Kigali: Abenjenyeri 121 bongerewe ubumenyi bubafasha guhangana n’ibigo mpuzamahanga

  • NTAWITONDA JEAN CLAUDE
  • Ukuboza 10, 2023
  • Hashize amezi 5
Image

U Rwanda rwungutse abenjenyeri 121 bafite ubumenyi buhambaye mu gukoresha ikoranabuhanga rigezweho mu guhanga inyubako n’ubundi bumenyi bubafasha guhangana n’ibigo mpuzamahanga usanga byiharira amasoko y’ubwubatsi kubera intera y’ubumenyi n’ikoranabuhanga bigezeho.

Abo bahanga bahawe impamyabushobozi nyuma y’amahugurwa bahawe ku bijyanye no gukora inyigo z’imishinga y’ubwubatsi bw’inyubako, imihanda n’ibiraro, kubarura imari mu mishinga y’ubwubatsi, gusesengura ubukomere bw’inyubako ndende n’imitingito, kuyobora imishinga minini y’ubwubatsi byose bikorwa ifashishijwe ikonarabuhanga.

Umuhango wo kubashyikiriza izo mpamyabushobozi wabaye ku wa Gatanu tariki ya 8 Ukuboza mu Mujyi wa Kigali, ukaba ubaye ku nshuro ya 4 aho abamaze kongererwa ubushobozi bwo guhangana ku isoko mpuzamahanga bamaze kurenga 300.

Ni amahugurwa atangwa mu gihe kiri hagati y’amezi atandatu n’umwaka umwe, n’Ikigo Nyarwanda “Nziza Training Academy” gitanga amahugurwa ahanitse ku barangije za Kaminuza mu masomo y’imyuga n’ubwenjenyeri.

Nzirorera Alexandre uyobora “Nziza Training Academy”, yavuze ko ubumenyi batanga buza bwunganira ubwo abo benjyenyeri n’abananga mu guhanga inyubako bakuye muri Kaminuza, ariko bukaba bwisumbuyeho kuko bakoresha ikoranabuhanga rigezweho ku isoko ry’umurimo.

Yagize ati: “Ubumenyi dutanga hano ni ubumenyi bw’ikirenga cyane ko tunashaka abarimu bafite ubuhanga buhanitse (experts) bavuye mu bihugu bitandukanye byadutanze iterambere, aho twe amasomo yacu aza kuziba icyuho kiri mu masomo atangwa na za Kaminuza mu Rwanda.”

Yakomeje agira ati: “Twifashisha ikoranabuhanga rigezweho, uko twe hasohotse ikoranabuhanga rishya ni ryo tujyana na ryo kuko ni byo bikenewe ku isoko ry’umurimo. Mu bihe byashize wasangaga nta Munyarwanda wajya gupiganwa ugasanga akazi kikubirwa n’abanyamahanga gusa.”

Nzirorera Alexandre avuga ko bitanga umusaruro kuko usanga amazina y’Abanyarwanda bahuguye mu bihugu bifite ubushobozi bwisumbuyeho, dore ko hari n’inzobere ziva muri ibyo bihugu zije guha amuguhugurwa Abanyarwanda baminuje hifashishijwe ikoranabuhanga rihanitse. 

Abenjenyeri bishimiye guhabwa ubumenyi bubafungurira amahirwe yagutse mu ruhando mpuzamahanga

Ashimangira ko amasomo batanga yatangiye gutanga umusaruro mu rugendo rwo guteza imbere u Rwanda mu ruganda rw’ubwubatsi bwifashisha ikoranabuhanga rihanitse.

Eng. Kazawadi Papias ukuriye Ihuriro ry’ingaga z’Abenjenyeri muri Afurika, yasabye abasoje amasomo kutazapfusha ubusa ubumenyi bw’ikirenga bahawe ahubwo bakabufashisha u Rwanda n’amahanga.

Ati: “Impamyabushobozi mwahawe zigaragaza ubumenyi bw’ikirenga, ndabasaba kuzabukoresha neza haba mu Rwanda muri aka Karere no muri Afurika yose muri rusange, muzakomeze kunga ubumwe mwirinde gupfusha ubusa ubumenyi n’ubushobozi mwahawe muhesha ishema u Rwanda n’iki kigo cyabahuguye.”

Uwantege Lydia, Umuyobozi wungirije mu Rugaga rw’Abubatsi babigize umwuga mu Rwanda, yavuze ko ubumenyi Abenjenyeri bakura muri Kaminuza buba budahagije, baba bakeneye amahugurwa yisumbuye.

Ati: “Ubumenyi nk’ubu bukenewe ku isoko ry’umurimo buba bukenewe, kuko ubwo ukura muri Kaminuza ntibuba buhagije. Turashima cyane Nziza Training Academy ku bw’aya mahugurwa, kuko u Rwanda rukeneye Abenjenyeri  b’inzobere bafite ubumenyi bw’ikirenga, ari nayo mpamvu usanga bahugurwa n’ababizobereyemo babimazemo igihe mu bihugu byabo. Aya mahugurwa ni ingenzi rero kuko aziba icyuho cy’amasomo batakuye mu mashuri yacu.”

Iradukunda Olivier waminuje mu bijyanye n’amashanyarazi (Electrical Engineering), akaba umwe mu basoje ayo mahugurwa, yavuze ko ubumenyi n’ubushobozi bungutse agiye kubukoresha neza, cyane ko hari byinshi agiye guhindura mu mikorere ye.

Yagize ati: “Ubwubatsi buri gutera imbere, ni yo mpamvu natwe twaje aha kuhavoma ubumenyi bwisumbuyeho bwiganjemo ikoranabuhanga bukazadufasha kuzamura no guteza imbere uruganda rw’ubwubatsi ndetse no kwagura imikorere yacu twifashishije ubu bumenyi n’ikoranabuhanga rigezweho mu bwubatsi, dukoresheje igihe gito.”

Ikigo Nziza Training Academy cyafunguye imiryango mu mwaka wa 2018, abamaze kongererwa ubumenyi mu nshuro enye zishize bakaba bakomeje guhindura uruganda rw’ubwubatsi mu Rwanda.

Aba benjenyeri bahawe impamyabumenyi, baturutse mu bigo by’ubwubatsi bikomeye mu Rwanda birimo NPD, HORIZON Construction, Water Access Rwanda, ASSETIP, PRISMA na SKAT Consulting.

  • NTAWITONDA JEAN CLAUDE
  • Ukuboza 10, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE