Kigali: Bifuza kugurirwa imyanda aho kwishyura abayibatwarira

  • ZIGAMA THEONESTE
  • Mutarama 9, 2024
  • Hashize amezi 5
Image

Bamwe mu batuye mu Mujyi wa Kigali, barasaba ko bajya bagurirwa imyanda aho gutanga amafaranga yo kuyijyana kuko hari aho ibishingwe bifatwa nk’imari ishyushye bitewe n’ibikorwamo.

Ni mu gihe abenshi baba bazi ko buri cyumweru bagomba kwishyura amafaranga ajyanye no gukura imyanda mu ngo ikajyanwa ahabugenewe.

Habimana Alphonse wo mu Karere ka Gasabo, avuga ko buri kwezi yishyura ibishingwe amafaranga ibihumbi bitatu, we akavuga ko ari menshi kuko nta ruhare abaturage bagira mu kuyashyiraho.

Avuga ko nk’ibikoresho bya Pulasitiki iyo bikuwe mu ngo zabo bijyanwa kunagurwa, bityo aho kwishyuzwa ari bo bakabaye bishyurwa. Ati: “Batwishyuza amafaranga menshi kandi imyanda bajyanye bakongera bakayicuruza…”

We na bagenzi bavuga ko ibyo bishingwe ahubwo bajya babigurirwa kuko ubu byabaye imari ishyushye bibyazwa amafaranga.

Bavuga ko Kompanyi zitwara imyanda ari zo zakagombye kwishyura abaturage aho kubishyuza.

Umwe ati: “Iyo bigeze i Nduba bakuramo Palasitiki bagakuramo n’ibindi bibafitiye akamaro, ahubwo twe twumva Leta yadukorera ubuvugizi akaba ari twe bazajya babiguraho.”

Akimpaye Beata, Umukozi w’Ikigo cy’Igihugu gishinzwe kubungabunga ibidukikije (REMA), avuga ko kugeza ubungubungu babona ko koko imyanda iva mu baturage yajya yishyurwa.

Yongeraho ko hari abaturage bataramenya kuvangura imyanda barobanuramo ibora n’itabora ndetse n’abayishyira aho babonye. Ati: “Abaturage rero kuba bavuga ko batakabaye bishyura ahubwo imyanda yakabaye igurwa, rimwe na rimwe bafite ukuri ariko nanone ntibaragera ku kuri cyane.”

Yakomeje agira ati: “Imyanda ibaye icunzwe neza yatoranyijwe muri izo ngo zabo cyangwa muri za resitora ndetse n’ahandi, bishobora kubyazwa amafaranga.

Inganda zinagura ibyuma zirabigura, bafite amafaranga bishyura ku kilo ku bakusanyije iyo myanda ari abakora pulasitiki bafite ibiciro amafaranga babishyura bitewe n’ubwoko bw’izo pulasitiki, impapuro na zo ubu hari inganda zikusanya impapuro.”

“[…] Nkavuga ngo rero, Abanyarwanda tubashije kubona uko twavangura iriya myanda mu ngo zacu cyangwa se aho dukorera, kuko hari imyanda igurwa byabafasha kugurwa, ariko kenshi usanga hari imyanda iza ivanganganze.”

Dusengiyumva Samuel, Umuyobozi w’Umujyi wa Kigali, asabonura ko haramutse habonetse umushoramari ugura iyo myanda byaba ari byiza,

Meya Dusengiyumva ariko anavuga ko bakomeje gukora ubukangurambaga kugira ngo abaturage bajye bajyana imyanda aho ikwiye kujyanwa.

Yagize ati: “Uko imyanda ikusanywa, hari Koperative z’abaturage hirya no hino zemeranywa n’Imirenge kuko ni bwo buhari, bakabijyana ahabugenewe kugira ngo iyo myanda itunganywe.

Yakomeje akangurira abaturage kugira isuku bakusanya imyanda, bakirinda ko inyanyagira mu ngo mu gihe hagitegerejwe ko hari impinduka mu micungire y’imyanda no kuyitunganya.

  • ZIGAMA THEONESTE
  • Mutarama 9, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE