Kigali: Abasoje muri ULK biyemeje gutanga umusanzu mu kubaka igihugu

  • KAMALIZA AGNES
  • Ukuboza 15, 2023
  • Hashize amezi 2
Image

Ku nshuro ya 20 Kaminuza Yigenga ya Kigali (ULK) yasohoye abasaga 1 000 mu muhango wabereye kuri sitade ya ULK kuri uyu wa 15 Ukuboza 2023.

Abanyeshuri basoje amasomo yabo muri ULK barishimira ko basoje amashuri yabo ya Kaminuza bakaba bavuga ko baje gutanga umusanzu wabo mu kubaka igihugu n’Afurika muri rusange.

Abayo Divine nawe asoje amasomo ye mu cyiciro cya kabiri cya kaminuza (Master’s Degree), mu Mategeko Mpuzamahanga (International Laws) nawe ati: “Ndashimira abanyeshuri bagenzi banjye twafatanyije kandi by’umwihariko abasoje amasomo yabo mu by’ubumenyingiro ndabasaba kuzagira uruhare mu marushanwa atandukanye tukereka Isi imbaraga dufite.”

Arongera ati: “Hano tuhakuye ubumenyi buhagije buzatuma tuba abagore n’abagabo beza tukagaragaza uruhare rwacu muri sosiyete kandi ushoye imbaraga mu kwiga ntabwo aba ahombye.”

Mu basoje harimo abo mu cyiciro cya kabiri cya Kaminuza (Bachelor’s Degree), icyiciro cya gatatu cya kaminuza (Master’s Degree) n’abasoje  Ubumenyingiro (ULKPolytechnic).

Bashimye Leta y’u Rwanda idahwema kubashyigikira no kubashishikariza ko igihugu kiri mu biganza byabo bagomba kugikorera bashyira mu ngiro ibyo bakuye mu ishuri.

Uwamahoro Alice ni umwe mu basoje mu kiciro cya mbere cya Kaminuza mu ishami rya Economic ati: “Uyu ni umunsi utazibagirana kuri njye n’umuryango wanjye kuko natangiye kwiga mbona bigoye, rero siniyumvishaga ko umunsi nk’uyu uzagera. Ni amateka kandi nkabije inzozi kuko nahoze nifuza kuminuza”.

Yashimiye ULK by’umwihariko yabahaye ubumenyi bugiye kubafasha gukora imirimo no kuyihanga.

Ati: “Nshimiye by’umwihariko ULK, haba abarezi badufashije ndetse n’abayobozi njye ndumva kuko nsoje amasomo yanjye ngiye gushyira imbaraga mu gutanga umusanzu wanjye niteza imbere haba ari ugukora imirimo itandukanye ndetse nubaka n’igihugu.”

Bongeyeho ko bagomba kuba igisubizo cy’u Rwanda kandi bagiye gushyira itafari ryabo mu kubaka Afurika kandi atari umugabane w’ibibazo nk’uko amahanga abibona.

Umuyobozi Mukuru wa Kaminuza ya Kigali ULK Proff. Dr Balinda Rwigamba yashimye abanyeshuri basoje amasomo yabo by’umwihariko ashima Leta y’u Rwanda idahwema  gushyira imbaraga mu gushyigikira uburezi,  aboneraho gusaba abanyeshuri basoje kurangwa n’indangagaciro bagakunda igihugu nk’uko babitojwe.

Ati: “Mwarigishijwe kugira ngo muzavemo abayobozi kandi mube intangarugero muri sosiyete mufite imyumvire mizima, muzashyire ubu bumenyi mukuye hano mu buzima bwanyu bwa buri munsi mugaragaze ko mwize, mukunde igihugu, murangwe n’umwete n’ishyaka kuko mufite ubumenyi kandi mwize neza.”

Yongeyeho ko Kaminuza yigenga ya Kigali ULK ishyira imbaraga mu gutanga ubumenyi bufite ireme yongera umubare w’abarimu babifitiye ubushobozi, hongerwa ibikoresho by’ikoranabuhanga bigezweho n’inyubako himakazwa gukoresha ikoranabuhanga mu kwiga, kandi ko umwihariko wa ULK ari ugutanga ubumenyi bwuzuye busasiwe n’indangagaciro zigaragarira mu buzima bwa buri munsi.

Umuyobozi w’Amashuriu na za Kaminuza Dr Rose Mukankomeje, avuga ko uburezi atari umurimo woroshye kandi bashimira ubuyobozi bwa ULK ingufu bashyize mu gutanga uburezi ndetse no kubaka amashuri meza abereye abahiga.

Yongeyeho ko umurimo w’uburezi usaba ubwitange asaba abarezi gushyiramo imbaraga kuko ngo ushaka kwica igihugu yica uburezi.

Ati: “Iyo ushaka gusenya igihugu ntwabwo ukeneye bombe atomike, ntabwo ukeneye misire, iyo ushaka kwica igihugu wica uburezi, kuko abanyamategeko bavamo bazaca imanza nabi, abivuza kwa muganga bazagwa mu biganza by’abitwa abaganga kandi atari bo, inzu zizahirima kuko zubatswe n’abubatsi batabizi ni ukuvuga ko uburezi bwacu dukwiye kububungabunga tukabugira bwiza abana bacu bubake u Rwanda bubake n’Afurika”.

Yasabye abasoje amasomo kuragwa n’indangagaciro batojwe bakaza ku isoko ry’umurimo kandi ko iri atari iherezo ryo kwiga bakwiye gukomeza bakazavamo ba porofeseri.

Ati: “Abasoje mwese isoko ry’umurimo rirabategereje imihigo irakomeye kandi imihigo irakomeye kandi irakomeje, rero turashaka umuntu warangije ufite ubumenyi ndetse na za ndangagaciro mwatojwe hano muri ULK.

Nahoze ndeba abasoje hano muri benshi ariko iri si ryo herezo ry’urugendo kuko dukeneye abandi baporofeseri, abigisha za kaminuza n’abandi rero mwebwe musoreje hano mugerageze mukomeze mwige mushyireho indi ntambwe”.

Abanyeshuri basoje bose hamwe ni 1335, abasoje icyiciro cya gatatu ni 217, abasoje ikiciro cya mbere ni 663, mu gihe abasoje Ubumenyi ngiro ari 232.

Kaminuza yigenga ya Kigali ULK kuva yatangira uburezi ikaba imaze gusohora abahanga mu by’ubwenge basaga ibihumbi 40 bose bashyize itafari ryabo mu rugamba rwo kubaka igihugu.

  • KAMALIZA AGNES
  • Ukuboza 15, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE