Kigali: Hibutswe abakozi bakoreraga Iposita bazize Jenoside

  • NTAWITONDA JEAN CLAUDE
  • Kamena 3, 2022
  • Hashize imyaka 2
Image

Muri iki gihe cy’iminsi 100 yo kwibuka ku nshuro ya 28  Jenoside yakorewe Abatutsi, Ubuyobozi n’abakozi ba Ofisi y’Igihugu y’Amaposita  bibutse abakozi 26 bakoreraga Iposita  bazize Jenoside yakorewe Abatutsi mu 1994.

Iki gikorwa cyabereye ku cyicaro cy’Iposita mu Mujyi wa Kigali kuri uyu wa Gatanu taliki  03 Kamena 2022, cyaranzwe no kunamira no gushyira indabo ku rwibutso rw’aba bakozi bazize Jenoside hanatangwa  ubutumwa bwo kwibuka, kwiyubaka ndetse no gusigasira ibyo Igihugu cyagezeho.

Minisitiri w’Ikoranabuhanga na Inovasiyo, Ingabire Paula witabiriye  iki gikorwa, yavuze ko kwibuka ari inshingano ndetse bikaba n’igihango.

Ati: “ Kwibuka ku nshuro ya 28 Jenoside yakorewe Abatutsi hano ku Iposita ni inshingano kandi ni igihango dufitiye abazize Jenoside”.

Yakomeje avuga ko Jenoside yakorewe Abatutsi mu 1994 ari amateka mabi atagomba kwibagirana bitewe n’uburyo yateguwe, ikigishwa, igashyirwa mu bikorwa, igasenya Igihugu.

Ati: “Abishwe bari Abanyarwanda kandi zari imbaraga z’Igihugu n’abo twibuka uyu munsi bari abakozi bagenzi banyu mwakoranaga ku buryo icyuho basize cyahise kigaragara”.

Minisitiri Ingabire Paula yakomeje avuga ko ari inshingano za buri wese kurwanya abakomeje gupfobya Jenoside yakorewe Abatutsi ndetse no guhembera ingengabitekerezo yayo.

Yagize ati: “Tubarwanye, urubyiruko turwigishe amateka y’ukuri tunarusaba gukomeza kwirinda abashaka kuruyobya”.

Umuyobozi Mukuru w’Iposita Kayitare Célestin yavuze ko bazahora bibuka, bazirikana abazize Jenoside yakorewe Abatutsi.

Ati: “ Kuri uyu munsi turibuka abo twakagombye kuba turi hamwe ariko ntibyashobotse kubera ko Imana yabahamagaye; umuntu agira uburyo ava ku isi ariko abangaba bahavuye mu buryo butari buteganyijwe ubundi, akaba ari yo mpamvu tuzahora tubazirikana aho bari, twemera y’uko tuzongera tukabana na bo”.

Bizimana Christian wari uhagarariye Ibuka muri uyu muhango, yagarutse ku mateka mabi yaranze Igihugu yagejeje  kuri Jenoside yakorewe Abatutsi, akomoza ku yaranze  MINITRANSCO (Minisiteri yari ishinzwe Ubwikorezi n’Itumanaho) Iposita yabarizwagamo, avuga ko  harimo ivangura  no guheza Abatutsi mu mirimo.

Ati: “Mu nyandiko nahoze ndeba zigeze gutangwa na Minisiteri y’Abakozi ba Leta mu 1990, zigaragaza ko mu bakozi b’iyo Minisiteri bari 520 muri bo Abatutsi bari 90, na ho 430 bari Abahutu”.

Yakomeje avuga ko agace Iposita iherereyemo ubu hafi ya Kiliziya ya Saint Paul na Sainte Famille  gafite amateka yihariye muri Jenoside yakorewe Abatutsi,  abakozi b’Iposita  bakwiye kumenya.

Kayirangwa Marie Josée watanze ubuhamya na we yagarutse ku mateka yakusanyije yaranze Iposita by’umwihariko mu 1992 ubwo yari imaze kugirwa ikigo itakiri ishami ry’iriya Minisiteri.

Kayirangwa Marie Josée watanze ubuhamya

Ati: “Hari ivangura moko ryagaragazwaga mu bintu  bitandukanye; harimo gukora lisiti y’abakozi hagendewe ku bwoko, mu gihe cyo gutanga imyanya y’akazi, kwimurwa, guhabwa amahugurwa hibandwaga cyane ku bwoko ku buryo nta Mututsi wahabwaga umwanya w’ubuyobozi”.

 Yakomeje agira ati: “Ikindi cyaranze icyo gihe ni ukwimwa umwanya uri mu kazi ngo utamenya amabanga y’akazi ukazayashyira bene wanyu b’inyenzi, ikindi cyakundaga kubaho ni uguhezwa mu mirimo imwe n’imwe nko kwakira no kubika amafaranga, bavugaga ko atahabwa Umututsi kuko bumvaga ko azayatwara akayashyira bene wabo b’inyenzi […]”.

Kayirangwa wavutse mu muryango w’abana icumi, batanu bakicwa muri Jenoside hamwe n’ababyeyi babo bombi, ashingiye ku buzima yanyuzemo no ku mateka mabi yaranze Igihugu, yasabye ababyeyi kwigisha abana babo ibyiza, bakabatoza kubana neza, bagaharanira ko batazabaho mu buzima bubi nk’ubwaranze ayo mateka mabi.

Abatanze ubutumwa kandi bashimiye ingabo zari iza RPF Inkotanyi zahagaritse Jenoside yakorerwaga Abatutsi, zikabohora Igihugu, ndetse bashima n’ibimaze kugerwaho mu kwiyubaka.

Muri iki gikorwa cyo kwibuka hanabayeho kuremera imiryango 15 y’abarokotse Jenoside itishoboye yo mu Murenge wa Muhima mu Karere ka Nyarugenge. 

Habayeho no kuremera abarokotse Jenoside yakorewe Abatutsi batishoboye

Amafoto

  • NTAWITONDA JEAN CLAUDE
  • Kamena 3, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE