Kigali: Abaturage basabwe kudahishira ruswa birinda kugura serivisi z’ubuntu

  • NTAWITONDA JEAN CLAUDE
  • Mata 27, 2022
  • Hashize imyaka 2
Image

Mu Mujyi wa Kigali hatangijwe icyumweru cyahariwe ubukangurambaga bwo kurwanya ruswa n’akarengane. Ni igikorwa cyatangiriye mu Turere tugize Umujyi wa Kigali, ku rwego rw’Umujyi butangirizwa mu Karere ka Kicukiro mu Murenge wa Kigarama mu Kagari ka Bwerankori.

Ubukangurambaga bwo kurwanya ruswa n’akarengane mu mitangire ya serivisi, bufite insanganyamatsiko igira iti ‘Turwanye ruswa mu mitangire ya serivisi, twubake u Rwanda twifuza’.

Icyumweru cyahariwe kurwanya ruswa n’akarengane mu Mujyi wa Kigali cyatangiye ku wa Kabiri taliki 26 Mata 2022 kizarangira taliki 03 Gicurasi 2022.

Hagamijwe gutanga ubutumwa ku baturage ndetse n’abatanga serivisi ku ngaruka za ruswa. Abaturage basabwa kudahishira ruswa no kutagura serivisi bari bagenewe bemererwa ku buntu.

Umuyobozi Nshingwabikorwa wa Kicukiro, Umutesi Solange, avuga ko hari ibikorwa nk’Uturere tuzahuriramo tugize Umujyi wa Kigali harimo no gutanga amakuru ku cyuho cya ruswa.

Ati: “Birimo no gusaba umuturage kugira uruhare rwe mu gutanga amakuru ku gihe. Niba hari icyuho cya ruswa mu mikorere cyangwa imitangire ya serivisi umuturage atishimiye, tuhamenye bityo natwe dufate ingamba zo kurwanya imikorere mibi ndetse n’icyo cyuho cya ruswa n’akarengane gicike”.

Umutesi, Umuyobozi w’Akarere ka Kicukiro, agaragaza ko ruswa ari icyaha gikomeye,  agasanga ubu bukangurambaga bugamije no kwereka umuturage ko na we adakwiye kuba umufatanyacyaha muri ruswa.

Yerekana kandi ko nta mahirwe ari mu gusabwa ruswa kuko ngo ni inshingano z’abatanga serivisi kuzitanga ku gihe.

Ati: “Iyo dukora ubukangurambaga tuba tubwira umuturage usaba serivisi ariko tunabwira utanga serivisi kugira ngo twibukiranye kandi duhwiturane”.

Umutesi Solange, Umuyobozi Nshingwabikorwa w’Akarere ka Kicukiro, yasabye abaturage gutanga amakuru kuri ruswa (Foto Kayitare J.P)

Ubuyobozi bw’Akarere ka Kicukiro busaba abaturage kujya bagaragaza abantu ku giti cyabo bavugwaho ruswa, ko atari byiza kuvuga ko urwego rwose runaka rwakira ruswa.

Abaturage batunze agatoki abaka ruswa

Abaturage bo mu Karere ka Kicukiro mu Murenge wa Kigarama, bashima serivisi bahabwa ndetse bamwe bakagaragaza ko muri serivisi z’ubutaka ku Karere zifasha uzigannye mu gihe cyihuse.

Sibomana Jean Pierre, umuturage wo mu Kagari ka Bwerankori, avuga ko icyaha cya ruswa n’akarengane kugira ngo gicike bisaba uruhare rwa buri muturage.

Ati: “Gukumira no kurwanya ruswa byagombye guhera kuri twe ba Mutwarasibo”.

Ashima ko hari umukozi muri serivisi z’ubutaka utanga neza serivisi kandi agakurikirana dosiye y’umuturage kugeza abonye serivisi yasabye.

Muvunyi Emmanuel wo mu Kagari ka Nyarubaka mu Murenge wa Kigarama avuga ko kugira ngo ruswa igaragara mu myubakire icike burundu, hatekerezwa ku Midugudu y’abantu batishoboye.

Yagize ati: “Mukwiye gutekereza uko hashyirwaho imidugudu iciriritse ku buryo natwe abatishoboye twayubakamo. Ugiye kubaka inzu ijyanye n’ubushobozi bwe kandi idateganyijwe ku gishushanyombonera cy’Umujyi wa Kigali, aho ni ho umuntu ahera atanga ruswa”.

Babwirenabo Hawa anenga Inzego z’ibanze n’Urwego rwa DASSO zigaragaramo ruswa.

Atanga urugero rw’aho mu Murenge hari ba DASSO barya ruswa bakagenda batungirana agatoki bavuga ko runaka wubaka mu buryo bunyuranyije n’amategeko atanga akantu (ruswa) buri wese ngo akajya kugasaba.

Umuyobozi Nshingwabikorwa w’Akarere ka Kicukiro, Umutesi, asobanura ko atari urwego rurya ruswa ahubwo ko ari wa mukobwa uba umwe agatukisha bose.

Atangaza ko urwego rwa DASSO rugira uruhare mu bikorwa by’iterambere, agasaba abaturage kudaharabika urwego.

Ati: “Guharabika urwego si byiza. Kugira ngo turwanye ruswa ni uko dutanga amakuru kuri ruswa, kudatanga amakuru kuri ruswa ni ukwiteranya n’Igihugu. Amakuru ya ruswa arakenewe”.

Hari abaturage batanze ibitekerezo banashima serivisi zitangirwa muri serivisi z’ubutaka
Ubuyobozi bwa Kicukiro busaba abaturage gutanga amakuru kuri ruswa
  • NTAWITONDA JEAN CLAUDE
  • Mata 27, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE