Kigali: Ikibazo cy’imbuto y’ibijumba kirimo kuvugutirwa umuti

  • Imvaho Nshya
  • Ukwakira 5, 2023
  • Hashize amezi 8
Image

Jan W. Low, Umuyobozi ukuriye ubushakashatsi mu Kigo Mpuzamahanga gishinzwe guteza imbere ubuhinzi bw’ibinyabijumba (CIP) ku mugabane w’Afurika, avuga ko hashize iminsi bakorana na Leta y’u Rwanda binyuze mu Kigo cy’Igihugu gishinzwe Guteza imbere ubuhinzi n’Ubworozi (RAB) mu gushaka igisubizo cy’imbuto y’ibijumba.

Yabigarutseho mu nama y’umunsi umwe yabereye mu Mujyi wa Kigali kuri uyu wa Kane tariki 05 Ukwakira 2023, yahuje inzego zitandukanye zirimo Minisiteri y’Ubuhinzi n’Ubworozi, Abikorera, Imiryango itari iya Leta hagamijwe kurebera hamwe uko bakongera umusaruro w’ibijumba mu Rwanda.

Mu kiganiro gito yahaye itangazamakuru yagize ati “Dushobora kugera ku musaruro mwinshi turamutse dukoresheje imbuto nziza”.

Umuyobozi Mukuru wa RAB, Dr Ndabamenye Telesphore, asobanura ko ubuhinzi bwose aho buva bukagera butangirira ku mbuto.

Agaragaza ko imbuto z’indobanure ziba zavuye mu bushakashatsi ari imbuto z’indobanure zihanganira imihindagurikire y’ikirere n’ibindi.

Ati “Iyo ufite imbuto nziza ubona n’umusaruro mwiza. Ikijumba na cyo ni igihingwa ubona ko abahinzi bibikira imbuto ariko tukifuza ko ubuhinzi bw’ibijumba bwavugururwa buhereye ku kugira imbuto nziza”.

Umusaruro nturahaza ari yo mpamvu bahuriye mu nama kuko iyo haza kuba hari umusaruro mwinshi hari gutekerezwa gahunda yo kurushaho kuwutunganya.

Ati “Ntabwo utegereza ko umusaruro uba mwinshi ngo utangire utekereze kuwutunganya kuko ni uruhererekane nyongera gaciro, hari ibijya ku isoko n’ibyo abaturage barya mu ngo ako kanya.

Ugereranije n’imyumbati, ibijumba biracyari hasi”.

Igihugu cy’u Rwanda ntigihinga ingano kuko hejuru ya 80% y’ibikenerwa mu mugati bituruka mu ngano.

Bivuze ko abahinzi bagomba kugira ibyunganira ibituruka ku ngano bityo bigasimbuzwa ibituruka ku bijumba.

Ku kibazo cy’uko ibishinga bitagihingwamo ibijumba Dr Ndabamenye yagize ati “Mu bishanga hahingwa umuceri ariko mu nkuka z’igishanga hahingwa ibijumba”.

Uwemeyimana Jeanne d’Arc, umutubuzi w’imbuto y’imigozi yera ibijumba by’umuhondo akaba n’umuhinzi wabyo mu Murenge wa Mukarange Karere ka Kayonza mu Ntara y’Iburasirazuba, asobanura ko imbuto bafite bayiha umuturage wese ushoboye kubageraho, akayigura.

Ahamya ko imbuto y’imigozi y’ibijumba ihenze cyane. Ati “Imbuto irahenze cyane kubera kuhira muri iki gihe cy’izuba.

Murabizi ko lisansi yazamutse kandi amazi y’amuhirano ntagira icyo afasha imbuto keretse ay’imvura”.

Akomeza agira ati “Ibyo bituma imbuto y’imigozi nyigurisha 250 Frw ku kiro mu gihe unsanze mu rugo ariko iyo mbonye ufite amafaranga mugurisha ku ngeri y’umugozi”.

Ibijumba wabihinze ni ubucuruzi, umuhinzi ikiro akishyurwa ku mafaranga 400 bamusanze mu murima.  

Iyo ibijumba umuhinzi abyigereje ku isoko yishyurwa 500 Frw ku kilo.

Akimanishatse Faustin, Umukozi w’Ikigo Sina Gerard Entreprise Urwibutso Nyirangarama, avuga ko biswi ‘Akarabo’ bayikora mu bijumba by’umuhondo.

Agaragaza ko imbuto y’ibijumba by’umuhondo babihabwaga na RAB ariko na bo bakagira uruhare mu kongera imbuto bakanakurikiranira hafi abahinzi bahinga ibyo basanzwe babagurira.

Dr Ndirigwe Jean, Umushakashatsi mu kigo cya RAB ushinzwe gushaka imbuto n’umusaruro ariko bakibanda ku gushaka ibijumba bikungahaye kuri vitamini A, ahamya ko umusaruro w’ibijumba mu Rwanda hose ukiri hasi.

Kugeza ubu uwejeje ibijumba cyane, yeza toni 8 kuri hegitari. Imbuto bafite mu bushakashatsi, ishobora gutanga toni 30 kuri hegitari.

Abahinzi basanzwe bakorana na RAB mu buryo bwo gushyira mu bikorwa ibyo babigisha, nibura abeza neza, beza toni 14 cyangwa 15 kuri hegitari.

Akomeza agira ati “Ikindi kibazo dufite mu Rwanda, abahinzi bazi ko guhinga ikijumba ari ugupfa guterererayo imbuto ahubwo bisaba kubahiriza amabwiriza agenga ubuhinzi bw’ibijumba.

Iyo ufashe neza igihingwa cy’ibijumba byawe n’umusaruro uriyongera”.

Mu Rwanda habarizwa amoko y’ibijumba byiza bikunguhaye kuri Vitamini A. Hari kandi n’ibindi bijumba bigira uruhare mu kugabanya ingaruka zo kurwara kanseri.

Abahinzi 99% bakoresha imbuto y’ibijumba itameze neza ikindi bakayihererekanya hagati yabo kandi ntitange umusaruro.

Dr Ndirigwe agira ati: “Imbuto nziza y’ibijumba iragurwa kuko gutera imbuto wakuye ku muturanyi wawe ntabwo uba uzi uburwayi ifite”.

Mbere ya Covid19 abatubuzi b’imbuto y’ibijumba bari 95. RAB itangaza ko kugeza ubu habarurwa abatubuzi b’imbuto y’ibijumba 47 mu Rwanda hose.

Ku rundi ruhande agaragaza ko hakiri imbogamizi z’aho gutuburirwa imbuto kuko ibishanga bihingwa.

Akomeza agira ati: “Ikijumba ni ingenzi mu Rwanda kubera ko umuturage udafite ikijumba iwe, aba afite inzara mu rugo”.

Umuyobozi Mukuru wa RAB, Dr Ndabamenye Telesphore

KAYITARE JEAN PAUL

  • Imvaho Nshya
  • Ukwakira 5, 2023
  • Hashize amezi 8
TANGA IGITEKEREZO
Tuyigane says:
Ukwakira 9, 2023 at 3:50 pm

Byiza cyane inama nkiyi Aba ari ingirakamaro .haruburyo nabona abo batubuzi najye nkabigiraho.

Andika igitekerezo

AMATEGEKO AGENGA IYANDIKA RY'IGITEKEREZO CYAWE