku muhanda ujya ku Karere. Twifuza ko badufasha bakadushyiriraho icyapa imodoka zihagararaho zikajya zidusiga hano hafi kuko hari amahoteli, ibigo by’amashuri abana biga babamo, agakiriro n’izindi serivisi dukenera buri munsi”.

Ibi kandi bishimangirwa n’unushoferi utwara abantu mu buryo bwa rusange Umukiza Gilbert wigeze gucibwa amande ubwo yasigaga abagenzi bajyaga ku karere.

Yagize ati: “Nari ntwaye abagenzi barenga 15 baje mu mahugurwa ku Karere bakererewe bansaba ko mbasiga ku muhanda ujya ku Karere, narabikoze ariko Polisi ihita iza iranyandikira. Abaturage dushwana kenshi bifuza ko mbasiga ariko kuko nabihanirwa nkakomeza nkabageza muri gare.”

Umuyobozi w’Akarere ka Kirehe, Rangira Bruno yavuze ko bagiye kuganira na Polisi kugira ngo barebe ko muri aka gace hashyirwa icyapa imodoka zihagaragaho zigasiga abagenzi.

Ati: “Tugiye gusuzuma dufatanyije na Polisi kureba niba koko bitabangama (Circulation) cyane ko imodoka ziba zigenda, hari igihe byateza ikibazo cy’umutekano muke wo mu muhanda ariko ni ibintu tugiye kuvugana na Polisi turebe ibishoboka ariko birumvikana kuko hatabaye n’aho ngaho twareba hariya abapolisi baba bahagaze ariko turakivugana na Polisi turebe icyakorwa”.

Uretse iki kibazo cyo kuba nta cyapa gihari, abaturage basaba ko hashyirwa ibizwi nka dodani kugira ngo imodoka zihamanuka zijye zihahurira zagabanyije umuvuduko kugira ngo bidateza impanuka.

Minisiteri y’Ibikorwa Remezo itangaza ko umuhanda wa Kagitumba – Kayonza- Rusumo ufite uburebure bwa kilometero 208, wifashishwa mu koroshya urujya n’uruza mu bikorwa by’ubucuruzi bwambukiranya imipaka, wuzuye utwaye asaga miliyari 164 z’amafaranga y’u Rwanda mu 2021.

FAUSTIN NSHIMIYIMANA

  • Imvaho Nshya
  • Ugushyingo 7, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE