Kigali: Inzego zirigira hamwe ikoreshwa ry’ubwenge buhangano (AI)

  • Imvaho Nshya
  • Nzeri 27, 2023
  • Hashize amezi 8
Image

Komisiyo y’Igihugu ikorana n’Ishami ry’Umuryango w’Abibumbye ryita ku Burezi, Ubumenyi n’Umuco (CNRU), UNESCO, Minisiteri y’Ikoranabuhanga na Inovasiyo (MINICT) barigira hamwe ku mikoreshereze y’ikoranabuhanga ry’ubwenge muntu buhangano (AI).

Inzego zitandukanye zifite aho zihuriye n’ikoranabuhanga ziteraniye mu nama y’iminsi ibiri yiga kuri Politiki nshya y’imikoreshereze y’ubwenge buhangano (Artificial Intelligence).

Mutesa Albert, Umunyamabanga Mukuru wa Komisiyo y’igihugu ikorana na UNESCO (CNRU), avuga ko iyi nama yo ku rwego rw’Igihugu yateguwe na CNRU ku nkunga ya UNESCO na Komisiyo y’Abadage ikorana na UNESCO.

Muri iyi nama harareberwa hamwe inama UNESCO igira ibihugu bitandukanye.

Mutesa agaragaza ko hari inyigo yakozwe mu minsi ishize ijyanye no kugira ngo abantu batandukanye ndetse n’ibihugu bamenye uko bitwara mu gukoresha ubumenyi buhangano.

Yagize ati: “Ubwo bumenyi tububona mu burezi, mu bumenyi butandukanye bujyanye n’ubuhinzi, mu buryo bwo kuvura, ubumenyi bujyanye no gutwara abantu n’ibintu.

Ni ubumenyi ubona ahantu hose kandi buyobora Isi. Byabaye ngombwa kugira ngo UNESCO ifate iya mbere ishyireho amabwiriza ngengamyitwarire y’Ubumenyi buhangano (Ethics of Artificial Intelligence).

Ni ingamba z’ukuntu abantu bakwiye kumenya uko babyitwaramo, agaciro bifite, ukuntu bakorana, ukuntu bakuzuzanya kugira ngo birusheho kuba byagira akamaro kandi abantu bagakorana neza, hatagize abahutaza abandi.

Ibintu nka biriya byose bijyanye n’ubumenyi iyo bitagenzuwe neza cyangwa se ngo bihabwe umurongo umeze neza, bishobora kuba byagira ingaruka zitari nziza”.

Muvunyi Victor, Umukozi wa Minisiteri y’Ikoranabuhanga na Inovasiyo ushinzwe ikoranabuhanga ryaduka, atanga urugero rw’uko imbonwa z’umuntu (Data) zidashobora kujya ahagaragara atabizi cyangwa atamenyeshejwe, iryo akaba ari ihame.

Ati: “Ukora iryo koranabuhanga ry’ubwenge buhangano agomba kumenya ko hari amategeko abigenga cyane ko hari uburyo bikorwamo.

Turagira ngo turebe ko aya mabwiriza agomba gukurikizwa cyane cyane ko bifite ikintu cy’ubwenge buhangano”.

Akomeza agira ati: “Niba icyemezo gifashwe n’imashini, ese iyo kitanyuze umuntu ibyo bibazwa nde, bikurikiza iki, ese ntibitonesha bamwe ngo bibuze abandi?

Ingero zirahari aho byatangiye bikoreshwa mu mahanga hari ubwo bavugaga ko bidashobora kurengera abantu b’uruhu runaka bijyanye n’imbonwa bafite.

Nko muri polisi hashobora kuba harimo ibyaha byinshi by’abantu bafite uruhu runaka noneho kubera ko imashini itazi umuntu runaka ariko ifite izo mbonwa (Data) igatangira kugucira urubanza bitewe n’urwo ruhu rusa n’urw’abakoze ibyaha.

Ibyo ni byo byatumye abahanga cyangwa abantu bafite inshingano mu kunoza ikoranabuhanga bashyiraho iyo mirongo kugira ngo ayo makosa atagenda yisubiramo”.

U Rwanda rukomeje guteza imbere ikoranabuhanga ndetse no kuryifashisha kugira ngo ruteze imbere ibindi byiciro.

Inama y’iminsi ibiri ihuje inzego zifite aho zihuriye n’ikoranabuhanga, irasoza imirimo yayo kuri uyu wa Gatatu tariki 27 Nzeri 2023, mu Mujyi wa Kigali.

KAYITARE JEAN PAUL

  • Imvaho Nshya
  • Nzeri 27, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE