Kigali: Impinduka nyuma y’ivugururwa ry’Umuhanda Sonatubes – Bugesera

  • NTAWITONDA JEAN CLAUDE
  • Nzeri 19, 2022
  • Hashize imyaka 2
Image

Umuhanda wa kilometero 13.8 uva kuri Sonatubes mu Karere ka Kicukiro ukagera ku Kiraro cy’Akagera werekeza i Nyamata mu Karere ka Bugesera, kuri ubu wabaye nyabagendwa, umuvundo w’imodoka wa hato na hato uragenda uba amateka bitewe n’ubuhanga bwashyizwe mu kuwuvugurura.

Ni ibikorwa benshi mu bakoresha uyu muhanda mu buzima bwa buri munsi bishimira ko byazanye impinduka zikomeye, aho urujya n’uruza rwarushijeho koroha ndetse bikanafasha abacuruzi n’abandi bantu bawukoresha buri munsi koroherwa n’ingendo.

Ni umuhanda wavuguruwe n’Ikompanyi y’Abashinwa (China Road and Bridge Corporation/CRBC) mu masezerano yagiranye na Leta y’u Rwanda. Ni kimwe mu bice bigize umuhanda werekeza ku Kibuga cy’Indege Mpuzamahanga cya Bugesera mu bilometero 40 uturutse ku Kibuga cy’Indege Mpuzamahanga cya Kigali.

CRBC yatangiye umushinga wo kuvugurura uyu muhanda mu mwaka wa 2019, ariko ihura n’imbogamizi zitandukanye zirimo n’icyorezo cya COVID-19 muri urwo rugendo rutari rworoshye rwanabangamiwe n’ibiza byatewe n’imvura nyinshi mu bihe bitandukanye.

Abaturage bakoresha uyu muhanda, barashima uburyo wavugururanywe ubuhanga, ku buryo kuri ubu batagihura n’ingorane mu ngendo zabo, cyane ko uretse no kwagurwa hashyizweho ibice bifasha ingeri zitandukanye, kuva ku banyamaguru n’abafite ibinyabiziga.

Bavuga ko impinduka zitabaye mu korohereza urujya n’uruza, ahubwo babona uyu muhanda waratangiye kugaragaza impinduka mu iterambere ry’ubukungu n’imibereho myiza yabo.

Emmanuel Habineza, umwe mu bacuruzi baciriritse bakoresha uyu muhanda mu buzima bwe bwa buri munsi, yabwiye Xinhua ati: “Mbere y’uko uyu muhanda wagurwa, twahuraga n’umuvundo ukabije w’imodoka cyane cyane ku Kicukiro-Centre kubera ko umuhanda wari muto cyane ugizwe n’ibisate by’umuhanda bine gusa. Kandi uyu muhanda ukoreshwa cyane n’abaturage benshi bava i Kigali cyangwa bajyayo baturutse i Nyamata buri munsi.”

Akomeje avuga ko mbere y’uko umuhanda uvugururwa, byamutwaraga iminota 45 kugira ngo akure umusaruro we ku isanteri ya Gahanga awugeze muri Kicukiro-Centre, ariko ubu bisigaye bimutwara iminota 20 gusa.

Ati: “Uyu muhanda noneho wubatswe ku rwego ruhanitse kandi urasa neza cyane. Ibi bituma urujya n’uruza rwihuta, bigatuma ducungura igihe twamaraga mu nzira ari na byo bizamura ubucuruzi bwacu.”

Habineza yashimiye CRBC yavuguruye uyu muhanda yemeza ko wafashije abawuturiye kunoza ubucuruzi bwabo ari na ko n’abawunyuramo barushaho koroherwa n’imigenderanire.

Umuyobozi w’uyu mushinga Tian Chong, yavuze ko mbere y’uko uyu muhanda uvugururwa wari ugizwe n’ibisate by’umuhanda bine gusa kandi udakomeye.

Yavuze ko bari bafite kontaro y’amezi 24 yo kuba bawurangije, ariko ingaruka z’icyorezo cya COVID-19 n’iyangirika ry’imiyoboro y’amazi bituma umushinga utinda kuzura nk’uko byari biteganyijwe ahubwo kuri ya mezi hiyongeraho andi 15 n’igice.

Tian yagize ati: “Umuhanda twarawaguye ugira imirongo ine mu bice bimwe na bimwe, mu gihe iyindi ya mirongo yageze kuri itandatu, ni ukuvuga itatu muri buri gisate cy’umuhanda. Ibyo byoroheje urujya n’uruza rw’imodoka mu muhanda.”

Yakomeje agira ati; “Ikindi nanone twubatse imihanda igerekeranye (flyover) mu isangano rya Kicukiro-Centre muri uwo muhanda. Mbere yo kubaka iyo mihanda habagamo umuvundo ukabije w’imodoka buri munsi, bigatuma urujya n’uruza rugenda nabi muri uyu muhanda. Uyu munsi nta muvundo w’imodoka ukiharangwa.

Tian yakomeje avuga ko uretse no kuri iyo mihanda igerekeranye, umuhanda Kigali-Bugesera ubu ni nyabagendwa ku buryo hashyizweho n’uburyo bwo guharanira ko ibyamaze kubakwa bihora bibungabunzwe.

Yakomeje agira ati; “Mu ikorwa ry’uyu mushinga twakoresheje uburyo bubereye Abanyarwanda, aho abenshi mu bakozi b’abahanga n’abakozi ba nyakabyizi bakoze ari Abanyarwanda.  Haracyari abarenga 500 b’Abanyarwanda bakirimo gukora muri uwo mushinga. Kuva ivugururwa ryatangira, umushinga wahuguye ibihumbi by’abatekinisiye.”

Bivugwa ko ivugururwa ry’uyu muhanda ryakozwe hashingiwe ku bipimo by’imihanda igezweho mu Bushinwa, no ku rwego mpuzamahanga, akarusho kakaba ibimera bitatse umuhanda, harimo n’ibiti by’imikindo, n’ibihwagari.

Tian yakomeje agira ati: “Mu gihe cyo kubaka na nyuma yo gusoza uyu mushinga, amaduka menshi, inzu zo guturamo ndetse n’inyubako z’ibiro byagiye byubakwa ku muhanda, ari na byo byagize uruhare rukomeye mu guteza imbere ubukungu bw’abawuturiye.

Umwe mu Banyarwanda bakoze muri uyu muhanda Liliane Nikuze, yavuze ko ari umunyamahirwe cyane ko amaze igihe kirenga imyaka 6 akorana n’iyi Sosiyete.

Yagize ati: “Nabaye umunyamahirwe nkora muri CRBC guhera mu mwaka wa 2016, kandi bampemba neza. Mbasha kwishyurira amafaranga y’ishuri abana banjye kandi nkanabaho mu buzima bwiza muri Kigali.”

Yakomeje avuga ko CRBC ari ikigo cyiza cyatanze amahirwe menshi y’imirimo ku mubare munini w’Abanyarwanda na we arimo, bikaba bikomeje kubafasha mu iterambere ryabo no kongera uruhare bafite mu iterambere ry’Igihugu.

  • NTAWITONDA JEAN CLAUDE
  • Nzeri 19, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE