Kigali: Imyiteguro ya CHOGM 2022 irajyana no gukingira COVID-19

  • Imvaho Nshya
  • Gicurasi 12, 2022
  • Hashize imyaka 2
Image

Ubuyobozi bw’Ikigo cy’Igihugu cy’Ubuzima (RBC) bwatangaje ko bwatangiye ubukangurambaga bw’ibyumweru bibiri mu Mujyi wa Kigali mu gihe u Rwanda rwitegura Inama y’Abakuru b’Ibihugu na Guverinoma bo mu Muryango w’Ibihugu bikoresha Ururimi rw’Icyongereza (CHOGM) mu cyumweru kizatangira taliki ya 20 Kamena.

Umunyamabanga wa Leta muri Minisiteri y’Ubuzima ushinzwe Ubuvuzi bw’Ibanze Dr. Mpunga Tharcisse, yabwiye itangazamakuru ko ubwo bukangurambaga bwatangiranye n’intangiriro z’iki cyumweru ku wa 9 Gicurasi 2022.

Yavuze ko zimwe mu mpamvu eshatu zatumye hatangira ubwo bukangurambaga zirimo n’imyiteguro ya CHOGM. Ati: “Turitegura kwakira umubare munini w’abashyitsi muri CHOGM, bityo ni ingenzi cyane kugira abaturage bafite ubwirinzi buhagije.”

Dr. Mpunga yanakomoje ku zindi mpamvu zatumye ubukangurambaga bwongera gushyirwamo imbaraga zirimo kuba mu bindi bihugu nk’Afurika y’Epfo n’u Bushinwa haradutse ubwoko bushya bwa COVID-19 bwa Omicron.

Yavuze ko u Rwanda rugomba guhora ruri maso kugira ngo icyo cyorezo gishya kitazagera mu Gihugu kigasanga abaturage bataracyirinze rugikubita.

Ati: “Ikindi nanone u Rwanda rwihaye intego yo kuba rwageze kuri 70% y’abagomba gukingirwa byuzuye (doze ya kabiri) bitarenze muri Kamena uu mwaka  

Dr. Mpunga arasaba abaturage gukomeza kubahiriza amabwiriza yose yashyiriweho kwirinda ikwirakwizwa ry’iki cyorezo nubwo cyagabanyije  umuvuduko mu Gihugu, agira ati: “Ni icyorezo tugihanganye na cyo.”

Kuri ubu, mu Mujyi wa Kigali hateguwe site 26 zirimo ahategerwa imodoka, amasoko n’utundi duce dutandukanye, hakaba hari n’imodoka zagenewe gutangirwamo izo serivisi zizajya zihagarara ahahurira abantu benshi kugira ngo abantu boroherwe no kubona inkingo aho baba bari hose.

Grace Kabanyana ukora mu ishami rishinzwe gukingira muri RBC, yavuze ko ubu u Rwanda rufite inkingo zihagije asaba buri wese utarakingirwa kwitabira iyo gahunda.

Yanashimangiye agaciro k’inkingo, avuga ko zongera ubudahangarwa bw’umubiri ari na yo mpamvu n’iyo uwakingiwe yanduye atazahara nk’utarakingirwa.

Ubwo bukwngurambaga bwatangijwe burakorerwa ku bafite imyaka 12 kuzamura barimo abakingirwa doze ya mbere, iya kabiri cyangwa iya gatatu ishimangira.

Kabanyana yanahishuye ko mu gihe kizaza, hari gahunda yo gutangira gukingira abana bafite imyaka ihera kuri itanu kuzamura.

Minisiteri y’Ubuzima itangaza ko kugeza ubu hejuru ya 69% by’Abanyarwanda bamaze guhabwa nibura dose imwe y’urukingo rwa COVID-19, 64% doze ya kabiri na ho abagera kuri 33% bamaze gufata urukingo rushimangira.

  • Imvaho Nshya
  • Gicurasi 12, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE