Kigali: Icyanya cyahariwe Inganda cyakuruye ishoramari rya tiriyali 3.1 Frw

  • NTAWITONDA JEAN CLAUDE
  • Mutarama 16, 2024
  • Hashize amezi 4
Image

Icyanya cyahariwe Inganda cya Kigali cyakuruye ishoramari rya miliyari 2.5 z’amadolari y’Amerika, ni ukuvuga tiriyali zirenga 3.1 z’amafaranga y’u Rwanda kugeza mu mwaka wa 2022. 

Iyo mibare yagarutsweho mu Nama nyunguranabitekerezo yahuje abayobozi b’Urwego rw’Igihugu rw’Iterambere (RDB) n’abafatanyabikorwa bafite inganda muri icyo cyanya giherereye i Masoro mu Karere ka Gasabo.

Iyo nama yabereyemo ibiganiro byibanze ku ntambwe imaze guterwa mu buryo ishoramari ryaje muri icyo cyanya ryungura u Rwanda no ku gukemura imbogamizi abanyenganda bahura na zo mu guharanira kubaka ibiramba. 

Umuyobozi Mukuru wungirije wa RDB Nelly Mukazayire, yagarutse kuri iyo mibare agaragaza ko ari ishoramari ryakozwe n’ibigo bisaga 200. 

Mukazayire yavuze ko muri icyo cyanya hahanzwemo imirimo isaga 15,070 ndetse inganda zihakorera zikaba zinjiza miliyoni zirenga 990 z’amadolari y’Amerika mu byo zohereza mu mahanga. 

Mukazayire ati: “Mu gihe twishimira umusanzu w’iki cyanya, turashaka guharanira ko mu gihe dutera imbere tuba dufite icyanya cy’ubukungu kirambye.”

Yakomeje ahamya ko iteka haba hari idirishya ryo kurushaho kunoza imikorere, anashimangira ko icyo Leta y’u Rwanda ishaka ari uko buri munyenganda abona serivi zihebuje na we agatanga umusaruro.

Icyanya cyahariwe inganda cya Kigali cyatunganyijwe mu byiciro bibiri, aho icya mbere kiri kuri hegitari 98 z’ubutaka. 

Icyo cyiciro cyubatswemo imihanda ya kaburimbo, cyakwijwemo amashanyarazi, amazi n’uburyo bwo gutwara no kubika imyanda, imiyoboro ya internet, byose byorohereza abashoramari gukora batekanye kandi vuba. 

Iki cyiciro cya mbere kigizwe n’ibibanza 97 bigabanyijemo ibyiciro bitandukanye. 

Ikibanza cya mbere cyubatswemo inyubako y’ubugenzuzi, aho amashanyari yose akoreshwa mu ruganda acungirwa, ikindi kibanza kikabamo ibigega by’amazi bizigamira buri ruganda, n’ikibanza kirimo uruganda rutunganya imyanda yose iva mu nganda. 

Ibindi bibanza uko ari 94 byose byubatswemo inganda n’ububiko bw’ibicuruzwa bitandukanye,

Icyiciro cya kabiri cy’Icyanya cyahariwe inganda kiri kuri hegitari 178 z’ubutaka, na cyo kikaba cyubatswemo ibikorwa remezo nk’imihanda, amashanyarazi, imiyoboro y’amazi, imiyoboro y’imyanda  n’ikoranabuhanda ryo kuzimya inkongi. 

Umubare w’ibibanza biboneka muri icyo cyiciro ni 67 birimo ahagenzurirwa amashahyarazi, ahacungirwa amazi n’ikindi kibanza kirimo uruganda rutunganya imyanda iva mu nganda. 

Ibindi bibanza bisigaye uko ari 64 bihabwa abanyenganda hakaba harimo n’ikizubakwamo Pariki y’Ikoranabuhanga (ICT PARK).

Kubona ubutaka muri iki cyanya bisabwa binyuze mu Kigo cyigenga SEZAR ariko imirimo yacyo igenzurwa na Leta. 

Igiciro cya metero kare imwe ni amadolari y’Amerika 62 ni ukuvuga amafaranga y’u Rwanda ibihumbi 78 ukurikije uko ivunjisha rihagaze uyu munsi. 

Ukeneye ubutaka aba ategetswe kutajya munsi ni hegitari imwe kandi iyo amaze kubugura ahabwa ibyangombwa byabwo byose. 

  • NTAWITONDA JEAN CLAUDE
  • Mutarama 16, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE