Kigali: Abasaga 2000 barahurira mu nama ya WTTC

  • Imvaho Nshya
  • Ugushyingo 1, 2023
  • Hashize amezi 7
Image

Guhera kuri uyu wa Gatatu tariki ya 1 kugeza ku wa Gatanu ku ya 3 Ugushyingo 2023, i Kigali harabera inama mpuzamahanga y’Inama ihuza ababarizwa mu Bukerarugendo ku Isi (World Travel and Tourism Council – WTTC) basaga 2000.

Ni ubwa mbere iyi ibereye ku mugabane w’Afurika, ikazagaruka no ku ntambwe imaze guterwa mu kwimakaza urwego rw’ubukerarugendo ku Mugabane w’Afurika, by’umwihariko mu myaka mike ishize.

Ubuyobozi bw’Urwego rw’u Rwanda rushinzwe Iterambere (RDB), bwatangaje urutonde rw’abayobozi b’ingenzi bazageza ijambo ku bitabiriye iyo nama barimo rurangiranwa mu mupira w’amaguru Didier Drogba ugeza ku bitabiriye ubunararibonye bwo gukurira muri Ivory Cost, kubera Kapiteni w’Ikipe y’Igihugu.

Mu bandi bitezwe kugeza ijambo ku bitabiriye iyo nama harimo Abakuru b’Ibihugu batatu na Visi Perezida umwe, ariko amazina yabo ntabwo yamenyekanye.

Abandi bayobozi b’ingenzi bitezweho gufata ijambo barimo impuguke akaba n’inararibonye mu gusesengura ubukungu mpuzamahanga Justin Urquhart-Stewart, Umuyobozi w’Ishami rya Leta Zunze Ubumwe z’Amerika (USA) rishinzwe umutekano wa Taransiporo David P. Pekoske, n’Umuyobozi w’Ishami ry’Ubucuruzi mu Ikipe y’Arsenal Juliet Slot.

Haza kandi Umuyobozi Mukuru w’Urwego rushinzwe Iterambere mu Rwanda (RDB) Gatare Francis, n’Umuyobozi Mukuru wa Sosiyete y’u Rwanda ikora ubwikorezi bw’abantu n’ibintu mu Kirere (RwandAir) akaba n’Umuyobozi w’Inama ya ba Guverineri b’Ishyirahamwe Mpuzamahanga ry’Ibigo bikora ubwikorezi bwo mu Kirere, Yvonne Makolo.

Abandi banyacyubahiro bitezweho kwitabira iyi nama y’ingirakamaro harimo Minisitiri w’Ubukerarugendo w’Afurika y’Epfo Patricia de Lille, Minisitiri w’Umutungo Kamere n’Umukerarugendo Angellah Jasmine Mbelwa Kairuki, n’Umuyobozi w’Ikigo cya Ukraine gishinzwe Iterambere ry’Ubukerarugendo Mariana Oleskiv.

Biteganyijwe ko abayobozi bahagarariye za Guverinoma z’ibihugu bitandukanye ndetse n’abayobozi b’inzego z’ubukerarugendo muri Leta cyangwa abikorera, abahanga ibishya n’abandi, bahurizwa hamwe no kuganira ku buryo bwo kurushaho gushyigikira ukwiyubaka k’ubukerarugendo bukarushaho gutekana, kwigira no kutagira n’umwe buheza mu guharanira iterambere rirambye ry’ahazaza habwo.

Abayobora ibiganiro barimo Umuyobozi Mukuru wa WTTC Arnold Donald, Umuyobozi akaba n’uwashinze Umuryango Partner Certares Greg O’Hara, Umuyobozi Mukuru wungirije akaba n’ushinzwe guharanira ibirambye mu Muryango Iberostar Gloria Fluxa, Umuyobozi Mukuru wa Heritage Group akaba n’umwe mu bakuriye Abercrombie and Kent Manfredi Lefebvre d’Ovidio, Umuyobozi ushinzwe Ingendo, Taransiporo n’ibirebana no kwakira abantu muri Microsoft  Julie Shainock, hamwe na Matthew Upchurch, Perezida akaba n’Umuyobozi Mukuru wa Virtuoso.

Perezida wa WTTC Julia Simpson, yagize ati: “Tunejejwe no gutangaza ko abo bayobozi bakomeye kandi bafite izina ku Isi babana natwe muri iki cyumweru. Iyi ni inama ya mbere ibereye ku mugabane. Ukwiyemeza k’u Rwanda mu guteza imbere urwego rw’ubukerarugendo nyuma y’ibihe bigoye ni uko gushimirwa. Iterambere ryihuse ry’iki gihugu rigishyira mu mwanya mwiza wo guhinduka icyerekezo kigezweho cy’ubukerarugendo.”

Ubuyobozi bwa WTTC bwemeje ko insanganyamatsiko y’inama mpuzamahanga igiye kuba ku nshuro ya 23, izibanda ku kubaka ibiraro bihuza uruhererekane rw’ubukerarugendo, agaciro kabwo mu iterambere atari ku bukungu gusa ahubwo no ku mubumbe n’abawutuye,  hagamijwe guharanira iterambere rirambye ry’ejo hazaza.

Julia Simpson, avuga ko u Rwanda ari icyerekezo gihebuje cyo kwakiriramo iyo nama mu gihe urwego rw’ubukerarugendo rurimo kwinjira mu cyerekezo gishya kiruyobora ku kugera ku Ntego z’Iterambere Rirambye (SDGs).

Yakomeje agaragaza ko kuba u Rwanda n’Afurika muri rusange bituwe n’umubare munini w’urubyiruko ari amahirwe akomeye, aho idolari rimwe muri 13 yinjizwa azaba ava mu bukerarugendo, ndetse n’umurimo umwe muri 17 ihanzwe izaba ari iyo muri urwo rwego.

Uretse kuba iyi nama ari intambwe itewe n’u Rwanda by’umwihariko, bivugwa ko ari amahirwe akomeye agiye kuba urufunguzo rw’ibikorwa by’iterambere mu rwego rw’ubukerarugendo ku Mugabane w’Afurika.

Iyi nama yitezweho gutanga urubuga rwagutse rugamije kubaka ibiraro bihuza uruhererekane rw’urwego rw’ubukerarugendo, no kongera gutegura ahazaza harambye h’uru rwego kugira ngo rutange umusaruro wose rukwiye kuba rutanga.

Iyo nama yateguwe na WTTC ifatanyije na RDB, ikaba yitezwemo ibiganiro byibanda cyane ku kubaka ubudahangarwa no guharanira iterambere rirambye, kubyaza umusaruro ikoranabuhanga ry’ubwenge muntu buhangano (AI) no kurushaho gusobanukirwa amasoko mashya agenda avuka mu rwego rw’ubukerarugendo.

Haranarebwa ku mahirwe n’imbogamizi ku iterambere ry’uru rwego haba muri Afurika ndetse no mu ruhando mpuzamahanga, bikajyana no kugerageza gushakira hamwe ibisubizo birambye ku mbogamizi zose zigaragazwa.

NTAWITONDA JEAN CLAUDE

  • Imvaho Nshya
  • Ugushyingo 1, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE